Malema 7

1Lebehe yɔ' bo'olom la pa'alegɔ n wana. La dela toolom bonɔ. 2Lebehe yɔ' bo'olom la kɔrɔgere la zen'en te nyɔ'an bo'olom la kɔrɔgera la, te bo ziim dekɛ ka'ahɛ yeele kaanbegɔ daka la loga kae. 3Bo kaam zen'enhe, bo zuku'urɛ, la kaam sebo n paanrom bo pooren lɔgɔrɔ la, 4sɛyiga ayi' la, la kaam sebo n lɛm ba na la, la soloŋo la zen'sɛka n lɛm la la sɛyiga la. 5Malemadaana la wan nyɔ' bana wa la daka la zuo, te la dɛna nyɔ'an kaanbegɔ bo Na'ayenɛ. Kaanbegɔ kona dela lebehe yɔ' bo'olom. 6Bodibila woo n de malemadaana yire nɛra ka kihire, ge ba dita ka toolom yire zenzaka la poan. Ka dela toolom dia. 7Pa'alegɔ kona mea n boe bo be'em bo'olom la lebehe yɔ' bo'olom la. Bo'olom la sɛla n ne gee la dela malemadaana se'em n to'e bo kaanbɛ be'em duuhego la denɛ. 8Malemadaana la han kaanbɛ se'em nyɔ'an bo'olom, ganɛ la dela malemadaana la denɛ. 9Boom bo'olom sebo woo n sɛn', bii dugɛ dokɔ poan, bii kiim sarɛ poan tare na, sɛla n gee la dela malemadaana se'em n to'e kaanbɛ la denɛ. 10Boom bo'olom sebo woo n gɛnregɛ la kaam, bii ka gɛnregɛ la kaam, dela Aron dayɔɔhe la zan'an denɛ. 11Pa'alegɔ seko n boe sunma'ahom bo'olom te nɛra wan tare na bo Na'ayenɛ n wana. 12Nɛra han bɔ'ɔra bo'olom bona wa te bo dɛna la a farafara bɔ'a, sɛla te a wan tara pa'ahɛ a farafara bɔ'a bo'olom la poan dela, boroboro n ka tare mi'ihom yeele kaam la kaam boroboro n ka tare mi'ihom la boroboro ka'ɛ kaam yeele a. 13Sɛla n pa'ahere a sunma'ahom bo'olom la n de fara bɔ'a bo'olom la poan dela, boroboro n tare mi'ihom. 14A loe lɔgɔtona wa woo koyena koyena, te la dɛna a soŋorɛ n bala bo Na'ayenɛ. Lɔgɔtona wa dela malemadaana se'em n dekɛ bo bo'olom ziim la ka'ahɛ yeele kaanbegɔ daka la. 15Sunma'ahom bo'olom wa n de fara bɔ'a bo'olom wa nɛnɔ la obere la de daarɛ mea. A daana da gee to ze'ele yelegɛ beere. 16Ge a bo'olom la han dɛna la nɔpo'ologɔ bo'olom bii a popeelom bo'olom, a di bo dia la kaanbegɔ daarɛ mea, bo sɛla han gee yelegɛ beere, a ta'an di. 17Bo'olom la nɛnɔ seto han gee paɛ dabeha atan' daarɛ a nyɔ' tɔ. 18Sunma'ahom bo'olom la nɛnɔ han paɛ dabeha atan' te se'em obe to, Na'ayenɛ kan to'e se'em n bo bo la. A daana ka bo sɛla. A bo'olom la pɔn'ɛn mɛ, te hom se'em n di bo kan keŋɛ fai. 19Kaanbegɔ nɛŋɔ han kalom ganleŋɔ lɔkɔ, ko kan le obe. Ko nyɔ'anre mɛ. Ge han dɛna