Aluki 10

1To Daana nya daa loe la nɛreba pihiyopɔe la bayi'. A loe ba bala tom ba la bayi' bayi' te ba diŋɛ a nɛŋa la ba keŋɛ teŋse'ehe woo te a tara a potɛn'ɛrɛ te a wan keŋɛ bini. 2En tom ba bala la, a nya daa yele ba mɛ te, Magahɛ wo va'am dia n bi'ɛ te ba mahona te ba kɛ' se'em la, bala mea n bala te nɛreba kekeko mahona te ba sakɛ bo mam. Ge sɛba n wan keŋɛ ta mɔɔla Na'ayenɛ yelehom bɔ'ɔra ba la pɔ'ɛ mɛ. Bala belom ya Na'ayenɛ n de va'amdaana la te a tom nɛreba te ba ton tooma la bo en. 3Ge mam tom ya te ya keŋɛ. Mina ya, ya ane wo piihe n keŋɛ zen'an te gbegenɛ bɔna la. 4Da dekɛ ya daŋhe bii tapɔtɔ bii tagara, ya me da ta tara sɔnhega la nɛreba sore zuo. 5Yire woo te ya paɛ kɛn' po'ohɛ ya yire la doma, ge yele ba te, Na'ayenɛ bo ba sunma'ahom. 6Te boraa sɛka n bote sunma'ahom han bɔna yire la poan yan yele se'em la dela yelemɛŋɛrɛ. Ge a han ka bɔta sunma'ahom la dela yoo la yan yele en te a wan tara sunma'ahom la. 7Bone ya yire dene poan nyuura ge dita sɛla woo te yire la nɛreba tare na bo ya. Se'ere n sɔe la tontona nare la a yɔɔre, ge da lo'ohere ya yiya. 8Ya han keŋɛ ta paɛ teŋsɛka woo poan te teŋa la nɛreba to'e ya soŋa soŋa di' ya sɛla woo te ba tare na bo ya, 9ge tebera ban'ahedoma bini ge yɛta nɛreba bilam la te, Daanse'ere daarɛ te Na'ayenɛ yete a sɔna ya behera la nananawa nya paɛ ya. 10Ge ya han keŋɛ teŋsɛka poan te teŋa la nɛreba ka to'e ya, yehe ba sɔrɔtɔ zuto ge yeti, 11Ge ya teŋa puuhugo n boe to na'ma la to kpa'ahɛ to bahɛ kalam. To kpa'ahɛ to bahɛ te to pa'alɛ ya te tomam taalɛ ka le bɔna la ya. Ge mini ya te zina n de daanse'ere daarɛ te Na'ayenɛ Sɔ'ɔlom la paɛ ge me tole. 12N yete ya mɛ. Te daanse'ere daarɛ te Na'ayenɛ yete a namehɛ potɔpa la han paɛ a wan namehɛ teŋkaŋa nɛreba n zagahɛ ya la gana n yeti a namehɛ Sodom teŋa nɛreba se'em la. 13Yele boe yamam Korazindoma zuo! Yele boe yamam Betsaidadoma zuo! Te mam han tone yelekerehe ton'ana bo Tire la Sidon tenhen wa wo mam eŋɛ se'em kalam wa, wana ma'an ba tee ne ba potɛn'ɛra ba yelebe'ero poan ge ba me wan zin' ne baanlam kɛla pa'ala te ba suunre sagom mɛ. 14Namehegɔ dabaherɛ la han paɛ, Na'ayenɛ wan ton namehɛ yamam Korazin la Betsaida teŋhe nɛreba gana Tire la Sidon tenhen nɛreba. 15Ge yamam Kapernaum teŋa nɛreba wa, da tɛn'ɛhe ya te ya wan nyɛ' zen'an saazuo saazuo ha mɛ. Zen'an te ya wan nyɛ' dela namehegɔ zen'en la. 16Se'em n kelehe ya yelehom kelehe mam me mɛ. Ge se'em n ka to'e ya me ka to'e mam la se'emdaana n tom mam na la. 17Nɛreba pihiyopɔe la bayi' la n daa yehe ta eŋɛ sɛla woo te Yesu yele ba ba'ahɛ la, ba daa lebe me na. Ban lebena la, ba poya pee mɛ te ba yɛta te, To Daana, ho yu'urɛ ma'an te tomam yi' ge te bonbɛ'ɛhe naam tomam nɔɔrɛ. 