Aluki 7

1Yesu n daa ta tɔgɛ bo nɛreba la ba'ahɛ la, a nya keŋɛ la Kapernaum teŋa poan. 2Ge Arom teŋa pɛɛntɛɛnreba kpɛ'ɛma ayema daa boe bini tara a yameŋa nɔŋɛ. Te a yameŋa la wa bɛn'ɛnra mɛ ge la a ki'. 3Te kpɛ'ɛma la n ta wom Yesu yele la, a tom Yudoma zuodoma basɛba te ba ta yele en ta a wa'an na tebɛ a yameŋa la. 4Te n tom ba la, ba keŋɛ Yesu zen'en ta belom en te, Kpɛ'ɛma wa n tom tona wa nare ho soŋɛ en. 5Se'ere n sɔe la, a nɔŋɛ to buuri la mɛ. Ge ge mɛ' zamehegɔ yire la bo to. 6Bala te ban yele wana wa la, Yesu doohe ba te ba yɛ'a bini. Ge n ta pɔnra yire la poan la, boraa la tom a zɔdoma te ba to'ohe en. Ban to'ohe en la, ba yele en yeti, To Daana, kpɛ'ɛma la yeti, da daana ho mea to ho wa'ana. Te a ka nare a yi' ho te ho wa'an a yire na. 7Bala enŋa me le ka nare te a wa'an ho zen'en na. Ge hon yenzuo yele la ho nɔɔrɛ ma'an la ho tebɛ a yameŋa la. 8Se'ere n sɔe la, enŋa me tare zuodoma ge me de'a la zuodaana sɔna pɛɛntɛɛnreba behera. Te a han ne yele ayema yeti, Keŋɛ, a ne keŋɛ mɛ. A me han le yele ayema me yɛ'ɛha yeti, Wa'ana, a ne wa'an me na. Ge a me han ne yele a yameŋa yeti, Eŋɛ dena wa, a ne eŋɛ dɛ mɛ. 9Yesu n wom dena wa ba'ahɛ la, la eŋɛ en pakerɛ. Te a yele nɛrekooŋɔ la n dole en la te, Kpɛ'ɛma wa dagɛ tomam Israeldoma nɛra. Ge Israel nɛreba poan, mam nan ka nyɛ' ayema te a nam mam wo kpɛ'ɛma wa. 10Depooren, kpɛ'ɛma zɔdoma la n lebe kule la, ba paɛ nyɛ' te yameŋa la ban'an la pon bahɛ mɛ. 11La ka ba yue ge te Yesu daa bahɛ Kapernaum teŋa ge keŋɛ teŋa kayema te ba yi'ira Nain. A dɔlɔba la, la nɛrekooŋɔ la lagom doohe en mɛ. 12Te n ta pɔnra teŋa la zanɔɔrɛ la, a nyɛ' te ba ziire kum yɛhera zanɔɔrɛ la poan na. Boraa wa n ki' wa dela a ma biyeŋɔ zan'an zan'an n bala. A ma la me dela pɔkɔɔnrɛ. Nɛrekooŋɔ teŋa la poan daa dole pɔkɔɔnrɛ wa mɛ. 13Te to Daana Yesu n nyɛ' pɔka la, a zɔ' en ninbɔn'ɔn ge yele en yeti, N ma wa, da kɛɛla, 14ge paɛ kalom soŋɔ la te sɛba n ziire la ze'ele te a yele bodibipaalega la yeti, N yele ho te ho ihege. 15Ge te kum la ihege ge pin'ilom tɔgɔra, te Yesu yele pɔka la yeti, Ho bia la n wana. 16La daa dela pakerɛ bo ba zan'an te ba pɛngera Na'ayenɛ yɛta taaba te, Na'ayenɛ nɔtɔgɔha sɛka n gane zan'an la wa'ana bɔna la tɔ. Na'ayenɛ wa'ana te a fan' a nɛreba bahɛ. 17Nɛreba dekɛ Yesu yɛla yɛhera yelekerekana wa yeregɛ bo Yudea teŋa nɛreba woo la teŋse'ehe n lɛm bini la nɛreba. 