Aluki 22

1Ge daanse'ere daarɛ te ba ne de'ena Boroboro N Ka Tare Mi'ihom De'eŋɔ la dabaherɛ la daa pɔnrɛ mɛ. Ba yi'ire de'eŋ kona wa la Azootole De'eŋɔ. 2Lan daa pɔnrɛ la, malema keema la pa'alegɔ pa'aleba la eere la sɔrɔɔ seko te ba wan ta'an ko' Yesu. Ge ba ka bote ba eŋɛ dɛ gbiri gbiri. Se'ere n sɔe la, dabeem n tare ba la nɛreba la. 3Depooren te Dima daa pin'ilom tona la Yudas se'em te ba yi'ira Iskariot la se'em n lagom de'a la sɛba te Yesu dɔlɔba la pia la bayi' la poan ayema. 4Bala te a keŋɛ ta nyɛ' malema keema la guruba la yɛhera Yesu yele. A daa yele ba la en wan eŋɛ se'em ta'an ŋma' Yesu bo ba. 5En daa yele ba la, la eŋɛ ba sunya nyɛlom te ba yeti ban wan bo ligiri. 6Te a sakɛ, ge nya pin'ilom ɛɛra sɔrɔɔ seko te a wan ta'an ŋma' en bo ba. A bote a eŋɛ dena wa ge te nɛreba la ka mina de yele. 7Daanse'ere daarɛ te ba ne de'ena Boroboro N Ka Tare Mi'ihom De'eŋɔ la daa paɛ mɛ. Bala te nɛreba daa tare ba Azootole pebila na te ba ko' dɔgɛ dia. 8Depooren te Yesu tom Peter la Yon yele ba yeti, Keŋɛ ya ta maahom Azootole De'eŋɔ dia te to di'. 9Te ba soke en te, Bɛha to ho bɔta tɔ te to maahom dia la? 10Te a lebehe yeti, Behɛ ya, ya han ta kɛn'ɛra teŋa la poan, ya wan nyɛ' te boraa ta ziira kɔ'ɔn to'ohɛ ya. Ya han nyɛ' en bala, doohe ya en kɛn' yire se'ere ta a yete a kɛn' la. 11Ya han doohe en kɛn' bala, yele ya yire la daana te, Pa'ala la yete ho na te deo kone te enŋa Yesu la a dɔlɔba la yete ba di' Azootole De'eŋɔ dia la? 12Ya han yele en bala, a wan pa'alɛ ya deo kantɛ te ho lɔ'ɔha kora paara kɔ. Sɛla woo bo bini mɛ soŋa soŋa. Bilam te ya wan maahom dia la. 13Te ban keŋɛ la, ba nyɛ' la sɛla te a yele ba te ba wan nyɛ' la. Bala te ba maahom Azootole De'eŋɔ dia la. 14Te se'em ma'an te ba wan di' la n daa paɛ la, Yesu la a dɔlɔba la paɛ zin'ire ba zen'enhen. 15Ban zin' la, a yele ba te, La daa boe n suunre poan te n lagom di' la ya dikana wa ge baŋɛ nyɛ' n namehegɔ. 16Te n yete ya mɛ, te n kan le malom di' dikana wa taaba yɛ'ɛha han dagana la de vɔnrɛ n de se'ere la n seren ta de'a bala daanse'ere daarɛ te Na'ayenɛ ta yete a sɔna behera la. 17Ban nya bo en la wanɛ la daam, a to'e la ge bo Na'ayenɛ fara ge yele ba te, To'e ya nyu' sohom. 18Te n yete ya mɛ te n kan le malom nyu' daambona wa yɛ'ɛha, han dagana la Na'ayenɛ Sɔ'ɔlom n ta wa'an teŋa wa zuo na. 19A me le dekɛ la boroboro bo Na'ayenɛ fara ge gɛn'ɛnhɛ bo ba me ge yele ba te, Dena wa an wo n iŋa la te n bɔ'ɔra ya te n sɔe ki' ya zuo. Bala, eta dɛ la ya tɛnra n yele. 20Te a daa le dekɛ la wanɛ la daam bo ba wo n pon eŋɛ ne se'em la. N daa bo ba la, a daa yele ba te, Dena wa ane wo n ziim la ka'ara bɔ'ɔra ya. Ziim bona wa n de Na'ayenɛ nɔbiŋere paalɛ bɔ'ɔra nɛreba pa'ala te ba kan malom ki'. 21Ge kelehe ya te se'em n yete a ŋma' mam la bo kalam lagom dita la tɔ. 22Asaala Dayɔa yete n ki' mɛ wo Na'ayenɛ n bote se'em la. Ge Na'ayenɛ wan namehɛ se'emdaana n yete a ŋma' mam la. 23Depooren te ba pin'ilom gangara la taaba se'em ba poan n yete a eŋɛ dena wa. 24Ba me daa wa ŋmɛ'ɛra la nɔkpe'ene yɛhera ba se'em n gane ba zan'an. 25Bala te Yesu yele ba te, Nadoma sɛba n dagɛ Yudoma bote ba nɛreba na'aha ba, ge te nɛreba me yete sɛba n sɔe ba behera la dela nɛresondoma. 