Aluki 8

1Dabeha n daa ta eŋɛ fiin la, a dole la teŋkanra la teŋbibihe mɔɔla Yelesoma la yɛhera Na'ayenɛ Sɔ'ɔlom la. Te a dɔlɔba la pia la bayi' la, 2la pɔgɔhe basɛba me daa lagom dɔla en mɛ. Pɔgɔhe la dela sɛba te a dige bonbɛ'ɛhe ba zen'enhen ge tebɛ ba ban'ahe buuri buuri la. Ba dela Mari se'em te ba yi'ira Magdalene, te a dige te bonbɛ'ɛhe bayopɔe yehe a zen'en la. 3Yoanna se'em n de Naba Herod tontona Kuza pɔga la Susana la pɔgɔse'ehe kekeko me dole en. Bama n de sɛba n bo'ore Yesu la sɛba woo n lagom dɔla en la sɛla te ba nara te ba tara. 4Te nɛrekooŋɔ daa yehe teŋhe yema yema daa wa'an a zen'en na. Ban wa'ana la, a makɛ la makerɛ bo ba. 5Te, kaara n yehe te a lobe a bonbuura. Te n lobere la, basɛba daa zɔngɛ la sore zuo te nɛreba daa nɛ' ba la na'ma ge te niihe me wa'ana gɔ' ba. 6Ge te basɛba me zɔngɛ tanhe zuo. Te ban yehe la, ba ko'e mɛ. Se'ere n sɔe la, mo'ohogɔ ka boe bini. 7Te basɛba me zɔngɛ gɔn'ɔhe poan. Te ban yehe la, gɔn'ɔhe la zo'e fan' ba te ba ki'. 8Te basɛba me zɔngɛ pɔn'ɔhegɔ poan. Te ban yehe la, ba zo'e wom kekeko laahe woo te a borɛ a nyɛ laahe kɔbega pa'ahɛ. N yele makerɛ wa ba'ahɛ la, a nya yele mɛ te, Hon se'em n tare toba ho kelehe. 9Te a dɔlɔba la n daa soke en makerɛ la vɔnrɛ n de se'em la, 10a yele te, Na'ayenɛ bahɛ yamam te ya bɔkera a Sɔ'ɔlom la yɛla. Ge, han de'a basɛba mam makere la magaha ma'an bɔ'ɔra ba, ba behere ge ba ka nyɛte ge me kɛleha ge ka bɔkera. 11Ge makerɛ la vɔnrɛ dela dena wa: bonbuula la ane wo Na'ayenɛ yelehom la. 12Bonbose'a n zɔngɛ sore zuo la ane me wo sɛba n wom Na'ayenɛ yelehom la, ge te Sagona la wa'ana bahɛ te ba da sakɛ bo se'emdaana n wan fan' ba bahɛ la. 13Ge sɛba me n zɔngɛ tanhe zuo la ane me wo nɛresɛba n wom yelehom la te ba poorɛ pee te ba bɔta te ba kelehe. Bama me sakɛ bo yelehom la mɛ dabeha fiin wa wo bonbuula n yehe ka tara nyɛga se'em la. Ge te ba han ta nyɛ' daaŋɔ yɛhera ba sakerɛ la poan, ba ne zagahɛ yelehom la mɛ. 14Ge sɛba me n zɔngɛ gɔn'ɔhe poan la, ane me wo nɛresɛba n wom yelehom la. Ge teŋa wa zuo daaŋɔ, la tarega, la nyɛlom zuo, te ba ka nyaŋɛ eta etesoŋɔ Na'ayenɛ sore dɔlɔga la poan wo gɔn'ɔhe n zo'e fan' bonbuula n yehe se'em la. 15Ge te sɛba me n zɔngɛ pɔn'ɔhegɔ poan la ane me wo nɛresɛba n wom yelehom la ge gorɛ dɛ kaŋkaŋɛ ba sunya poan ge nyaŋɛ eta etesoŋɔ. 