Aluki 3

1Ge Tiberius n daa de nakantɛ ta paɛ yuun pia la anuu poan la, bala ma'an te Pontius Pilate me de'a Yudea teŋbehera, te Herod de'a Galilee teŋbehera, ge te a sɔɔn Filip me de'a Ituraea la Trakonitis teŋhe nɛŋadaana. Lisanias me n sɔe Abilene teŋa behera, 2ge te Annas la Kaiapas me dɛna malema nɛŋadoma. Te la de'a la bala ma'an te Na'ayenɛ daa tɔgɛ bo Zekaria dayɔa Yon pɔgɔtia la ha. 3Bala te Yon daa keŋɛ teŋse'ehe n boe lɛm Yordan Kolaa la mɔɔla bɔ'ɔra nɛreba te ba tee ba potɛn'ɛra ge to'e ko'om soa ge te Na'ayenɛ bahɛ ba yelebe'ero bo ba. 4Wo yuuma yuuma te Na'ayenɛ nɔtɔgɔha Isaiah yuun golehɛ a gɔŋɔ la poan yele se'em la. A yuun yeti, Nɛra konkore n vole bɔ'ɔra nɛreba pɔgɔtia ha, Nɛra n mɔɔle yeti, Maalɛ sore pɔgɔtia la poan te de gan'an tontɔɔ bo to Na'ayenɛ la. 5Bahɛ te boko woo palehɛ, te zoore la zobila woo sirige. Palehɛ bɔgɔrɔ woo, te zen'ɛrema lebe saalom. 6Te nɛra woo nyɛ' Na'ayenɛ faanre la. 7Te Yon n daa yele wana wa la, nɛrekooŋɔ daa yehe wa'an a zen'en na te a bo ba ko'om soa. Te ban wa'an na la, a yele ba yeti, Bonsɛ'doma kɔma wa, ane n yele ya te ya wan ta'an le'ehɛ namehe seko te Na'ayenɛ yeti a bahɛ te la wa'ana la? 8Eŋɛ ya sɛla pa'alɛ te ya tee ya potɛn'ɛra, ge da tɛn'ɛhɛ ya te Abraham n de ya sɔyaaba. Se'ere n sɔe la, Na'ayenɛ ta'an dekɛ kuga wa eŋɛ ba te ba lɛbege Abraham yaahe. 9Lea maahom mɛ gan' gura te ka ŋma' tiihe nyɛga. Tiihe se'ehe woo n ka wom di soŋa, ba wan ŋma' ka bahɛ bugum poan. 10Te Yon n daa yele wana wa ba'ahɛ la, nɛrekooŋɔ la daa soke en yeti, Bala, to wan eŋɛ la wane ta'an le'ehɛ namehegɔ wa? 11Te a lebehe yele ba yeti, Hon se'em n tare futo toyi' sontii ho loe koyema bo nɛra se'em n kɔ'ɔn ka tare la koyena me. Ge hon se'em me n tare dia sontii ho eŋɛ dɛ bala mea. 12Ge te koba tɔ'ɔhɔba basɛba n daa wa'ana te ba to'e ko'om soa la, ba soke Yon yeti, Pa'ala to wan eŋɛ la wane? 13Te a lebehe yele ba yeti, Da to'ohe ya nɛreba koba gana lan sontii ya tɔ'ɔha se'em la. 14Ge te pɛɛntɛɛnreba me soke en yeti, Ge tomam me wan eŋɛ la wane? Ta le lebehe bama me te, Da pɛnrege ya nɛreba tɔ'ɔha ligiri bii ya parom bo se'em te a eŋɛ yele ge te a ka eŋɛ. Ge da bote ya gana ya yɔɔrɛ. 15Te nɛreba la n daa wom Yon n tɔgɛ se'em la, ba tɛn'ɛhe te nɛra se'em te ba gura la wa'an me na ge te daanse'ere Yon n de Se'em Te Yenɛ Loe la. 16Mam bo ya ko'om soa la ko'om poan wa. Ge se'em te mam bɔna a pooren la kene na. Mam pɔ'ɛ n pirege a tagara. Se'ere n sɔe la, enŋa n gane mam. Enŋa n yete a bo ya Yenɛ Sea la bii a namehe ya ya yelebe'ero zuo. 17A tare a wanzagahe te a yeele dia la te ba tɔ la. A wan yeele uto la nyɔ' ba bugum sebo n ka kiŋire poan ge dekɛ dia la sun' a baanrɛ poan. 18Ge te Yon daa mɔɔlɛ Na'ayenɛ Yelesoma wo n ne pon eta se'em la. 19Ge Yon yele Naba Herod te la dagɛ ma'an yɛhera a yebega pɔga Herodias