18Te a lebehe yele ba yeti, Mam nyɛ' te yan eŋɛ bala la, Dima la lu' wo saa n ne kɔ'ɔn nyakɛ se'em la. 19Ge te mam bo ya sore te ya tara paŋa la bonsɛ'doma la naŋhe, la Dima paŋa woo te sɛla me kan daan ya. 20Da bahɛ ya te ya poya ba' pee la bonbɛ'ɛhe n nane ya nɔɔrɛ la zuo. Ge ton bahɛ ya te ya poya pee la Na'ayenɛ n wan tɛnra ya yuya a Sɔ'ɔlom poan la. 21Te bala ma'an la, Yenɛ Sea la bahɛ Yesu te a poorɛ pee te a daa yeti, N Sɔ' se'em n naam saazuo la teŋa wa zuo la, n bo hɔ fara. Se'ere n sɔe la, ho ka bahɛ te yamdoma nyɛ' yele ana wa, ge ho dekɛ a pa'alɛ la kɔmbibihe. Ge n Sɔ', la me dela ho mɛŋa sunboolom n bala. 22N Sɔ' dekɛ sɛla woo eŋɛ la mam nu'uhen. Nɛra se'em me ye ka mi' a Dayɔa wa han dagana la n Sɔ' la ma'an. Dagɛ la n Sɔ' la me te se'em mina han dagana la a Dayɔa wa la se'em te mam bɔta te n bahɛ en te a mina en ma'an. 23En yele dena wa ba'ahɛ la, a nya ŋmɛregɛ mɛ yele a dɔlɔba la bama ba ma'an te, Popeelom bo la yamam sɛba n nyɛ' yele ana wa. 24Te n yete ya mɛ sera sera. Te nɔtɔgɔheba la nadoma zo'e zo'e yuun bote te ba nyɛ' sɛla te yamam nyɛ' ge yuun ka nyɛ'. Ba me yuun bote ba wom sɛla te ya wom wa ge yuun ka wom. 25Daarɛ deyema n ta bɔna te pa'alegɔ pa'aleba la ayema ihege te a makɛ Yesu behɛ, nya yele en te, Pa'ala, n wa eŋɛ la wane ge ta'an nyɛ' vom sebo n ka tare ba'ahegɔ Na'ayenɛ zen'en la? 26Te a lebehe yele en te, Hon kaanlɛ Pa'alegɔ la ho bɔkɛ a la wane? 27Te a yeti, Nɔŋɛ Na'ayenɛ ho Yenɛ la la ho suunre zan'an, la ho sea zan'an, la ho paŋa zan'an. ge nɔŋɛ ho tadaana wo hom n nɔŋɛ ho mɛŋa se'em la. 28Te Yesu yele en te, Ho lebehe yele la ma'an. Dene poan ta eta bala ge ho wan nyɛ' vom la. 29Yesu n lebehe en bala la, a zegere te a pa'alɛ se'ere zuo te a soke Yesu bala la, ge nya yele Yesu te, Ane n de enŋa te ho yete n tadaana la? 30Te Yesu lebehe yele en te, Yuda teŋa boraa n boe ze'ele Yerusalem teŋa yɛ'a Yeriko teŋa poan. N boe sore zuo yɛ'a la, nayigehe n to'ohɛ n fan' sɛla woo te a tara la. Ba me ŋmɛ' en mɛ biŋe te a ge la a ki' ge te ba keŋɛ. 31Bala ma'an me la, te malemadaana dole sodenɛ mea me dɔla ge nyɛ' boraa la n gan' la. Ge a lɔkɛ tole. 32Levidoma boraa me n paɛ bilam ge nyɛ' boraa la, a me lɔkɛ mɛ tole ge te a gan'an. 33Ge Samaria teŋa boraa me dole la sɔrɔɔ koŋɔ mea tɔla. Te n paɛ nyɛ' boraa la n gan' bala la ninbɔn'ɔn nyɔkɛ en. 34Te a paɛ pee boraa la nɔra la ge eŋɛ tiim eŋɛ a ge dekɛ tanɛ lo'. Ge te a nya dekɛ en kɔgɔlɛ a mea boŋa zuo tare en keŋɛ yire se'ere te saama kena gan'an behera en. 35Te yiimbeere la, a dekɛ la ligiri bo se'em n behere yire la ge yele en te, Behera boraa wa soŋa soŋa ge te sanɛ se'ere n ta bɔna la, n han lebena n wan yɔ' hɔ. 36Depooren, ho tɛn'ɛhe te ane boraahe batan' wa poan n pa'alɛ te a nɛretadaana de boraa sɛka te nayigehe fan' wa? 37Te pa'alegɔ pa'aleba lebehe en yeti, Se'emdaana n zɔ' boraa la ninbɔn'ɔn la. Te Yesu yele en te, Hon me ye keŋɛ la ho ta ana wo eŋɛ la. 38Yesu la a dɔlɔba la nya le kena la ba sɔrɔɔ mea ge wa paɛ teŋa kayema poan. Te pɔka ayema bɔna teŋa la poan, te a yu'urɛ de'a Marta. Pɔka wa to'e Yesu soŋa soŋa te a bɔna a yire poan. 39Pɔka wa me tare a yebega te a yu'urɛ de'a Mari. Yesu n boe yire la poan la, Mari daa zin' la Yesu nɛŋa kɛleha sɛla te a pa'ala la. 40Ge Marta mɔ'ɛ la nini te a dogɛ dia bo ba. Bala te a paɛ yele Yesu yeti, N Daana, hon tɛn'ɛhe te la ane soŋa te n yebega wa bahɛ mam n ma'an te n tona wana? Yele en te a wa'ana lagom soŋɛ mam. 41Te to Daana lebehe yele en te, Marta, yiren tooma yele n ba' daana hɔ. 42Ge yele yenɛ ma'an n de ninmɔ'ɔrɛ. Mari loe la sɛla te a kan malom tamɛ.

will be added

X\