Aluki 6

1Ge Yesu daa wa doohe la ki' va'am dɔla Vo'ohogo Daarɛ, te a dɔlɔba la daa pin'ilom kɔ'ɔra ki' la ŋmɛna ɔbera. 2Te ban ete bala la, Pariseedoma la daa yele ba yeti, Wane te ya eta sɛla te Pa'alegɔ la yete ho kan ta'an eŋɛ Vo'ohogo Daarɛ? 3Te Yesu lebehe yele ba yeti, Ya ka kaanlɛ yɛhera David la a nɛreba kom yuun done te a yuun eŋɛ se'em laa? 4Ba kom n yuun done bala la, a yuun kɛn' Yenɛ yire la poan mɛ ta dekɛ toolom boroboro sebo te ba dekɛ bo Na'ayenɛ obe ge tare na bo a nɛreba la. Ge bala poan to kiha la yuun ka bo sore te nɛra se'em obe de han dagana la malemadaana la ma'an. 5Yesu yele ba yeti, Asaala Dayɔa n de Vo'ohogo Daarɛ Daana. 6Te Vo'ohogo Daarɛ deyema te Yesu daa keŋɛ zamehegɔ yire la poan ta pa'alɛ. Bilam te a daa nyɛ' boraa ta a zuɔ nu'o nyure ge ka tana tɛnra. 7Ge pa'alegɔ pa'aleba la, la Pariseedoma la daa kɔ'ɔn ɛɛra sɔrɔɔ seko te ba wan ta'an yete a tue ya. Bala te ba daa kɔ'ɔn ma'ɛn ba mɛhe behera nya a wan tebɛ Vo'ohogo Daarɛ bii a kan tebɛ. 8Ge Yesu baŋɛ ban tɛn'ɛhere se'em la, ge yele boraa sɛka nu'o n nyure la te, Ihege saazuo la ho tole n nɛŋa kalam na. Te a ihege tole ha ta ze'a. 9Te Yesu yele ba yeti, N soke ya mɛ, te Pa'alegɔ la yele to te to eta la bem Vo'ohogo Daarɛ? Te to soŋɛ bii to sagom? Bii to fan' nɛreba bahɛ bii to sagom ba? 10Te Yesu n yele wan wa ba'ahɛ la, a behɛ ba zan'an mɛ kae ge yele boraa la yeti, Tɛɛn ho nu'o la. Te boraa la tɛɛn te a nu'o la ka le nyure yɛ'ɛha. 11Ge nɛreba la n nyɛ' wana wa la, ba sunsunya nyie mɛ te ba pin'ilom sɔnhera bɔ'ɔra taaba ban wan eŋɛ Yesu se'em. 12Ge bala ma'an la te Yesu daa zom la zoore zuo ha te a ta sohɛ Yenɛ, ge kɔ'ɔn bɔna la bini ha yu'uŋɔ zan'an soha Yenɛ. 13Ge te beere n ta yelegɛ la, Yesu yi' a dɔlɔba la mɛ na. N yi' ba la, a loe la nɛreba pia la bayi' ba poan. Yesu yi'ire nɛreba pia la bayi' wa la a tontoneba. 14Ge sɛba te a loe la dela Simon se'em te a daa yi'ira en Peter la la a yebega Andrew, la Yames, la Yon la Filip, la Bartolomu, 15la Matu, la Tomas, la Alpaeus dayɔa Yames, la Simon se'em n tɔgɔre te a to'e Yudoma teŋa teŋa a bahɛ la, 16la Yames dayɔa Yudas, la Yudas Iskariot se'em n wan ŋma' Yesu la. 17Ge Yesu n nya daa ta ze'ele zoore la zuo sige na la na, a wa ze'ele la peelom poan Yesu la a dɔlɔba la kekeko. Ge nɛrekooŋɔ ze'ele Yudea teŋa bɔbɔre woo, la Yerusalem teŋa la Tire, la Sidon teŋse'ehe n boe lɛm mɔgɔrɛ la te ba kelehe la Yesu ge te a tebɛ ba ban'ahe. 18Ge te sɛba te bonbɛ'ɛhe tona