26Ge, dena wa dagɛ boyena la yamam tooma. Yamam denɛ n ton de'a se'em dela se'em n gane zan'an ya poan, sontii a dekɛ a mea an wo enŋa n de ya yebega la. Se'em n de ya zuodaana sontii a ana wo ya yameŋa la. 27Bala, ane n gane? Se'em n zin' dita la bii se'em n tone bɔ'ɔra en la? Se'em n zin' dita la n gane. Ge mam boe la ya wo se'em n tone bɔ'ɔra nɛreba la. 28Ge bala zan'an ya daa kɔ'ɔn bɔna mɛ la ma bala mam n daa nyɛ' namehe seto woo la. 29Bala, magahɛ wo n Sɔ' Na'ayenɛ n bo mam sore te n sɔna behera a Sɔ'ɔlom se'em la, bala me te mam la yamam wan sɔna behera. 30Ya wa zin'ire zen'an te n sɔna behera la te mam la yamam lagom dita ge nyuura. Ge ya wan ta zin'an na'am gɔŋɔ poan gankera sɛba woo n de Israel teŋa yizuto pia la toyi' la poan la. 31Yesu kelom yeti, Simon! Mina te Dima sohɛ sore Na'ayenɛ zen'en te a yelege ya wo pɔka n yeele a ki yelegera ki uto poan. 32Ge mam sohɛ Na'ayenɛ bɔ'ɔra hɔ te ho kan lu' zan'an zan'an. Bala hon lebe mam zen'en na, soŋɛ ho sɔɔnrɔ la te ba sɛ' ze'ele soŋa soŋa mam sore la poan. 33Simon Peter lebehe yeti, To Daana, ba han tara ho yɛ'a te ba pagɛ mɛ bii ba ko' hɔ, mam maahom te ba lagom eŋɛ mam bala la hɔ! 34Yesu lebehe en te, N yete ho mɛ te han dagana la ho ta ki'ehɛ mam mɛ sugumnɔɔren botan', nɔdɔɔ kan kaahɛ zina. 35A nya yele la ba zan'an te, Mam n daa tom ya la, n daa yele ya te ya da sun' ligiri, bii ya tara tapɔtɔ, bii tagara. Bala yan daa keŋɛ ge ka tara lana wa woo la, sɛla daa boe te ya bɔta ge koŋe? Te ba lebehe yeti, Aai, to daa ka koŋe sɛla. 36Te a le yele ba te, Ge nananawa, hon se'em n tare ligiri, bii tapɔɔ sontii ho dekɛ la. Ge te hon se'em me n ka tare sukɔbegɔ sontii ho koohe ho fuo da' ayema. 37Te n yete ya mɛ, te Yenɛ gɔŋɔ la te ba golehɛ yɛta se'em la kɔ'ɔn de'a la bala. Ba golehɛ te, Ba kaanlɛ en pa'ahe la tobekperegadoma poan, Ge nananawa, sɛla te ba golehɛ yɛhera mam yele kɔ'ɔn yete la de'a la bala. 38Bala te ba lebehe yele en te, To Daana, sukɔbɔrɔ toyi' boe to zen'en kalam nananawa. Te a yele ba yeti, Bala seke ya. 39Yesu yehe teŋa la poan la, a lebe la Olive Zoore la wo n ne pon eta se'em la. Ge a dɔlɔba la lagom doohe en mɛ. 40Ban paɛ bini la, a yele ba yeti, Sohɛ ya Na'ayenɛ te Dima la da bahɛ ya te ya bɔta te ya tom be'em. 41A nya daa vuruge la fiin ha ba zen'en dɔnbelɛ teŋa, sohɛ Na'ayenɛ te, 42N Sɔ', ho han sakɛ da bahɛ te n nyɛ' namehe kona wa. Ge la dagɛ la mam n bote se'em te mam yɛta hɔ te ho eŋɛ. Ho eŋɛ ho sunboolom n de se'em. 43Bilam te Na'ayenɛ soŋora daa ze'ele saazuo wa'an a zen'en na bo en paŋa. 44Te en kelom sohora la daa daane en sɛla n wan eŋɛ. Te a malom sohɛ gana n po'ohɛ ne se'em la. Ge a murugere yehe mɛ tɔgɔhe teŋa wo ziim n ton tɔgɔha la. 45Te en sohɛ ba'ahɛ ge lebena la, a nyɛ' te a dɔlɔba la ginhe mɛ. Se'ere n sɔe la, ba suunre sagom te ba taregɛ. 