Malema 8

1Na'ayenɛ tɔgɛ bo Moses yeti, 2Tare Aron la a dayɔɔhe la ba toolom futo la soa kaam la be'em bo'olom lɔlega la peraahe seyi' la boroboro sebo n ka tare mi'ihom pi'ɔ la na 3ge lagahɛ nɛreba la zan'an Sogorɛ la nɔɔrɛn na. 4Te Moses eŋɛ Na'ayenɛ n yele en se'em la. Te nɛreba la zan'an lagahɛ Sogorɛ nɔɔrɛn la na. 5Te Moses yele nɛreba la yeti, Na'ayenɛ n bo nɔse'ere n wana. 6Te Moses tare Aron la a dayɔɔhe la tole nɛŋa na, sɔ ba ko'om, 7dekɛ toolom futo la yɛ Aron, lo' a sea tanɛ la, bagɛ en la fuwoko la, fugiriga yɛ dɔgɔlɛ en, dekɛ de sɛganɛ la te ba wogɛ kpa' dɛ golɛ la tare na lo' a sea te ko nyɔkɛ. 8Ge te a dekɛ nyɔn'ɔn zuo tanɛ la yɛ' en, dekɛ Urim la Tumim la su' tanɛ la funiho la poan, 9ge dekɛ zuo tanɛ la vuge a zuo, nya dekɛ sanlema n dekɛ kure bonlamehega la n de toolom bonɔ la labelɛ tanɛ la nɛŋa tontɔɔ, wo Na'ayenɛ n pon bo Moses a nɔɔrɛ se'em la. 10Te Moses nya dekɛ toolom kaam la sɔ' Sogorɛ la, la sɛla woo n boe ko poan, te ba dɛna toolom bonɔ, 11ge eŋɛ kaam la bosebo miihe kaanbegɔ daka la sugumnɔɔren boyopɔe, la lɔgɔseto woo n tare tona ka tooma la, la nyɔgom laa la n de peere laa la, la ka zɛ'ɛlega la, sɔ' ba te ba dɛna toolom bonɔ. 12Ge te a ka'ɛ soa kaam la bosebo yeele Aron zuo, sɔ' en te a dɛna toolom nɛra bo Na'ayenɛ. 13Te Moses tare Aron dayɔɔhe la me tole nɛŋa na, dekɛ toolom futo yɛ ba, lo ba sea tana la, dekɛ zuo tana la me vuge ba wo Na'ayenɛ n bo Moses a nɔɔrɛ se'em la. 14Te a nya tare be'em bo'olom lɔle la na, te Aron la a dayɔɔhe la dekɛ ba nu'uhe pagalɛ ka zuo. 15Te Moses kɔrɔgɛ lɔle la, eŋɛ ka ziim la la a nu'dibila miihe kaanbegɔ daka la iila la te a duuhe ka, ge ka'ɛ ziim sebo n gee la yeele daka la teŋa na. A eŋɛ ka se'em te ka dɛna toolom bonɔ n bala. A duuhe ka se'em n bala. 16Te Moses yehe kaam la n pin' lɔle la pooren lɔgɔrɔ la, la soloŋo la fiin la sɛyiga ayi' la kaam sebo n pin' a la zan'an nyɔ' ba kaanbegɔ daka la zuo. 17Ge lɔle la nɛnɔ la, ka ganɛ, la ka pooren lɔgɔrɔ la woo, a tare yehe la tiiheŋɔ la kenkɛleŋa ha ta nyɔ' ba toolom zen'an bilam ha, wo Na'ayenɛ n bo en nɔɔrɛ se'em la. 18Te Moses loe peraa la kayema n de nyɔ'an bo'olom la, te Aron, la a dayɔɔhe la dekɛ ba nu'uhe pagalɛ ka zuo. 19Te Moses kɔrɔgɛ ka, ka'ahɛ ka ziim la yeele kaanbegɔ daka loga mum, 20ge ŋma kɔ nɛndaahe, nyɔ' ko zuo la, la nɛndaahe la, la ko kaam la. 21A pee ko pooren lɔgɔrɔ la