18Ge Yon dɔlɔba la n wom yele ana wa la, ba yele en yelekerese'ehe woo te Yesu eŋɛ la. Bala te a tom a dɔlɔba la bayi'. 19To Daana Yesu zen'en, yeti ba soke en nya a dela se'em te Yenɛ loe la bii ba gura se'em. 20Te a dɔlɔba la bayi' la n paɛ Yesu zen'en la, ba yele en te, Yon Ko'sɔɔra la sokere ho na te ho dela se'em te Yenɛ loe la bii ba gura se'em me sa'am? 21Saŋkaŋa poan te Yesu tebɛ ban'ahedoma yema yema kekeko, la sɛba te bonbɛ'ɛhe tona la ba. A me bahɛ te fɔɔhe kekeko le nyɛta yɛ'ɛha. 22Bala te a nya yele Yon dɔlɔba la bayi' la te, Keŋɛ ya la ya ta yele Yon sɛla te ya nyɛ' ge wom. Ya nyɛ' ge wom te fɔɔhe nyɛta, te wɔbehe tana kena, te nɛresɛba n de konkɔɔma ka le de'a konkɔɔma yɛ'ɛha, te wahe me wona, te sɛba n ki' le vo'e ba kum la poan, ge te nahadoma me wom Na'ayenɛ Yelesoma. 23Bala, popeelom boe se'emdaana n kɔ'ɔn nam mam, bii la mam pon ka eta sɛla te a tɛn'ɛhe ne la. 24Sɛba te Yon daa tom ba na la n daa tole ba'ahɛ la, Yesu yele nɛrekooŋɔ la yɛhera Yon yele. A yeti, Yan yehe keŋɛ pɔgɔtia ha la, bene te ya tɛn'ɛha te ya behɛ bini? Ya yehe te ya ta behɛ mɔɔ te sabebego lɔbɔra ko se'em laa? Aai. La dagɛ bala. 25Bii ya yehe te ya ta behɛ la bem? Ya yehe te ya behɛ la boraa n dekɛ dansigihe bagɛ a mea? Aai, dagɛ bala. Sɛba n ane bala boe la tarega zen'an ge bɔna nadoma yɛ' poan. 26Ge ya yehe te ya ta nyɛ' la bem? Ya yehe te ya ta nyɛ' la nɔtɔgɔha? Ɛɛn, la dela bala. Ge Yon gane bala. 27La dela Yon yele te ba golehɛ te, Behe ya, n wan tom n bitonoŋa te ka bɔna ho nɛŋa maala sore biŋera hɔ. 28N yete ya mɛ te nɛra se'em ka boe te ba dɔgɛ en teŋa wa zuo te a gana Yon. Ge bala zan'an nɛra se'em n ane wo bia Na'ayenɛ Sɔ'ɔlom la poan gane Yon. 29Nɛreba la woo ge la koba tɔ'ɔhɔba la n wom dena wa la, ba me sakɛ te Na'ayenɛ dela yelemɛŋɛrɛdaana. Dena wa zuo te Yon pon daa bo ba ko'om soa. 30Ge Pariseedoma la la pa'alegɔ pa'aleba la daa zagahɛ Na'ayenɛ n bote ba eŋɛ sɛla mɛ. Te dena mea zuo te ba daa ka bahɛ te Yon bo ba ko'om soa. 31Ge Yesu daa le yeti, Nɛrebana taaba n de nanana nɛreba wa. Sɛla woo te ho eta, ba ka bote de. 32Ba an me wo kɔma n zin' da'a poan de'ena ge yi'ira yɛta taaba te, Ya wom te to pɛɛbera taletehe ge te ya ka wa'ara. Ya le nyɛ' te to sunya sagom, ge te ya ka kɛla. 33Bala mea n bala te Yon Ko'sɔɔra la n wa'ana la, a ka dite boom, ka nyuura daam. Te dena mea zuo, te ya yeti, A dela zɔlɔgɔ. 34Te Asaala Dayɔa nya wa'ana dita ge nyuura te ya le yeti, To ka bote en. A dela ponyan'andaana ge dɛna daamnyuura. A zɔdoma me le de'a la koba tɔ'ɔhɔba la yelebe'erodoma. 