46Te a yele ba te, Wane te ya ginha bala? Ihege ya la ya sohɛ Na'ayenɛ te Dima la da bahɛ ya te ya bɔta te ya tom be'em. 47A kelom tɔgɔra mɛ ge te nɛrekooŋɔ daa paara na. Yudas se'em n daa lagom de'a a dɔlɔba pia la bayi' la poan ayema la n bo nɛŋa te ba dɔla. En paɛ Yesu zen'en po'ohɛ en. 48Ge Yesu yeti, Yudas, ho yete ho po'ohɛ Asaala Dayɔa bala la ho ta'an ŋma' mam? 49A dɔlɔba la n boe la en ge nyɛ' sɛla ete la, ba yele en te, To Daana, to dekɛ to sukɔbɔrɔ la kɛ' ba? 50Ba ayema nya pon dekɛ a sukɔbegɔ kɛ' malema nɛŋadaana la yameŋa zuɔ toberɛ bahɛ. 51Ge Yesu yeti, Bala seke ya! Te a paɛ kalom yameŋa la toberɛ tebɛ en. 52Yesu nya yele la malema keendoma la Yenɛ Yire guruba la zuodoma la n wana te ba nyɔkɛ en la te, N dela nayiga te ya kena na ge zera sukɔbɔrɔ la danbama? 53Mam daa bo la ya ya Yenɛ Yire la poan daarɛ woo ge te ya pon ka nyɔkɛ mam. Ge zina dabaherɛ wa dela ya dabaherɛ te ya tom. Se'ere n sɔe la, Dima se'em n tone lika poan la n tare a paŋa sɔna behera. 54Ba nya daa nyɔkɛ en mɛ tare en keŋɛ malema nɛŋadaana la yire. Peter yee la pooren dɔla ba. 55Nɛreba me n toorɛ bugum yire la poan zenzakan zin'an ɔɔha te Peter lagom paɛ zin'an ɔɔha. 56Te pɔgɔsɔɔrɔ la ayema n nyɛ' te Peter lagom zin'an ɔɔha la, a behɛ en ziin ge yeti, Boraa kana wa daa lagom bɔna mɛ la Yesu. 57Ge Peter ki'ehe mɛ te, Pugula wa, mam pon ka mina en. 58La ka yuue te boraa kayema me baŋɛ Peter ge yeti, Ho lagom dɛna la Yesu nɛreba la ayema. Ge Peter lebehe yeti, N zɔ' wa, mam dagɛ a nɛreba la ayema. 59La ka le ba' yuue te boraa kayema me yele kpe'eŋkpe'eŋo te, La kɔ'ɔn de'a la yelemɛŋɛrɛ te boraa kana wa daa lagom bɔna mɛ la en. Se'ere n sɔe la, enŋa me dela Galilee teŋa nɛra wo Yesu n de se'em la. 60Ge Peter le lebehe yeti, N zɔ' wa, mam pon ka mi' yan tɔgɛ sɛla wa. Ge Peter n tɔgɔre bala la, nɔdɔɔ kaahɛ mɛ. 61Bilam te to Daana Yesu ŋmɛregɛ behɛ Peter ziin. Depooren te Peter tɛɛn to Daana Yesu n daa yele en se'em la. A daa yele en te, Ho wan ki'ehɛ te hon ka mi' mam sugumnɔɔren botan' ge te nɔdɔɔ baŋɛ kaahɛ zina. 62Bala, te a yehe yeŋa ta kele. 63Ge nɛresɛba n daa gure Yesu la kɛɛte en mɛ ge ŋmɛ'ɛra en. 64Ba pin' a nini ge yele te, Bokɛ ane n ŋmɛ' hɔ? 65Ba me tɔgɛ en la yetɔgɔbe'ero yema yema bo en. 66Te yiimbeere la, zuodoma la malema keendoma la pa'alegɔ pa'aleba la daa lagahɛ la Yetɔgom Tɔgɔrɔba zen'an la. Ba bahɛ te ba tare Yesu wa'an la bini na 67te ba soke en te, Yele to, hon de se'em te Na'ayenɛ loe te a fan' nɛreba bahɛ laa? Te a lebehe yeti, Mam han yele ya sɛla, ya kan sakɛ bo mam. 68N me han le soke ya sokere, ya kan lebehe mam. 69Ge nananawa kɔ'ɔn yɛ'ɛha, Asaala Dayɔa yete n zin'an la Na'ayenɛ se'em n gane zan'an la zuɔ nu'o. 70Te ba zan'an soke en yeti, Hon ye de Na'ayenɛ Dayɔa laa? Te Yesu lebehe yeti, Yamam n yele bala wa. 71Te ba yele taaba te, To ka le ɛɛra nɛra se'em te a yele to a yele. To mɛhe pon wom a mea n yele se'em.

will be added

X\