Aluki 17

1Yesu yele a dɔlɔba la te, Yelese'a n wan bahɛ te nɛreba ton be'em wan ba'ahom wa'an me na. Ge se'emdaana n bahɛ te a wa'an na la, Na'ayenɛ wan namehɛ en. 2Bala, ba wan dekɛ nɛɛrɛ lo' yule a nyugela za'ɛ en bahɛ mɔgɔkantɛ poan, la en bahɛ te taromdoma wa ton be'em la zuo. 3Dene poan, tare ya ya mɛhe soŋa soŋa. Ge ho sɔɔn han tom be'em, tanhɛ en. A me han tee a potɛn'ɛrɛ a yelebe'ero la poan, di suguru bo en. 4A me han tom ho be'em sugumnɔɔren boyopɔe dayenɛ ge kena yɛta hɔ te, N tee n potɛn'ɛrɛ n yelebe'ero la poan, la sontii ho di suguru bo en. 5Te Yesu dɔlɔba la yele en yeti, To han ka nam hɔ gana te pon nam hɔ se'em la, to kan nyaŋɛ dena wa. 6Te a lebehe yele ba te, Ya han pon nam mam fiin wa ge ya ta'an yele tia te, Von ho mea la ho ta sɛ' mɔgɔkantɛ la poan. Ya han yele n bala, la wan seren eŋɛ. 7Ho han tara ho yameŋa ayena ma'an te a kɔɔra ge beha piihe, ge dogora ta ze'ele sɛnkan kɛn' na, ho wan yele en te, Eŋɛ tɔtɔ tɔtɔ ge wa'ana te to di'? Aai, ho kan yele bala. 8Hom n wan eŋɛ se'em dela ho wan yele en te, Maahom n dia ze'ele mam ge maahom ho mea la ho ze'a gura te n di' ge nyu'. N han ba'ahɛ, hon me nya ta'an keŋɛ ta di' ge nyu'. 9Ho tɛn'ɛhɛ te ho wan po'ohɛ en la n eŋɛ sɛla bo ho la zuo? Aai, ho kan eŋɛ bala. 10Bala, dene mea n bala bo yamam me wa. Ya han eŋɛ sɛla woo te Na'ayenɛ yele ya te ya eŋɛ, ya sontii ya yeti, tomam dela yamse'ehe n ka nare ba po'ohɛ. To yenzuo eŋɛ la sɛla n de to eŋɛ. 11Yesu n daa ye' Yerusalem teŋa poan la, a doohe la Samaria la Galilee teŋhe yɛ'a. 12A paara la teŋa kayema te konkɔma pia to'ohɛ en. Ba ze' la zen'an n ka ba' zaan la en, 13ge nyabegɛ te, To Daana Yesu, zɔ' to ninbɔn'ɔn. 14Te n nyɛ' ba la, a yele ba yeti, Keŋɛ ya la ya ta bahɛ te malemadoma behɛ ya. Te ban ye' malemadoma zen'en la, ba konkom la bahɛ ba mɛ. 15Te ba ayema la n baŋɛ te a konkom la bahɛ ya la, a ŋmɛregɛ lebe me na nyabera pɛngera Na'ayenɛ. 16Ge a dɔnbelɛ teŋa Yesu nɛŋan po'ohɛ en. Ge, boraa kana wa dela Samaria teŋa boraa. 17Te Yesu yeti, Ba dagɛ la boraahe pia te ba konkom bahɛ ba laa? Te bawae' la bɛɛ? 18Bene n sɔe te se'em n ton dagana Yuda teŋa nɛra ŋmɛregɛ lebena po'oha Na'ayenɛ? 