Aluki 2

1Saŋsɛka te Augustus se'em n daa de nakantɛ Arom teŋa poan la yuun bo a nɔɔrɛ te ba kaanlɛ nɛresɛba woo te a sɔna behera la. 2Te se'em ma'an te ba pɔhɛ kaanlɛ nɛreba la te Kuirinius n yuun de Siria teŋbehera. 3Bala, nɛra woo lebe la a mea teŋa poan te ba ta kaanlɛ en. 4Dene poan te Yosef ze'ele Nazaret teŋa la n boe Galilee teŋa poan la keŋɛ Betlehem teŋa n boe Yudea teŋa la, zen'an te ba daa dɔgɛ Naba David la. A keŋɛ bini la enŋa n de David yaaŋa la zuo. 5Te a tare la Mari se'em wan dɛna a pɔga la keŋɛ bini te ba ta kaanlɛ ba. Ge Mari me tare la poorɛ. 6Te ban ta bɔna Betlehem teŋa poan la, te Mari virige, dabaherɛ la paɛ mɛ te a dɔgɛ. 7Ge te a dɔgɛ a pɔpɔhɛ bodibila la, a yuun dekɛ la fuo pin' en ge tare en ta gan'anrɛ zoŋen. Se'ere n sɔe la, fole ka boe saama yire la poan te ba wan gan'anrɛ bini. 8Te yu'uŋkoŋɔ mea la te boraa se'ehe me yuun boe teŋa la bɔbɔrɛ deyena gura ba piihe sɛnka poan. 9Na'ayenɛ soŋora nɛɛ a mea ba zen'en ge te la ana wo wontɛɛŋa la. Te ban nyɛ' bala la, dabeem n kɛn' ba. 10Ge soŋora la yele ba yeti, Da bahɛ ya te dabeem tara ya. Te n tare la yelesoma te n yele ya. Yelesoma la me wan bahɛ te nɛra woo tara popeelom. 11Te yu'uŋkona wa ba dɔgɛ ya faanra, ya Daana se'em te Yenɛ loe la. Ba dɔgɛ en la David teŋa la poan. 12Ge sɛla n wa pa'alɛ ya te dena wa seren dela sera dela ya han kɛn' bini ya wan nyɛ' te ba dekɛ fuo pile bilia te a gan'an zoŋɔ poan. 13Te soŋora la n yele wana wa ba'ahɛ la, bilam bilam te Na'ayenɛ soŋoreba kekeko ze'ele saazuo na lagom la soŋora ayema la yoona yooma pɛngera Na'ayenɛ te, 14Pɛnka bo Na'ayenɛ se'em n boe saazuo saazuo ha la. Ge te sunma'ahom me wan bɔna la nɛresɛba te Na'ayenɛ tara popeelom la ba te ba bɔna teŋa wa zuo la. 15Te soŋoreba la n lebe saazuo la, boraahe la n gure ba piihe la yele taaba yeti, Bahɛ ya te to keŋɛ ya Betlehem teŋa la poan ta behɛ sɛla te to Daana Na'ayenɛ yele to te la eŋɛ ya wa. 16Depooren, te ba nya keŋɛ tɔtɔ tɔtɔ ta ɛ nyɛ' Mari la Yosef ge nyɛ' bilia la te a gan'an zoŋɔ la poan. 17Te ban nyɛ' bilia la bala la, ba yele nɛra woo sɛla te Na'ayenɛ soŋora la yele yɛhera bilia wa yele. 18Ge te boraahe la n yele wana wa la, la eŋɛ pakerɛ bo nɛresɛba woo n wom dɛ la. 19Ge te Mari yuun tɛnre yele ana wa woo mɛ ge nya tɛn'ɛha a yɛla. 20Te boraahe la lebe ba sɛnka la poan pɛngera ge na'aha Na'ayenɛ la sɛla te ba wom ge nyɛ' wa. La yuun kɔ'ɔn de'a la denɛ te Na'ayenɛ soŋora la pon yele ba la. 21Te dabeha anii daarɛ n daa paɛ te ba yete ba ŋma' bilia la, ba segɛ a yu'urɛ la Yesu. Yu'urɛ dena te Na'ayenɛ soŋora la daa pon yeti ba segɛ en ge te a ma baŋɛ nyɔkɛ a poorɛ la. 22Ge te la paɛ daanse'ere daarɛ te ba eŋɛ Moses Pa'alegɔ wo ban ne eŋɛ ge ka tara dɛngerɔ Na'ayenɛ nɛŋa la, bala te ba dekɛ ba bilia la keŋɛ Yerusalem teŋa poan te ba ta dekɛ en eŋɛ Na'ayenɛ nu'uhen, 23wo to Na'ayenɛ Pa'alegɔ n golehɛ yele se'em la. La yeti, Ho han dɔgɛ bikeŋa ge te a dɛna bondɔɔ. A dela toolom dene bo Na'ayenɛ. 