Aluki 1

1N zɔ'soŋa Teopilus, nɛreba kekeko kpeŋe ba mɛhe te ba golehɛ yelese'a te to mɛhe mina soŋa soŋa te la seren eŋɛ wa. 2Ge ba daa golehɛ la yelese'a te nɛresɛba daa nyɛ' la ba nini de pin'ileŋɔ poan ge mɔɔlɛ Yelesoma la bo to la. 3Ge te mam mɛŋa me ma'ɛn n mea zamehɛ yɛla la soŋa soŋa a pin'ileŋɔ poan ha, ge nya tɛn'ɛhɛ te la ana soŋa te n golehɛ a eŋɛ gɔŋɔ poan bo ho. 4Te n ete wana wa te n bahɛ te ho baŋɛ yelemɛŋɛrɛ la zan'an yɛhera yelese'a woo te ho wom la. 5Ge Herod n daa wa de'a Naba se'em ma'an bɔna Yudea teŋa poan la, saŋkaŋa me te malemadaana daa bɔna te a yu'urɛ de'a Zekaria. A lagom bɔna la malema keendoma lagaŋɔ la mɛ dɔla Abiya. A pɔga yu'urɛ yi'ire la Elizabet ze'ele Aron buuri la poan na. 6Te Zekaria la a pɔga Elizabet zan'an daa lagom bɔna bɔŋsɛka n de ma'an Na'ayenɛ nɛŋa. Ba me kɔ'ɔn nana to Daana Na'ayenɛ Pa'alegɔ la, la yelese'a te a yete nɛreba ete la woo mɛ. 7Ge ba me ka tare kɔma. Se'ere n sɔe la, a pɔga dela kondɔgɔrɛ ge te bama bayi' la me zan'an kɔ'ɔn korogɛ mɛ. 8Saŋsɛka te Abiyadoma lagaŋɔ la tona ba tooma Yenɛ Yire la poan, daarɛ deyena Zekaria toonɛ dabaherɛ me wa paɛ te a tona a tooma bɔ'ɔra Na'ayenɛ. 9Se'ere n sɔe la, Zekaria gbaŋa n di' wo Yenɛ Yire la malemadoma etegɔ la. Te la de'a la enŋa kɛn' Yenɛ Yire la poan ha ta nyɔ' sɛla te la tara nyuŋo ane soŋa bo Na'ayenɛ. 10Te lan ta paɛ ba ne nyɔ' bo Na'ayenɛ la, nɛrekooŋɔ la zan'an ze' la yeŋa soha Yenɛ. 11Bilam poan, te Na'ayenɛ soŋora nɛɛ a mea Zekaria zen'en, ge ze'ele ko'ɛnka daka la zuɔ nu'o bɔba zen'an te Zekaria nyɔ'ɔra bɔ'ɔra Na'ayenɛ la. 12Te Zekaria n nyɛ' Na'ayenɛ soŋora la bala la, la daan en mɛ ge te dabeem tara en. 13Ge soŋora la yele en yeti, Zekaria, da bahɛ te dabeem tara hɔ. Te Na'ayenɛ wom ho sohoga la ge te ho pɔga Elizabet la me wan nyɔkɛ poorɛ dɔgɛ bodibila. A han dɔgɛ en, ho sigɛ a yu'urɛ Yon. 14Bala, ho wan nyɛ' sunpeelom la popeelom ge nɛreba kekeko wan tara popeelom ho han dɔgɛ en. 15A yeti a dɛna la nɛrekantɛ Na'ayenɛ nɛŋan. Sore ka boe bo en te a nyu' daam bii daam sebo n kpe'em. Te Yenɛ Sea la yete a bɔna la en mɛ daanse'ere daarɛ te ba wan dɔgɛ en la. 16A yeti a dɛna la se'em n wan bahɛ te Israel nɛreba zo'e zo'e tare ba mɛhe le lebena nana Na'ayenɛ. 17A wan bahɛ te ba tara ba mɛhe lebe le nana Na'ayenɛ yɛhera enŋa Yenɛ Sea sɛka n boe Eliya zen'en se'em la. A wan bahɛ te sɔdoma la kɔma le lagom dɛna boyena yɛ'ɛha ge me wan bahɛ te nɛresɛba n ka nane, tɛn'ɛha la sɛla n de ma'an. A wan maahom nɛreba bo to Daana Na'ayenɛ. 