la daa lagom wa'an me na te a tebɛ ba te ba eŋɛ som. 19Ge te nɛreba la woo zegera te ba kalom Yesu. Se'ere n sɔe la, a tare Na'ayenɛ paŋa te a tebɛ ba zan'an. 20Depooren te Yesu daa ta behɛ a dɔlɔba la ge yele ba yeti, Popeelom boe la yamam sɛba n de nahadoma wa, te Na'ayenɛ Sɔ'ɔlom la dela ya denɛ. 21Popeelom boe la yamam sɛba kom n done nananawa, te ya wan tegɛ. Popeelom boe la yamam sɛba n kele nananawa, te ya wan la'. 22Popeelom boe la yamam sɛba te nɛreba yaɛ ya ge zagaha ya ge toora ya ge sagona ya yuya la, yan dole Asaala Dayɔa la zuo la. 23Ge yele ana han eŋɛ ya, tara sunpeelom ge kerene ya la popeelom. Se'ere n sɔe la, Na'ayenɛ tare bo'olom mɛ a zen'en gura ya. Ge sɛba n ete ya bala la sɔyaabdoma yuun eŋɛ la dena mea bo nɔtɔgɔheba la. 24Ge sunsagaŋɔ wan bɔna yamam sɛba n de bontateba nananawa, te ya pon diŋɛ nyɛ' ya bɔŋsoŋa. 25Sunsagaŋɔ boe yamam sɛba n tegɛ nananawa, te kom wan nyɔkɛ ya. Sunsagaŋɔ boe yamam sɛba n la'are nananawa, te ya wan fabelɛ ge kele. 26Ge sunsagaŋɔ boe yamam sɛba te nɛreba tɔgɔra te ya yɛla an soŋa. Se'ere n sɔe la, ba sɔyaabdoma yuun eŋɛ la denɛ mea bo sɛba n yuun pan'ahɛ ba mɛhe te bama dela nɔtɔgɔheba ge dagɛna la. 27Ge n yete yamam sɛba n kelehere ma wa te ya nɔŋɛ ya diŋdoma ge eta sɛla n an soŋa bɔ'ɔra sɛba n yaɛ ya. 28Ge kan' ya kan'somɔ bo se'emdaana n kan' kan' be'em bo ya, ge me sohore ya Yenɛ bo'ore ya sɛbadoma n toore ya. 29Te se'em han lobe ho sapɛnka, lebege deyema la me bo en te a lobe pa'ahɛ. Ge te se'em me han dekɛ la ho banaa te ho yɛ' bahɛ yeŋa la, kɔ'ɔn me bahɛ te a dekɛ la dansisɛka te ho yɛ' bahɛ poan la. 30Bo'ore ya nɛra se'em woo n sohɛ ya sɛla ge te se'em me han dekɛ sɛla n de ho denɛ, da kɔ'ɔn yele en te, Tare n bonɔ na. 31Ge ete ya sɛla te ya mɛhe bɔta te nɛreba eta bɔ'ɔra ya la me bɔ'ɔra ba. 32Te yamam han nɔŋɛ la nɛresɛba ma'an n nɔŋɛ ya la, la wan eŋɛ la wane te ya ta'an nyɛ' kan'somɔ de poan? Ge yelebe'erodoma nɔŋɛ sɛba n nɔŋɛ ba mɛ. 33Ge te ya me han le eta la sɛla n an soŋa bɔ'ɔra la sɛba ma'an n ete sɛla n an soŋa bɔ'ɔra ya la, la wan eŋɛ la wane te ya ta'an nyɛ' kan'somɔ? Ge yelebe'erodoma ete bala mɛ. 34Ge te ya me han pengera la sɛba ma'an te ya tara ya potɛn'ya poan gura te ba wan lebehe bo ya, la wan eŋɛ la wane te ya ta'an nyɛ' kan'somɔ? Ge yelebe'erodoma pemehe yelebe'erodoma ge gura te ba lebehe denɛ mea bo ba. 35Ge ton nɔŋɛ ya ya diŋdoma ge ete ya sɛla n an soŋa bɔ'ɔra ba. Ge peŋegere ya ba ge da gure ya te ba lebehe