Malema 5

1Nɛra han nyɔhegɛ doohe la a nini n nyɛ se'ere bii a mi' la yelese'ere te de wa'an yetɔgom na te ba yi' en te a dɛna seradaana, te a ka sakɛ, a nyɔhegɛ mɛ. A daana tare la yele. 2Nɛra han ka baŋɛ ge kalom sɛla n de dɛngerɔ lɔkɔ, wo mɔen bii yiren duŋsɛka te a kiha n ki, bii bonvuula n ki, a nyɔhegɛ mɛ. La dela nyɔhegerɛ. 3Nɛra han ka baŋɛ ge kalom nɛra sɛla n de ganleŋɔ bonɔ ganlom mɛ, la n pon ka baŋɛ la. A han ta baŋɛ, la dela nyɔhegerɛ. 4Nɛra han ya'ɛ a nɔɔrɛ yeen tɔgɛ te a eŋɛ sɛla, bii a biŋe la nɔɔrɛ yoo te a eŋɛ sɛla ge nya ta tɛɛn a ka baŋɛ te a ka eŋɛ soŋa, a nyɔhegɛ mɛ. 5Nɛra han nyɔhegɛ yele ana wa poan, a yele a n nyɔhegɛ se'ere la, 6ge nyɔkɛ pesa'arɛ bii bosa'arɛ a duŋbɔɔnlɔgɔ poan tare na, te ka dɛna a nyɔhegerɛ la bo'olom. Te malemadaana la kaanbɛ be'em duuhego bo a be'em la. 7A daana han kan ta'an bo pehego, a tare dayɛma ayi' bii nadoma dayɛma a yi', na bo Na'ayenɛ a be'em la zuo, te deyema dɛna be'em bo'olom te deyema dɛna nyɔ'an bo'olom. 8A tare a wa'ana bo malemadaana la, te a loe deyema kaanbɛ be'em bo'olom. A ŋmɛlegɛ de zuo kɔ' deyugula ge kɔ'ɔn da fike ko, 9la a dekɛ be'em bo'olom dayenɛ la ziim yɔɔhɛ kaanbegɔ daka la logorɛ, ge te ziim sebo n gee la yɔɔhɛ bahɛ ka teŋa na. La dela be'em bo'olom. 10Malemadaana la doohe yia pa'alegɔ la la a dekɛ deyema la kaanbɛ, te denɛ dɛna nyɔ'an bo'olom kaanbegɔ, la a duuhe a daana n tom be'em sebo la bo en, te Na'ayenɛ bahɛ a be'em la bo en. 11A daana han kan ta'an bo dayɛma ayi' la nadoma dayɛma ayi' la, a tare kisoma zom somɔ wola me'en te la dɛna be'em bo'olom. A da eŋɛ kaam la digilom dɔgɔlɛ bo zuo. Se'ere n sɔe la bo dela be'em bo'olom. 12A tare wa'an malemadaana la zen'an na te a tɔbegɛ bɔ la nu'o me'en te la dɛna tɛnrega bonɔ, te a nyɔ' bɔ kaanbegɔ bo'olom la en page kaanbegɔ daka la zuo te ba nyɔ' bo Na'ayenɛ la. La dela be'em bo'olom. 13Malemadaana la n wan duuhe nɛra n tom be'em bona wa taaba la be'em se'em n bala, te Na'ayenɛ wan bahɛ a be'em bo en. Sɛla n gee a bo'olom la poan la dela malemadaana la denɛ, wo boom bo'olom n ane se'em. 14Na'ayenɛ tɔgɛ bo Moses yeti, 15Se'em han ka baŋɛ ge eŋɛ sɛla te la dɛna la a ganlom la Na'ayenɛ toolom lɔgɔseko, a daana nyɔkɛ peraa a duŋbɔɔnlɔgɔ poan te sɛsɛla ka eŋɛ kɔ, tare na te la dɛna a lebehe yɔ' bo'olom. Ko ligiri zona Sogorɛ la poan n pa'alɛ ligiri se'em la. 16La dela a lebehe maalɛ enŋa n ganlom toolom lɔkɔ la sɔrɔɔ seko poan la, ge n yɔ lɔkɔ la n zone se'em la porogerɛ boyena porogerɛ bonuu poan pa'ahɛ lɔkɔ la poan bo malemadaana la, te a dekɛ peraa la n de a lebehe yɔ' bo'olom la kaanbɛ be'em duuhego bo en, te Na'ayenɛ wan bahɛ be'em bo a daana. 17Se'em han nyɔhegɛ tom ganlom Na'ayenɛ nɔse'ere, a daana han pon ka baŋɛ, a kelom gee mɛ. A daana tare la yɛla. 18A nyɔkɛ peraa a duŋbɔɔnlɔgɔ poan te sɛsɛla ka eŋɛ kɔ, tare na bo malemadaana la te ko dɛna a lebehe yɔ' bo'olom. Pehego ligiri zona wo Sogorɛ la poan n pa'alɛ se'em la. Malemadaana la n wan duuhe nɛra la be'em la te a ka baŋɛ ge tom la se'em n bala, te Na'ayenɛ wan bahɛ a be'em bo a daana. 19La dela lebehe yɔ' bo'olom. A ganleŋɔ la dela a ton la be'em Na'ayenɛ zen'en.

will be added

X\