18Te Zekaria soke en yeti, Hom n wan eŋɛ la wane te mam sakɛ te hon yele mam se'em wa dela sera? Nyɛ' mam dela boraa yan'aŋa ge te n pɔga me korogɛ. 19Te Zekaria n soke bala la, soŋora la lebehe yele en yeti, Mam dela Gabriel ge me ze'a la Na'ayenɛ nɛŋa wa. Enŋa n tom mam na te n wa'ana yele ho dena wa. 20Ho ka nam mam yetɔgom sebo n wan seren wa'an sera na de daarɛ la han paɛ la. Bala, hon ka nam wa zuo, ho wan lɛbege gɔɔŋɔ. Ho kan le ta'an tɔgɛ han dagana la daanse'ere daarɛ te mam biŋe n nɔɔrɛ bo ho la ta wa'an sera na. 21Te bala ma'an la, te nɛreba la n daa ze' yeŋa la soha Yenɛ la nya gura la Zekaria, ge tɛn'ɛha se'ere n sɔe te a yuura Yenɛ Yire la poan ha bala. 22Ge te n ta yehe na la, a ka ta'an tɔgɛ bo nɛreba la. Bilam, te ba baŋɛ te a nyɛ' sɛla Yenɛ Yire la poan la. A tare la nu'uhe yebeha pa'ala ba ge a ka ta'an tɔgɔra. 23Te Zekaria daarɛ la n paɛ a tom a tooma ba'ahɛ la, a lebe kule la a yire. 24La daa wa wa'an na te a pɔga Elizabet la nyɔkɛ poorɛ kɔ'ɔn bɔna yire ŋmarehe senuu ge ka keŋɛ zen'an zen'an, 25Nananawa, la dela to Daana Na'ayenɛ n soŋɛ mam dena poan wa. Enŋa n bahɛ te vi' ka nyɔkɛ mam nɛreba zen'an wa. 26Te Elizabet n daa tara a poorɛ la te la de'a ŋmarehe seyoobe la, Na'ayenɛ daa a soŋora Gabriel la teŋa n boe Galilee teŋa poan te a yu'urɛ dɛna Nazaret. 27Soŋora wa tare la yetɔgom te a tɔgɛ bo pɔgɔsa'a kanhere n ele Naba David yaaŋa te a yu'urɛ dɛna Yosef. Pugula wa me yu'urɛ dɛna Mari. 28Te soŋora la wa'an pugula la zen'en wa yele en yeti, Sunma'ahom bɔna la hɔ. Te Na'ayenɛ boe la ho mɛ ge me kan' la kan'somɔ bo ho. 29Te Mari n wom soŋora la yetɔgom la, la daan en mɛ ge te a daa tɛn'ɛha soŋora la n yele se'em la vɔnrɛ n de sɛla. 30Ge soŋora la le yele en yeti, Mari, da bahɛ te dabeem tara hɔ. Se'ere n sɔe la, Na'ayenɛ tare popeelom la hɔ. 31Ge ho wan nyɔkɛ poorɛ dɔgɛ bodibila segɛ a yu'urɛ Yesu. 32Ho han dɔgɛ en, a wan de'a la nɛrekantɛ ge te ba wan yi'ire en la Na'ayenɛ Se'em N Gane Zan'an la Dayɔa. To Daana Na'ayenɛ n yeti a bahɛ en te de'a naba wo a sɔyaaba David yuun de se'em la. 33A yeti a de'a la Yakob yaahe naba wuuha ge ta a sɔ'ɔlom la kan tare ba'ahegɔ. 34Te Mari soke soŋora la yeti, Mam dela pɔgɔsɛka n nan ka tabelɛ mina boraahe, te dena wa yeti la eŋɛ la wane ta'an eŋɛ? 35Te soŋora la lebehe yele en yeti, Yenɛ Sea la wan wa'an ho zen'en na ge te Na'ayenɛ paŋa la bɔna la hɔ. Dene zuo, fa'a bia wa, wan dɛna Na'ayenɛ Dayɔa. 