bo ya. Te Na'ayenɛ wan yɔ' ge te ya me wan de'a Na'ayenɛ se'em n gane zan'an la dayɔɔhe. Te Na'ayenɛ ete sɛla n an soŋa bɔ'ɔra potɔpa la nɛresɛba n ka mi' ba yeti, N po'ohe ya. 36Zote ya nɛreba ninbɔn'ɔn wo ya Sɔ' Na'ayenɛ n zote ya ninbɔn'ɔn se'em la. 37Da gankɛ ya nɛreba te Yenɛ me da gankɛ ya. Da yele ya te nɛre'ena ka tare boorɔ, te Yenɛ me da eŋɛ bala mea bo ya. Ge me dite ya suguru bɔ'ɔra taaba te Yenɛ me bahɛ ya be'em bo ya. 38Ge bo'ore ya nɛreba, te Yenɛ me bo ya, te la sekɛ te ho ɔnbelɛ nyɔ'ɔn, te la perɛ din'inhe yabera. Hon magahe se'em bo la, bala mea n lebehe bɔ'ɔra hɔ. 39Ge Yesu nya daa makɛ la makɛ dena wa bo ba yɛhera sɛla te a yele la. A yeti, Nɛra han de'a fɔa, a kan nyaŋɛ data se'em me n de fɔa. A han data, ba bayi' la zan'an wan lagom lu' boko poan. 40Ge nɛra se'em n zamehere ka gane se'em n pa'alɛ en la. Ge nɛra se'em woo n zamehere han ta ba'ahɛ a zamehegɔ la, a nya ane me wo se'em n pa'alɛ en la. 41Ge ho han gankɛ ho tadaana la ane me wo nɛra se'em n behere sɔgɔpika a tadaana niho poan ge ka mina te sɔgɔseko n gane bala boe a mɛŋa niho poan la. 42Ge te la nya wan eŋɛ la wane te a yele a tadaana yeti, N zɔ', eŋɛ te n dekɛ sɔkɔ wa ho niho wa poan, ge ka tɛn'ɛha a mea denɛ la. Bala, birikɔgɔdoma wa, ton dekɛ ya sɔgɔkanra la ya mɛhe nini la bahɛ ge ta'an nya dekɛ sɔgɔbibihe la ya taaba nini la bahɛ. 43Nɛreba ta'an di' sɛla te tiihe sese'ehe wɔna. Ge te nɛreba me kan ta'an di' sɛla te tiihe sese'ehe me wɔna. 44Te tia n wone sɛla la te ho baŋera n de tisɛka buuri. To ka pin'inhere kenkama gɔn'ɔhe poan bii gɛn tontuuro poan. 45Bala, nɛra se'em n de nɛresoŋɔ ete la yelese'a n ane soŋa la n de nɛresoŋɔ la zuo. Ge te nɛra se'em n dagɛ nɛresoŋɔ me ete la yelese'a n ka ane soŋa la n dagɛ nɛresoŋɔ la zuo. Dene poan nɛresaala tɔgɔre la sɛla n boe a suunre poan. 46Depooren, wane te ya wan yi'ira mam te, N Daana, n Daana, ge ka eta sɛla te ma yɛta ya? 47Ge bahɛ ya te n pa'alɛ ya nɛra se'em n wa'an ma zen'en na ge kelehe n yetɔgom ge nana a n an se'em. 48A ane me wo boraa n daa bote a mɛ' a yire ge tun' ɛnberɛ ta paɛ tanhe ge nya mɛ' dɛ la. Ge te n mɛ' dɛ ge te kolaa daa kɔ' te ko'om ue la, de daa ka ta'an lu'. Se'ere n sɔe la, a mɛ' dɛ la soŋa soŋa. 49Ge nɛra se'em n wom mam yetɔgom ge ka nana a ane me wo boraa sɛka n ka tun' ɛnberɛ ge kɔ'ɔn mɛ' a yire teŋpo'orɛ zuo la. Te kolaa n kɔ' te ko'om ue dɛ la, bilam bilam te de zan'an kɔ'ɔn lu'. Yire la zan'an sagom mɛ.

will be added

X\