24Bala n sɔe, te ba keŋɛ Yerusalem teŋa la poan ge me tara ba bo'olom wo Na'ayenɛ Pa'alegɔ la n le yele se'em la. La yeti, Ho tara dayɛna ayi', bii nadoma dayɛnbibihe bayi' na. 25Te boraa kayema n daa boe Yerusalem teŋa poan te a yu'urɛ dɛna Simon. A dela nɛresoŋɔ ge dɛna se'em n sohore Na'ayenɛ. Ge te a me kɔ'ɔn gura la a nyɛ' te Israel teŋa nɛreba nyɛ' faanrɛ wo Na'ayenɛ n yeti a wan eŋɛ se'em la. Ge Yenɛ Sea la boe me la en, 26ge yele en te yelemɛŋɛrɛ a kan ki' han dagana la a ta nyɛ' la Na'ayenɛ n tom se'em na te a de'a se'em te enŋa Yenɛ loe la. 27Bala, te Sea bahɛ te Simon la keŋɛ Yenɛ Yire la poan. Yesu dɔgɔreba la n daa tare en wa'ana wo Pa'alegɔ la n yele se'em la, 28te Simon nyɔkɛ bilia la eŋɛ a nu'uhen ge bo Na'ayenɛ fara yeti, 29Nananawa, n Daana Na'ayenɛ, ho seren eŋɛ sɛla te ho daa yeti ho wan eŋɛ la. Bala ho ta'an bahɛ te mam ho yameŋa wa ki' la sunma'ahom. 30Te n mea nini nyɛ' to faanra la te ho tom na la. 31Se'em te ho maahom biŋe te nɛra woo teŋa wa zuo nyɛ', 32A ane wo bugum nɛɛ bo sɛba n dagɛ Yudoma ge me tare pɛnka na bo Israel teŋa nɛreba. 33Te Simon n daa yele wana ba'ahɛ la. La de pakerɛ bo bia la sɔ la a ma la yetɔgom sebo te a tɔgɛ yɛhera bilia la yele la. 34Te Simon kan' kan'somɔ bo ba ge yele bia la ma Mari yeti, Na'ayenɛ n loe bia wa te ka zuo nɛreba zo'e zo'e wan zaan la enŋa Na'ayenɛ ge te zo'e zo'e me wan lɛm enŋa Na'ayenɛ yɛ'ɛha. Ge bia wa wan pa'alɛ Na'ayenɛ potɛn'ɛrɛ n ane se'em. Dene zuo, te nɛreba wan toora en. 35Dene poan, a wan pa'alɛ nɛreba potɛn'ɛra n ana se'em yɛhera Na'ayenɛ zen'en. Ge te hon mɛŋa me wan nyɛ' sunsagaŋɔ. 36Ge Na'ayenɛ nɔtɔgɔha n daa boe dɛna Panuel pɔyɔa. A yu'urɛ dela Anna ge me de'a la Aser buuri. Ge n ele la, yuuma ayopɔe ma'an ge te a sera la ki', 37ge nya dɛna pɔkɔɔnrɛ tara tara la yuum pihinii la anaahe ge kelom ka ele yɛ'ɛha. A ne kɔ'ɔn bɔna la Yenɛ Yire la poan ka vurugera zen'an zen'an ge zagahɛ a mɛŋa soha Na'ayenɛ wontɛɛŋa la yu'uŋɔ zan'an. 38Te enŋa me paɛ bia la sɔ la a ma la zen'en pin'ilom pɛngera Na'ayenɛ ge me kɔ'ɔn tɔgɔra bia la yele bɔ'ɔra nɛresɛba woo daa gure te ba nyɛ' te Na'ayenɛ wa soŋɛ a nɛreba to'e ba bahɛ la. 39Te ban daa ba'ahɛ sɛla woo te Na'ayenɛ Pa'alegɔ yeti ba eŋɛ la, ba nya kule la ba teŋa Nazaret la n boe Galilee teŋa poan la. 40Te bia la wa zo'e soŋa soŋa ge tara yam ge te Na'ayenɛ zo'ohogɔ bɔna a zuo. 41Ge te yuunɛ woo Yesu sɔ la a ma ne keŋɛ la Yerusalem teŋa poan ta de'eŋ Azootole De'eŋɔ. 42Te Yesu n ta dɛna yuum pia la ayi' la, ba daa keŋɛ Azootole De'eŋɔ Daarɛ la mɛ wo ban pon eta se'em la. 43Ge te ban ta ba'ahɛ de'eŋɔ la daanse'ere daarɛ la, ba lebe kule mɛ na. Ge ba bia Yesu yee la Yerusalem teŋa poan ge te a sɔ la a ma la ka baŋɛ te a yee ya. 44Ge nya pɔhɛ ɛɛra en ba sɔɔnrɔ la ba zɔdoma zen'en. 45Ge ban behɛ bala ge ka nyɛ' en la, ba lebe la Yerusalem teŋa yɛ'ɛha ta ɛɛra en. 46Te dabeha atan' daarɛ te ba nya nyɛ' en ta zin'an Yenɛ Yire la poan kɛleha pa'alegɔ pa'aleba la ge sɔgɔha ba yɛla. 47Te la de'a pakerɛ bo nɛra woo la yam sebo te a tara sɔgɔha ge lebeha ba la. 48Ge la me de pakerɛ bo a sɔ la a ma nyɛ' en Yenɛ Yire la poan la. Ge te a ma nya yele en yeti, Bia wa, wane te ho eŋɛ to bala? Mam la ho sɔ kɔ'ɔn mɔ'ɛ la nini teregɛ ɛɛra hɔ. 49Te Yesu lebehe yele en yeti, Wane te ya ɛɛra mam bala? Ya ka mi' te n sontii n bɔna n Sɔ' yire la poan? 50Ge ba da ka bɔkɛ n yele ba sɛla la vɔnrɛ n de se'ere. 51De pooren te Yesu doohe ba kule Nazaret teŋa poan ge ta nana ba. Ge a ma dekɛ yele ana wa woo mɛ eŋɛ a suunre poan. 52Ge te Yesu me daa kɔ'ɔn zɔ'ɔra soŋa soŋa ge tara yam ge te Na'ayenɛ zo'ohogɔ bɔna a zuo ge te nɛreba me nɔŋɛ en.

will be added

X\