te a di', la n tom toonbe'ero zo'e zo'e la. 20Bala te Herod sunsunya nyie te a malom ton sɛla n gane bala nyɔkɛ Yon eŋɛ pakadeen la. 21Ge ban daa nan ka nyɔkɛ Yon eŋɛ pakadeen la, ge te a bo nɛreba la woo ko'om soa la, Yesu me to'e ko'om soa mɛ. N ta to'e ko'om soa la ba'ahɛ ge sohɛ Yenɛ, bilam bilam te saŋgbanɛ saazuo daa yo'ɛ 22te Yenɛ Sea ana wo dayene sige Yesu zen'en na. Te konkore yele na yeti, Hom n de mam dayɔba'arɛ te n nini tegɛ. Bala n tare popeelom la hɔ. 23Ge Yesu daa de yuun pihitan' ge pin'ilom a tooma tona. Ge nɛreba dekɛ en te a de'a la Yosef dayɔa, ge te Yosef me de'a Heli dayɔa, te Heli de'a 24Mattat dayɔa, te Mattat de'a Levi dayɔa, te Levi de'a Melki dayɔa, te Melki de'a Yanai dayɔa, te Yanai de'a Yosef ayema me dayɔa, te Yosef 25de'a Matatias dayɔa, te Matatias de'a Amos dayɔa, te Amos de'a Nahum dayɔa, te Nahum de'a Esli dayɔa, te Esli de'a Nagai dayɔa, te Nagai 26de'a Maat dayɔa, te Maat de'a Matatias ayema me dayɔa, te Matatias de'a Semein dayɔa, te Semein de'a Yosek dayɔa, te Yosek de'a Yoda dayɔa, te Yoda 27de'a Yoanan dayɔa, te Yoanan de'a Aresa dayɔa, te Aresa de'a Zerubabel dayɔa, te Zerubabel de'a Sealtiel dayɔa, te Sealtiel de'a Neri dayɔa, te Neri 28de'a Melki ayema me dayɔa, te Melki de'a Adi dayɔa, te Adi de'a Kosam dayɔa, te Kosam de'a Elmadam dayɔa, te Elmadam de'a Er dayɔa, te Er 29de'a Yosua dayɔa, te Yosua de'a Eliezer dayɔa, te Eliezer de'a Yorim dayɔa, te Yorim de'a Mattat ayema me dayɔa, te Mattat de'a Levi ayema me dayɔa, te Levi 30de'a Simeon dayɔa, te Simeon de'a Yuda dayɔa, te Yuda de'a Yosef ayema me ha dayɔa, te Yosef de'a Yonam dayɔa, te Yonam de'a Eliakim dayɔa, te Eliakim 31de'a Melea dayɔa, te Melea de'a Mena dayɔa, te Mena de'a Matata dayɔa, te Matata de'a Natan dayɔa, te Natan de'a David dayɔa, te David 32de'a Yesse dayɔa, te Yesse de'a Obed dayɔa, te Obed de'a Boaz dayɔa, te Boaz de'a Salmon dayɔa, te Salmon de'a Nason dayɔa, te Nason 33de'a Aminadab dayɔa, te Aminadab de'a Admin dayɔa, te Admin de'a Arni dayɔa, te Arni de'a Hezron dayɔa, te Hezron de'a Perez dayɔa, te Perez de'a Yuda ayema me dayɔa, te Yuda 34de'a Yakob dayɔa, te Yakob de'a Isaak dayɔa, te Isaak de'a Abraham dayɔa, te Abraham de'a Tera dayɔa, te Tera de'a Nahor dayɔa, te Nahor 35de'a Serug dayɔa, te Serug de'a Areu dayɔa, te Areu de'a Pelege dayɔa, te Pelege de'a Eber dayɔa, te Eber de'a Sela dayɔa, te Sela 36de'a Kainan dayɔa, te Kainan de'a Arpaksad dayɔa, te Arpaksad de'a Sem dayɔa, te Sem de'a Noah dayɔa, te Noah de'a Lamek dayɔa, te Lamek 37de'a Metusela dayɔa, te Metusela de'a Enok dayɔa, te Enok de'a Yared dayɔa, te Yared de'a Mahalalel dayɔa, te Mahalalel de'a Kainan ayema me dayɔa, te Kainan 38de'a Enos dayɔa, te Enos de'a Set dayɔa, te Set de'a Adam dayɔa, te Adam me nya de'a Yenɛ dayɔa.

will be added

X\