35Ge bala zan'an, nɛreba mi' te se'em n de zuodaana de nɛresoŋɔ yɛhera la sɛba n dole en la han dɛna nɛresoma. 36Te Parisee ayema se'em yu'urɛ n daa de Simon la daa yi' Yesu te a wa di' la en a yire. Bala te a daa keŋɛ Simon yire la poan ta zin'ire te ba di'. 37Ge bala ma'an la, pɔka n daa boe teŋa la poan te nɛra woo mina en te a dela be'em daana. Te pɔka wa n daa wom te Yesu boe la Parisee yire wa dita la, ge te a daa tare kaam n tare nyuŋo soŋɔ la dugula me'en keŋɛ bini. 38N daa paɛ la, a daa keŋɛ ta ze'ele la Yesu natala bɔba kɛla te a nintam la daa pin'ilom zɔngɛra Yesu natala la zuo. N daa eŋɛ bala la, a nya daa dɔnbelɛ la teŋa dekɛ a zonto la n wɔgɛ la duuhe natala la ge nya ka'ɛ kaam la sɔn' natala la. 39Te Parisee se'em n yi' Yesu a yire la n nyɛ' pɔka la n eŋɛ se'em la, a tɔgɔre a suunren te, Boraa kana wa han dene la nɔtɔgɔha la, a wan pon baŋɛ ne te pɔka wa n kalom en wa dela be'emdaana. 40Te Yesu n baŋɛ Simon n yele se'em la, a daa yeti, Simon, n tare la makerɛ te n makɛ bo ho. Te Simon lebehe yeti, Pa'ala, de dela dene? 41Te a yele en yeti, Nɛra ayema n peŋe a ligiri bo nɛreba bayi'. A peŋe ayema la sanlenpeela kpila kɔbehe senuu ge peŋe ayema la me sanlenpeela kpila pihinuu. 42Te nɛreba bayi' la n ka nyaŋɛ lebehe sanɛ la, nɛra la bahɛ bo ba zan'an. Dene poan, bama bayi' la, ane n wan nɔŋɛ nɛra la gana? 43Te Simon lebehe yeti, Mam tɛn'ɛhɛ te se'emdaana n peŋe kekeko la te a bahɛ bo la. Te Yesu yeti, Ho lebehe la ma'an. 44Te a daa ŋmɛregɛ pɔka la zen'en ge yele Simon te, Behɛ pɔka wa. Mam kɛn' ho yire wa poan na wa, ho ka bahɛ te ba bo mam ko'om te n paɛ n natala wo to teŋa la etegɔ la. Ge pɔka wa dekɛ la a nintam pee n natala ge dekɛ a zonto duuhe ba. 45Ho ka bo ma zaarɛ ge pɔka wa kɔ'ɔn dɔnbelɛ la teŋa bɔ'ɔra ma la zaarɛ. 46Ho ka dekɛ kaam sɔn' n zuo wo to teŋa la etegɔ la ge pɔka wa dekɛ kaam mɛ sɔn' n natala. 47Bala, n yete ho mɛ te Na'ayenɛ bahɛ a yelebe'ero la n zo'e se'em la bo en. Bala n sɔe te a nɔŋɛ mam la. Ge hon se'em te Na'ayenɛ bahɛ ho yelebe'ero fiin wa bo ho, hon daana me ka tare nɔŋerɛ bo en. 48Te a nya yele pɔka la te, Na'ayenɛ bahɛ ho yelebe'ero la bo ho. 49Te sɛba n lagom dita la en la yɛta taaba te, Ane me n de ena wa me bahera nɛreba yelebe'ero bɔ'ɔra ba? 50Ge Yesu yele pɔka la yeti, Na'ayenɛ fan' ho bahɛ la hon nam mam la zuo. Bala keŋɛ la sunma'ahom.

will be added

X\