16Nɛra ka langere butolela ge dekera lɔkɔ vugula ka bii a dekɛ ka ta sonregɛ koka leŋe, ge a wan dekɛ ka ze'ele la butolela ze'elego zen'en te bo nɛɛra bɔ'ɔra sɛba n kɛn'ɛra na la te ba nyɛta dɔla. 17Dene poan, sɛla ka boe sogɛ te mam kan tare de yehe peelom me na. Ge te sɛla te se'em ka yele nɛra yɛhera Na'ayenɛ Sɔ'ɔlom la, mam wan bahɛ te ya baŋɛ dɛ. 18Bala, kelehe ya sɛla te n yele ya wa soŋa soŋa. Se'ere n sɔe la, hon se'em n zamehɛ sɛla ge gurɛ dɛ soŋa soŋa, Na'ayenɛ wan pa'ahɛ hɔ sɛla n gane bala. Ge hon se'em n ka zamehɛ sɛla ge sɛla te ho tara la ho wan bɔregɛ dɛ. 19Te Yesu n daa nan tɔgɔre bɔ'ɔra nɛrekooŋɔ la, a ma la a yebehe daa wa'an a zen'en me na. Ge nɛrekooŋɔ la zuo, ba ka nyaŋɛ paɛ en. 20Bala te ba yele en te, Ho ma la ho yebehe n boe yeŋa bɔta te ba nyɛ' hɔ. 21Yesu n wom ban yele en se'em la, a pa'alɛ nɛrekooŋɔ la yeti, Nɛresɛba n kelehere Na'ayenɛ han eta sɛla te n yele ane me wo mam madoma la n sɔɔnrɔ la. 22Ge daarɛ deyema te Yesu daa zom ɔɔnrɔŋɔ Yesu la a dɔlɔba la ge yele ba te, Bahɛ te to keŋɛ yakɛ ya mɔgɔrɛ la yakenɛ deyema la ha. Te ba sakɛ te ba keŋɛ. 23Ban ye' la, gɔɔm n tare Yesu. Ge te sabebekantɛ me lɔbera mɔgɔrɛ la. Ko'om lobere bala la, ko'om n daa kɛn' ɔɔnrɔŋɔ la te ba daa ge fiin wa la ba kile. 24Bala te ba vuruge paɛ nɛɛ en yele en te, Pa'ala, pa'ala, to yete to yee ko'om wa poan mɛ. Te a ihege tanhɛ sabego la la ko'mi'inhe la te ba ka le lɔbera ge te la ana wo sɛla n pon ka eŋɛ la. 25Te a nya daa soke ba yeti, Bene te ya nan kelom ka nam mam? Ge n eŋɛ sɛla la zuo te la eŋɛ ba pakerɛ. Bala te ba yɛta taaba te, Bene nɛra n wana wa? Nɛra ka boe wan ta'an tanhɛ ge sabeeo la ko'mi'inhe te ba wom a nɔɔrɛ wo boraa kana wa. 26Ge te ba nya daa paɛ Gerasadoma teŋa. Teŋa wa bo la mɔgɔrɛ la yakenɛ. 27Te n ta sige ɔɔnrɔŋɔ la poan doe doone la, boraa ayema te bonbɛ'ɛhe kɔ'ɔn tona la n to'ohɛ Yesu. Boraa wa eere la beele ge me gan'an yɔɔrɔ zuto. 28N wa to'ohɛ Yesu la, a kaahɛ mɛ kekeko ge lu Yesu nɛŋan yele en te, Na'ayenɛ se'em n gane zan'an Dayɔa Yesu, ho bote la bene la mam? N belone ho mɛ te ho da namehɛ mam. 29Se'ere n sɔe la, Yesu tanhɛ bonbe'a la te a yehe boraa la poan, dabeha kekeko te ba ne ba' en la banhe ge te ba gura en. Ge a ne kɔ' ba bahɛ mɛ ge te bonbe'a la tare en keŋɛ mɔɔ ha. 30Te Yesu soke en te, Ho yu'urɛ dela ane? Te a lebehe yeti, N yu'urɛ dela Tuha Tuha. Se'ere n sɔe la, bonbɛ'ɛhe la kekeko n tone la en. 31Te bonbɛ'ɛhe la belom Yesu te a da dige ba bahɛ namehegɔ zen'en la. 32Ge a dige ba te ba kɛn' kurikuri kekeko n bo zoore la bɔba ɛɛra ba dia. Bala te a sakɛ te ba keŋɛ bini. 33Te ban yehe boraa la zen'en na la, ba keŋɛ ta kɛn' la kurikuri kekeko la. Te bama me zɔ' sige mɔgɔrɛ la poan. 34Sɛba n behere kurikuri la n nyɛ' dena wa la, ba zɔ' keŋɛ ta yele nɛresɛba woo n bo teŋa la poan la teŋse'ehe n lɛm bini la sɛla n eŋɛ la. 35Bala te nɛreba yehe keŋɛ te ba behɛ sɛla n eŋɛ la. Te ban paɛ Yesu zen'en la, ba nyɛ' te boraa la daa zin'an du' Yesu. A me yɛ' futo mɛ ge te a potɛn'ɛrɛ bɔna soŋa soŋa. Bilam te dabeem kɛn' ba. 36Te nɛresɛba n boe nyɛ' te