Aluki 16

1Yesu me yele a dɔlɔba la te, Boraa kayema n daa boe dɛna bontata. Te nɛreba wa yele en te se'em te a dekɛ te a behera a lɔgɔrɔ la tare a tona mɛ bora bora. 2Bala te a yi' en na yele en te, Bene n bala te n wona yele ana yɛhera ho yele wa? Bala, n bote ho kaanlɛ la n lɔgɔseto woo te ho behera la. Se'ere n sɔe la, ho kan le dɛna mam tontona yɛ'ɛha. 3Depooren te se'em n behere lɔgɔrɔ la yele a mea te, N yeti n eŋɛ la wane, n daana n diŋɛ dige mam a tooma poan wa? Nyɛ', n me ye ka tare paŋa wan ta'an kɔ'. Valom me ye tare mam te n ɛɛra soha. 4Ge n tɛɛn mam wan eŋɛ se'em te nɛreba wan to'e mam ba yiya poan n daana la n dige mam a tooma la. 5Bala te a yi' sɛba n pemehe a daana la lɔgɔrɔ la ayema ayema. A yele yiadaana la te, N daana sanɛ dela wane dɔla hɔ? 6Te a lebehe yele en te, Kaam dugulehe kɔbega. Te a le yele en te, To'e ho saanɛ gɔŋɔ wa la ho golehɛ bini kalam te ho peŋe la kaam dugulehe pihinuu. 7Te a le yi' ayema me yele en te, N daana, sanɛ dela wane dɔla hɔ? Te a lebehe yele en te, ki' bɔra kɔbega. Te a le yele en te, To'e ho saanɛ gɔŋɔ wa la ho golehɛ bini kalam te ho peŋe la ki' bɔra pihinii. 8Te Yesu nya yele ba yeti, Boraa wa n ka tɔgɔre yelemɛŋɛrɛ wa n eŋɛ wana wa la, a daana la pɛngɛ en mɛ la a yam tooma la zuo. Se'ere n sɔe la, la han de'a ligiri yele, nɛresɛba n ka sakɛ Na'ayenɛ yelehom la tare yam gana nɛresɛba n sakɛ Na'ayenɛ yelehom la. 9Bala, n yeti ya mɛ, te ya dekɛ ya teŋa wa zuo tarega soŋɛ nɛreba. Te ya han eŋɛ bala ge ta ki', sɛba n boe Na'ayenɛ Sɔ'ɔlom la poan la wan ta bahɛ ya te ya kɛn' ba zen'en. 10Nɛreba han dekɛ ba ligiri fiin wa gu'ule nɛra se'em n de birikina, ba me ta'an dekɛ ligiri kekeko gu'ule en. Ba me han le dekɛ ba ligiri fiin wa gu'ule nɛra se'em n dagɛ birikina, a kelom kan de'a birikina ba han dekɛ ligiri kekeko gu'ule en. 11Bala, ho han beha teŋa wa zuo lɔgɔrɔ ge ka tara birikina a poan, ba kan ta'an dekɛ Na'ayenɛ Sɔ'ɔlom tarega gu'ule ho. 12Ge ho me han ka dagana birikina la ho tadaana lɔgɔrɔ poan, ane me wan dekɛ sɛla n de ho denɛ bo ho? 13Yameŋa kan ta'an tona bɔ'ɔra kpɛ'ɛndoma bayi'. Se'ere n sɔe la, a wan yaɛ ayema ge nɔŋɛ ayema la, bii a wan tona bɔ'ɔra ayema la ge bahɛ ayema la. Bala mea ya kan ta'an tona bɔ'ɔra Na'ayenɛ ge me mɔ'ɛ nini ɛɛra ligiri. 