mɛ la ko bɛɛhe la mɛ la ko'om, dekɛ pa'ahɛ nɛnɔ la woo poan nyɔ' tɔ kaanbegɔ daka la zuo, te la dɛna nyɔ'an bo'olom, zun'uhe n tare nyuŋo soŋɔ, kaanbegɔ nyɔ' bo Na'ayenɛ, wo Na'ayenɛ n bo Moses a nɔɔrɛ se'em la. 22Ge te a nya dekɛ peraa sɛka n de soa malema peraa la, te Aron la a dayɔɔhe la dekɛ ba nu'uhe pagalɛ ko zuo. 23Te Moses kɔrɔge ka, eŋɛ ka ziim la tɛ'ɛn Aron zuɔ toberɛ teŋa na, la a zuɔ nu'dibidɔɔ, la a zuɔ na'dibidɔɔ. 24Ge te a tare Aron dayɔɔhe la me na eŋɛ ziim la tɛ'ɛhɛ ba zuɔ toba teŋa na, ba zuɔ nu'dibidɔɔrɔ, la ba zuɔ na'dibidɔɔrɔ. Ge ka'ahɛ ziim la yeele daka la loga mum. 25Te a yehe peraa la kaam, ka zoku'urɛ, la kaam sebo n pin' ka pooren lɔgɔrɔ la, soloŋo la fiin, la sɛyiga ayi' la, la kaam sebo woo n ba la, la ka zuɔ gbere. 26Ge yehe boroboro la te mi'ihom ka bɔna a poan te a bɔna pi'ɔ poan Na'ayenɛ nɛŋan la, a loe kaam boroboro ayema la boroboro bonpegehe ayema, pagalɛ kaam nɛnɔ la zuɔ gbere la zuo, 27nya dekɛ lɔgɔtona eŋɛ Aron la a dayɔɔhe la nu'uhen, te ba zɛnkɛ tɔ pa'alɛ Na'ayenɛ, te to dɛna pa'alegɔ bonɔ. 28Te Moses to'ohe to ba nu'uhen dekɛ tɔ pagalɛ kaanbegɔ daka la zuo, nɛnɔ seto n pon paga bini la zuo, nyɔ' te la dɛna soa malema bo'olom n nyɔ' bo Na'ayenɛ. 29Ge te a dekɛ soa malema peraa la nyɔn'ɔn n de a tɔntɛ la, zɛnkɛ tɔ Na'ayenɛ nɛŋan pa'alɛ, te la dɛna pa'alegɔ bonɔ, wo Na'ayenɛ n bo Moses a nɔɔrɛ se'em la. 30Te Moses nya dekɛ soa kaam sebo la vaɛ ziim la bosebo kaanbegɔ daka la teŋa, dekɛ miihe Aron la toolom futo la, ge miihe Aron dayɔɔhe la me la ba toolom futo la. 31Te Moses nya yele Aron la a dayɔɔhe la yeti, Dogɛ ya nɛnɔ la Sogorɛ nɔɔrɛ la na, la ya obe to bilam la boroboro la n boe pi'ɔ la poan dɛna soa malema bonɔ la. Ya obe to wo nɔɔrɛ la n bo se'em yeti, Aron la a dayɔɔhe la wan dita di kaŋa la. 32Nɛnɔ la bii boroboro la han gee, ya nyɔ' ba. 33Da makɛ yehe Sogorɛ wa yeŋa gura dabeha ayopɔe. Ya kura te soa malema dabeha la ta ba'ahɛ. Se'ere n sɔe la, Na'ayenɛ dekɛ la dabeha ayopɔe te a dɛna ya soa malema la dabeha. 34Na'ayenɛ n bo nɔɔrɛ te la eŋɛ wo lan eŋɛ zina se'em wa. N kaanbɛ be'em duuhego ya zuo. 35Ya da makɛ yehe Sogorɛ la yeŋa na, bolika yɛ'a yu'uŋɔ te dabeha ayopɔe ta ba'ahɛ, tona Na'ayenɛ n bote se'em la la ya da ki, wo Na'ayenɛ n bo mam a nɔɔrɛ se'em la. 36Te Aron la a dayɔɔhe la eŋɛ sɛla woo wo Na'ayenɛ n bo Moses a nɔɔrɛ se'em la.

will be added

X\