36Behɛ ho sɔɔn Elizabet. Ba yete a dela kondɔgɔrɛ, ge n pon korogɛ wa, a nyɔkɛ poorɛ mɛ te la de'a la ŋmarehe seyoobe n wana wa. 37Bala, sɛla ka boe te Na'ayenɛ kan ta'an eŋɛ. 38Te Mari lebehe yele soŋora la yeti, Mam dela to Daana Na'ayenɛ yameŋa. Bala, ma sakɛ ya te sɛla woo te ho yele ma la wan de'a bala. N daa yele wana wa ba'ahɛ la, soŋora la daa bahɛ a zen'en mɛ. 39Te dabeha n daa eŋɛ fiin wa la, Mari daa ihege tɔtɔ tɔtɔ keŋɛ teŋa n bo zoore bɔba bɔna Yudea teŋa poan. 40N paɛ la, a keŋɛ kɛn' la Zekaria yire ta po'ohɛ Elizabet. 41Te Elizabet n ta wom Mari n po'ohɛ en la, bia la n bo a pooren la daa ŋmɛregɛ mɛ. Bilam te Yenɛ Sea daa wa'an Elizabet zen'en na, 42te a tɔgɛ kekeko te, Na'ayenɛ boe la hon mɛ gana pɔgɔhe zan'an. Ho bia la me yeti a tare la pɛnka na bo Na'ayenɛ. 43Ge n tare popeelom te n Daana ma wa'an na te a behɛ mam. 44Te mam n kɔ'ɔn wom ho po'ohegɔ la, bilam bilam te n bia la n boe n pooren wa la kɔ'ɔn ŋmɛregɛ la popeelom. 45Bala, ho tare popeelom. Se'ere n sɔe la, hon nam to Daana Na'ayenɛ yelehom la te a tɔgɛ bo ho la wan seren wa'an sera na la zuo. 46Te Mari yeti, N suunre wa pɛngere Na'ayenɛ mɛ. 47Ge n tare sunpeelom la Na'ayenɛ se'em n de n faanra wa. 48A tɛnre mam n de taroma wa n de a yameŋa wa yele mɛ. Te nananawa, nɛra woo wan yi'ira mam popeelomdaana. 49Se'ere n sɔe la, Na'ayenɛ se'em n gane zan'an la n eŋɛ yelekanra ana wa bo mam la zuo. Te Na'ayenɛ yu'urɛ dela Fa'a. 50Na'ayenɛ tare ninbɔn'ɔn bɔ'ɔra nɛresɛba n tare dabeem la en. A ete dena wa saŋa woo. 51A dekere la a nu'uhen tona toon nyalema, bahera te sɛbadoma n zɛnkere ba mɛhe saazuo ge tɛn'ɛha la wakerɛ ma'an la zɔ' yerom. 52A yehere nakanreba ba na'am poohen, ge ton tebegera la se'em n dagɛ nɛrekantɛ. 53A bo'ore nɛresɛba n ka tara sɛla yelese'a n ane soŋa kekeko. Ge digera bontateba te ba kena ge te a ka bɔ'ɔra ba sɛla. 54A soŋore a yamehe Israel teŋa nɛreba ge tɛnra te a wan zɔta ninbɔn'ɔn, 55bɔ'ɔra Abraham la a yaahe wuuha. Ge a eŋɛ dɛ wo n yuun yele to sɔdoma se'em la. 56Ge te Mari daa bɔna la Elizabet wo ŋmarehe setan' ge nya lebe kule. 57Te Elizabet dɔgɔm daarɛ n daa ta paɛ la, a dɔgɛ la bodibila. 