14Ge Pariseedoma basɛba lagom bɔna bini mɛ. Ba dela ligibɔteba te ban wom bala la, ba kɛɛte en mɛ. 15Ge a yele ba yeti, Ya dela sɛba n parom te ya dela yelemɛŋɛrɛdoma nɛreba zen'enhen ge Na'ayenɛ mi' ya potɛn'ya. Sɛla te nɛreba tɛn'ɛha te denɛ n gane zan'an la, Na'ayenɛ behɛ de te de de'a la yoo. 16Ba mɔɔla Pa'alegɔ la Nɔtɔgɔheba yɛla tara tara la paɛ Yon. Te bala ma'an yɛ'ɛha la, ba mɔɔlɛ yelesoma la mɛ yɛhera Yenɛ sɔ'ɔlom la, ge te nɛra woo daa bɔta te a teregɛ kɛn' bini. 17Ge bala mea zan'an, la kpe'em te Pa'alegɔ la fiin wa tee, gana saazuo la teŋa tole. 18Ge boraa sɛka han dige a pɔga ge malom di' kayema, a ton la kabonhe. Boraa sɛka me n di' pɔgɔsɛka te ka sera lebehe en me ton la kabonhe. 19Te Yesu le yeti, Boraa kayema n boe de'a bontata bagɛ a mea la dansikantɛ n de mɔlega. Boraa wa daarɛ woo bo la na'am bɔŋa poan. 20Te boraa kayema me bɔna de'a naha te a iŋa woo de'a nɔra. A yu'urɛ daa dela Lazarus. Ba daa ne tare en mɛ na te a zin'an bontata wa yire koleŋa nɔɔrɛn. 21Te disɛka te bontata wa ne di' ge te la zɔngɛ teŋa la, Lazarus ne bɔta te a vaɛ di' mɛ. Ge, baahe ne wa'an me na lɛɛla a nɔra la. 22Depooren, te naha wa wa ki'. N daa ki' bala la, Na'ayenɛ soŋoreba daa tare en keŋɛ te a ta zin'an la Abraham zen'en Na'ayenɛ Sɔ'ɔlom la poan ha. Ge te bontata la me wa ki' te ba pin' en. 23Te ban daa pin' en bala la, a sea keŋɛ la ke'endoma n boe zen'en la te a daa nyɛta namehegɔ. N bo bini la, a nyɛ' te Lazarus zin' Abraham zen'en ha. 24Bala te a yi' yeti, n sɔ Abraham, zɔ' n ninbɔn'ɔn la ho tom Lazarus te a ta dekɛ a nu'dibila eŋɛ ko'om poan na tɔkɛ n zɛleŋa wa poan. Se'ere n sɔe la, n nyɛte la namehegɔ bugum wa poan. 25Ge Abraham lebehe yele en te, n dayɔa, tɛnra te hon nan boe teŋa zuo la, ho tare la ho lɔgɔsonɔ, ge te Lazarus me tara lɔgɔseto n ka ane soŋa. Ge nananawa, Lazarus tare popeelom kalam mɛ ge te hon nyɛta namehegɔ. 26Ge sɛla me n le pa'ahɛ dela boko kantɛ n boe kalam bɛŋe hon la tomam. Bala, tomam se'em han bɔta te a wa'ana, a kan ta'an wa'ana. Ya se'em me han bɔta te a wa'an kalam na, a kan ta'an wa'ana. 27Depooren, te bontata la nya yele te, n sɔ, n ye bene ho mɛ te ho tom Lazarus te a keŋɛ n sɔ yire. 28Te n tare yebehe senuu bini. Ho yele en te a han paɛ bini, a yele ba soŋa soŋa te ba ta tɔgɔhɛ mam n ete se'em la. Han dagana bala, ba me wan wa'an namehegɔ zen'en wa te mam bɔna wa. 29Te Abraham lebehe yeti, Moses la nɔtɔgɔheba la boe ha. Ba wan kan'an ba. 30Te a yeti, N sɔ Abraham, dena wa ma'an ka seke. Ge nɛra se'em n pon ki' la han lebe ba zen'en, ba wan tee ba potɛn'ɛra ba yelebe'ero poan. 31Ge Abraham daa lebehe yele en te, ba han ka kelehe gɔŋseto te Moses la nɔtɔgɔheba golehɛ la n yete se'em la, ge te se'em han pon ki' ge lebe ta yele ba, ba me kan kelehe en.

will be added

X\