19Te Yesu nya yele en yeti, Hon sakɛ bo mam la zuo te Na'ayenɛ tebɛ hɔ wa. Bala, ihege la ho keŋɛ. 20Te Pariseedoma basɛba daa soke Yesu se'em ma'an te Na'ayenɛ wan sɔna behera. Te a lebehe yeti, Na'ayenɛ n yete a sɔna behera la ka ane me wo sɛla te nɛreba nyɛta la ba nini la. 21La dagɛ sɛla te ho wan ta'an yeti, Behɛ, la wana kalam bii lan boe keha la. Ge Na'ayenɛ Sɔ'ɔlom nan boe la ya zen'en. 22A me nya yele a dɔlɔba la te, Dabaherɛ la kena te ya wan ta bɔta te ya nyɛ' Asaala Dayɔa la nini dayenɛ ma'an, te n lebe teŋa wa zuo na, ge ya kan nyɛ' mam. 23Nɛreba wan ta yɛta yeti n bo keha la bii n boe kalam wa. Ge da doohe ya ba keŋɛ ban ye' zen'an la. 24Magahɛ wo saa n ne nyakɛ saŋgbanɛ zuo te zen'en woo nɛɛ se'em la, bala me te daanse'ere daarɛ te Asaala Dayɔa ta yete n lebe teŋa wa zuo na ta ana. 25Ge yia poan, n wan ba'ahom nyɛ' namehegɔ ge te nanana nɛreba me zagahɛ ma. 26Magahɛ wo Noah saŋa n yuun an se'em la, bala me te daanse'ere daarɛ te Asaala Dayɔa ta lɛbera na ana. 27Noah saŋa ha la, nɛreba yuun dite mɛ ge nyuura ge te boraahe dita pɔgɔba ge te pɔgɔhe me ɛɛla sereba. Wana wa woo yuun ete mɛ tara tara la daanse'ere daarɛ te Noah yuun kɛn' ɔɔnrɔŋkantɛ la poan la. Bilam te saa yuun ni' te ko'om libe ko' nɛra woo, ge gee nɛresɛba n yuun boe ɔɔnrɔŋkantɛ la ma'an. 28Le yɛ'ɛha la ana me wo Lot saŋa la. Nɛra woo yuun dite mɛ ge nyuura, ge da'ara ge kɔɔha, ge kɔɔra ge mɛta yiya. 29Ge daanse'ere daarɛ te Lot yuun bahɛ Sodom teŋa la, Na'ayenɛ yuun bahɛ te kuguse'a n dite la bugum ze'ele saazuo lu' na di' ba zan'an ko'. 30Bala, daanse'ere daarɛ te Asaala Dayɔa ta yeti n lebena ge nɛɛ n mea la ta me ana la bala. 31Daanden daarɛ nɛra se'em n ta yaga gɔhɔgɔ ka sontii a le sige zenzakan ta dekɛ lɔgɔseto n boe bini la. Bala me nɛra se'em me n boe va'ame ka sontii a lebe yire na yɛ'ɛha dekɛ lɔgɔrɔ. 32Tɛnra ya sɛla n yuun eŋɛ Lot pɔga la. 33Dene poan, nɛra se'em n nɔŋɛ a vom bonɔ gana mam wan bɔregɛ a vom la. Ge nɛra se'em n nɔŋɛ mam gana a vom bonɔ la kan bɔregɛ a vom la. 34N yete ya mɛ te daanden daarɛ, nɛreba bayi' wan ta lagom gan'an sonyeŋɔ ginha te Na'ayenɛ loe ayema tare keŋɛ ge gee ayema la bahɛ. 35Pɔgɔhe seyi' wan ta lagom bɔna nɛɛren nɛɛna te Na'ayenɛ loe ayema ge gee ayema la bahɛ. 36Le yɛ'ɛha nɛreba bayi' wan ta lagom bɔna va'ame te Na'ayenɛ loe ayema ge gee ayema la bahɛ. 37Yesu n yele wana ba'ahɛ la, a dɔlɔba la soke en yeti, To Daana bɛha te dena wa woo yete la eŋɛ? Te a lebehe yeti, Ziiro lagahe la zen'sɛka te duŋkiiriŋa gan'an.

will be added

X\