58Te nɛresɛba n boe lɛm en la, la a sɔɔnrɔ la n wom to Daana Na'ayenɛ n zɔ' ninbɔn'ɔn bo en se'em la me tare popeelom la en. 59Dabeha anii daarɛ te nɛreba daa wa'an na te ba ŋma' en. Ba me daa yeti ba dekɛ la a sɔ Zekaria yu'urɛ segɛ en. 60Ge bia la ma yeti, Aai, da sigɛ ya en yu'urɛ denɛ. A yu'urɛ yeti la de'a la Yon. 61Te n daa yele bala la, nɛreba la daa lebehe yeti, Ge ho ka tare ho sɔɔn se'em te a yu'urɛ de'a bala. 62Te ban daa yele bala ba'ahɛ la, ba nya dekɛ la nu'uhen yebehɛ pa'alɛ bia la sɔ Zekaria yu'urɛ se'ere te a bɔta ta a segɛ a dayɔa la. 63Te Zekaria pa'alɛ ba te ba bo en sɛla te a golehɛ yeti, Bia la yu'urɛ dela Yon. N golehɛ wana wa ba'ahɛ la, la daa eŋɛ nɛreba la woo pakerɛ mɛ. 64Ge te bilam bilam te Zekaria le tana tɔgɔra te la yɛ'ɛha ge nya pin'ilom pɛngera Na'ayenɛ. 65Ge te lan eŋɛ bala la, dabeem daa kɛn' nɛresɛba woo n daa lɛm bilam la. Ge te Yudea teŋa nɛreba me kɔ'ɔn tɔgɔra la yelese'a n eŋɛ la yele. 66Te nɛra se'em woo n ne wom yele dena wa, ne tɛn'ɛn dɛ mɛ ge soke yeti, Bikana wa yeti a ana la wane? Ge yelemɛŋɛrɛ Na'ayenɛ paŋa la n bo la en. 67Te Yenɛ Sea la daa bahɛ te Yon sɔ Zekaria soolom Na'ayenɛ yɛla yeti, 68Bahɛ ya te to pɛngɛ to Daana Na'ayenɛ n sɔe tomam Israel teŋa nɛreba wa. Te a wa'an na soŋɛ a nɛreba to'e ba bahɛ. 69Ge a bahɛ te faanra se'em n kpe'em wa'an to zen'en na. Faanra la me dela enŋa Na'ayenɛ yameŋa David yaaŋa. 70Wo Na'ayenɛ n bahɛ te a toolom nɔtɔgɔheba sɛba n tone bɔ'ɔra en, yele yuuma yuuma ha se'em la. 71Se'ere n sɔe, te a eŋɛ bala daa dela a wan to'e to bahɛ to diŋdoma zen'enhe la nɛresɛba woo n yaɛ tɔ la nu'uhe. 72Dene poan, a wan zɔ' ninbɔn'ɔn bo to sɔyaabdoma ge me tɛn'ɛra a mɛŋa toolom nɔbiŋere la. 73Se'ere te a biŋe bo to sɔyaaba Abraham, ge pɔ' pɔtɛ 74te a wan fan' tɔ bahɛ te diŋdoma nu'uhen. Ge bahɛ te to tona bɔ'ɔra en ge te dabeem kan tara tɔ. 75Te bala te to wan dɛna tontɔɔdoma la toolom doma a nɛŋan wo to kɔ'ɔn bɔna wa. 76Ge hon, mam bia wa, nɛreba wan yi' ho Na'ayenɛ se'em n gane zan'an wa nɔtɔgɔha. Te hon wan tole to Daana la nɛŋan la ho ta maahom sore bo en. 77Ge yɛta a nɛreba te a wan dɛna ba faanra yɛhera la en yeti a bahɛ la ba yelebe'ero bo ba. 78Se'ere n sɔe la, te Sɔ' Na'ayenɛ suunre n kɔ'ɔn tɛn'ɛha la to som ma'an la zuo. Te a han bahɛ te wontɛɛŋa zom na, 79la wan nɛɛ bo sɛbadoma n boe lika poan, tɛn'ɛha te ba wan ki' la. A me wan gu' to te to tara sunma'ahom to bɔŋa poan. 80Te bia la daa zo'e ge te Yenɛ Sea la daa bɔna la en. Ge te a bɔna pɔgɔtia ha tara tara te dabaherɛ la ta paɛ te a dekɛ a mea kɔ'ɔn wa'ana bɔna Israel teŋa nɛreba zen'an.

will be added

X\