bonbɛ'ɛhe yehe boraa la poan na la, yele nɛreba la Yesu nɛŋan se'em n dige ba la. 37Bala te dabeem kɛn' Gerasadoma la te ba yele Yesu te a keŋɛ ba zen'en. Depooren te a zom ɔɔnrɔŋɔ te a lebe. 38Ge te boraa la te bonbɛ'ɛhe yehe a poan na la belom te a doohe en. Ge Yesu ka sakɛ ge yele en te, 39Lebe kule ho yire la ho ta yele sɛla woo te Na'ayenɛ eŋɛ bo ho. Te boraa la keŋɛ ge mɔɔla bɔ'ɔra nɛreba teŋa la woo poan sɛla te Yesu eŋɛ bo en. 40Te Yesu n daa lebe la, nɛrekooŋɔ la gure en mɛ ge to'e en soŋa soŋa. 41Te boraa kayema daa wa'an na. A daa dela zamehegɔ yire la zuodaana ge te a yu'urɛ dɛna Yairus. N daa paɛ na la, a daa dɔnbelɛ la Yesu nɛŋan belom en te a wa'an a yire na. 42Se'ere n sɔe la, a daa tare la a pɔyɔyeŋɔ ma'an te ka bɛn'ɛnra ge la a ki'. Ka me daa dela yuun pia la ayi'. 43Te ban daa ye' la nɛreba daa mikere en mɛ ge te pɔka kayema me daa bɔna bini bɛn'ɛnra. A daa lute la sea yuun pia la ayi' ge te la ka gɔ'ɔra ge te sɛla woo te a tara la a yɔ' la tebadoma ge ba daa ka ta'an tebɛ ka. 44Te pɔka wa daa tole Yesu pooren ta kalom a fuo la kenkɛleŋa. N daa kalam bala la bilam bilam te a ban'an la daa bahɛ. 45Te Yesu daa soke te, Ane n kalom mam la? Te nɛreba woo ki'ihɛ, te Peter daa yeti, Pa'ala, la dela nɛrekooŋɔ la n mikere ho. 46Ge Yesu daa yeti, Aai, la dagɛ bala. Nɛra kalom mam. Se'ere n sɔe la, mam baŋɛ te paŋa yehe n zen'en tebɛ nɛra. 47Te pɔka la n daa baŋɛ te a kan ta'an le'ehɛ yele wa poan la, dabeem daa tare en mɛ te a daa yehe na dɔnbelɛ Yesu nɛŋa la valom. Ge a daa yele nɛresɛba woo n boe bilam la se'ere zuo n sɔe te a kalom Yesu fuo la, n kalom la zuo te a ban'an la bahɛ bilam bilam. 48Te Yesu daa yele en te, N ma, hon sakɛ bo mam la zuo te Na'ayenɛ tebɛ ho wa. Bala, keŋɛ la sunma'ahom. 49Ge Yesu daa nan kelom tɔgɔra mɛ ge te boraa daa ze'ele zuodaana yire la na yeti, Ho pɔyɔa la ki' ya. Bala da le daana pa'ala la te a wa'an ho yire na. 50Ge Yesu n daa wom n yele zuodaana wa se'em la, a daa yele Yairus te, Da bahɛ te la daana hɔ. Hon yenzuo nam mam ge Na'ayenɛ wan tebɛ en. 51Yesu n daa paɛ zuodaana la yire la a daa bahɛ te Peter la Yon la Yames la pugula la sɔ la a ma ma'an n doohe en kɛn'. 52Ge nɛresɛba woo n daa bo bini la sunya daa sagom mɛ te ba daa kɛla pugula la zuo. Ge Yesu daa yele ba yeti, Da kele ya, te pugula la ka ki'. A gin'ihere mɛ. 53Wana zuo te ba daa la' Yesu. Se'ere n sɔe la, ba daa baŋɛ te pugula la ki' mɛ. 54Ge Yesu daa paɛ gurɛ pugula la nu'o ge yi' yeti, N bia wa, ihege. 55Te a daa vo'e yɛ'ɛha ge vaɛ ihege. Te Yesu daa yete ba behɛ dia bo en te a di'. 56Te la daa eŋɛ pugula la sɔ la a ma pakerɛ. Ge Yesu daa kan'an ba te ba da yele nɛra sɛla n eŋɛ la.

will be added

X\