nɛŋɔ yoo n kalom kihire lɔkɔ, toolom nɛra ta'an obe. 20Ge nɛra yoo han obe sunma'ahom bo'olom nɛnɔ seto n de Na'ayenɛ denɛ la, ba ŋmaɛ n Israel buuri la poan bahɛ. 21Se'em han kalom kihire lɔkɔ, wo nɛra dɛngerɔ, bii duŋsɛka n de ganleŋɔ, bii sɛla woo n de kihire, ge obe sunma'ahom bo'olom kaanbegɔ nɛnɔ la n de Na'ayenɛ denɛ la, ba ŋmaɛ en Israel buuri la poan bahɛ. 22Te Na'ayenɛ tɔgɛ bo Moses yeti, 23Yele Israel nɛreba wa yeti, ba da obe nahɔ, bii pehego, bii boa kaam. 24Ba da obe duŋa n ki, bii sɛla n ko ka kaam. Ba ta'an dekɛ ka kaam la eŋɛ sɛla, ge ba da di bo. 25Se'em n obe duŋa kaam sebo n de ba nyɔ' bo Na'ayenɛ kaam, ba ŋmaɛ en Israel buuri poan bahɛ. 26Yamam n boe zen'an woo, ya da di niiŋa, bii duŋa ziim. 27Se'em woo n di ziim, ba ŋmaɛ en Israel buuri poan bahɛ. 28Te Na'ayenɛ tɔgɛ bo Moses yeti, 29Yele Israeldoma wa yeti, ba se'em han tare sunma'ahom bo'olom wa'an Na'ayenɛ zen'an na, a yehe sɛla bo poan bo Na'ayenɛ. 30A daana zanla bo'olom sebo te a wan nyɔ' bo Na'ayenɛ la a nu'uhen na. A yehe duŋa la kaam, la ka nyɔn'ɔn na, zɛnkɛ ka nyɔn'ɔn la saazuo Na'ayenɛ nɛŋan, te la dɛna pa'alegɔ. 31Malemadaana la wan nyɔ' kaam la kaanbegɔ daka la zuo, ge nyɔn'ɔn la dela Aron la a dayɔɔhe la denɛ. 32Ya ne yehe sunma'ahom bo'olom duŋa la zuɔ gbere bo malemadaana la te la dɛna ho soŋorɛ bo'olom. 33Aron dayɔa sɛka n to'e sunma'ahom bo'olom la ziim la kaam ta kaanbɛ la tɔntɛ dela zuɔ gbere. 34Mam to'e Israeldoma sunma'ahom bo'olom duŋa woo nyɔn'ɔn n wan zɛnkɛ pa'alɛ la, la zuɔ gbere la n ne dekɛ bo la, bo la Aron n de malemadaana la, la a dayɔɔhe la te la dɛna ba tɔntɛ saŋa woo Israel buuri wa zen'an. 35Bo'olom sebo n ne dekɛ nyɔ' bo Na'ayenɛ la poan, nɛnɔ tona n dekɛ bo Aron la a dayɔɔhe la, daanse'ere daarɛ te ba yehe ze'ele te ba dɛna malemadoma tona bɔ'ɔra Na'ayenɛ la. 36Daanse'ere daarɛ te Moses sɔ' ba la kaam, te Na'ayenɛ bo Israeldoma wa nɔɔrɛ yeti, ba bɔ'ɔra malemadoma la nɛnɔ tona wa saŋa woo ba bo'olom woo poan, ba buuri saŋa woo poan. 37Pa'alegɔ kona n ze'ele bo nyɔ'an bo'olom la boom bo'olom la be'em bo'olom la lebehe yɔ' bo'olom la soa bo'olom la sunma'ahom bo'olom la, 38te Na'ayenɛ pa'alɛ Moses Sinai Zoore la zuo, daanse'ere daarɛ te a bo Israeldoma wa nɔɔrɛ Sinai pɔgɔtia la poan te ba woo tare bo'olom na bo Na'ayenɛ la.

will be added

X\