Malema 26

1Ya da mɛ' bagarɛ bii sɛla wɔnhom bii tanhe n boe yogoro poan, ya da kaanbera ba. Mam de Na'ayenɛ ya Yenɛ la. 2Tɛnre ya Vo'ohogo Dabaherɛ la, ge nana mam yire la. Mam dela Na'ayenɛ. 3Ya han nam mam malema la n nɔya la, 4Mam wan bahɛ te saa nii la n naare se'em te dia maalɛ te tiihe wɔm wale. 5Ya wan kɛ' dia la bala ta paɛ burega, te dia bɔna te ya tara disɛka te dita ge bɔna fai. 6Mam wan bahɛ te sunma'ahom bɔna ya teŋa wa poan, te gan'an te dabeem ka bɔna. N wan sa'ɛ mɔen bonbɛ'ɛhe, ge te zaberɛ kan bɔna ya teŋa la poan. 7Ya wan tana ya diŋdoma, ne ko' ba te ba zɔ. 8Ya nɛreba ya banuu wan nyaŋɛ nɛreba kɔbega te ya nɛreba kɔbega nyaŋɛ nɛreba tuhure pia ge mɛ wan ko' ya diŋdoma. 9Mam wan sɔna ya behera ge bahɛ ya nɔbɛ ge wi'ɛ, te n dekɛ nɔbiŋere bo ya. 10Ya wan di dikɛka ta paɛ di pa'ala, ne vaɛ dikɛka ge tee dipa'ala. 11Mam wan bɔna la ya ge kan zagahe ya. 12Mam wan dɛna ya Yenɛ dɔla ya poore te ya dɛna n nɛreba. 13Mam dela Na'ayenɛ ya Yenɛ se'ere n tare ya yehe Mizraim teŋa la poan na, te ya kan le dɛna da'aba n wan kɔ' yelese'a n yɔgɛ ya la bahɛ ge bahɛ ya te ya tara zutebehom. 14Ge ya han ka dɔla mam nɔya ko na wa zan'an. 15Ya han zagahɛ mam malema la ge tue mam nɔze'elego la ka dɔla mam nɔɔrɛ la ganlom mam nɔbiŋere la, 16mam yeti n tom ya se'em wana, n wan bahɛ namehegɔ, la ban'an n ka tare tebegɔ, la iŋsɔn'ɔre, la fɔ'ɔlom sige ya zuto. Ya wan bure bahɛ wo. Se'ere n sɔe la ya diŋdoma wan di dia. 17Mam wan yehe n nɛŋa ya poan, te ya diŋdoma la ko' ya ge ya bɛ'ɛ ba wan sɔe ya behera te ya ta wom ba dama ya wan zɔ kan ze'ele. 18Te yele ana mea poore la ya han kelom ka nam mam, n wan bahɛ te namehegɔ sige ya zuto, ya be'em wo tare la namehegɔ sugumnɔɔren boyopɔe. 19Mam wan sagom ya tobeka wɔŋa paŋa la bahɛ. N kan bahɛ te saa ni, ya teŋa la wan ku'ɛ wo kurugo la. 20Ya wan tom la ya paŋa bahɛ woo. Se'ere n sɔe la dia kan le maalɛ ya samana la poan te ya tiihe la mɛ kan le wom wala. 21Ya han kpɛrɛ ya toba zagahɛ mam, n wan pa'ahɛ ya tɔɔ la sugumnɔɔren boyopɔe. 22N wan bahɛ te bon nyogela doma ko' yamam la ya dayɔɔhe la dunhe. Ge te ya gee fiin, te nɛreba kan le dɔla ya sɔrɔtɔ la zuo. 23Te yele ana wa han eŋɛ ya ge te ya sina ge kpɛrɛ toba la mam. 24Mam wan bahɛ te la wɔŋɛ ya ge be'em sebo wo te ya tom n wan namehe ya sugumnɔɔren boyopɔe. 25Mam wan bahɛ te sɔ'a sige ya zuo la yan zagahɛ mam nɔbiŋere la. Te ya han ta lagahɛ ya teŋa la poan n wan bahɛ te tɔɔ sige ya zuo, ge dekɛ ya eŋɛ ya diŋdoma nu'uhen. 26Mam wan bahɛ te dia pɔ'ɛ ya pɔgɔba, te ba pɔgɔhe pia wan lagom dogora dan'an yeŋa poan, ge te ya dia kan tara tebehom, ya wan dita ge ka malom tegɛ. 27Te yele ana wa han eŋɛ ya ge te ya sina ge kpɛrɛ toba la mam, 28n wan bahɛ te n sunsunyiim sige ya zuo, ge te be'em sebo wo te ya tom, n wan namehe ya la sugumnɔɔren boyopɔe. 29Ya wan obe ya kɔma nɛnɔ. 30Mam wan sagom ya baga la n boe zoa zuo la ha, la ya bimbina la, ge vaɛ ya kum pagelɛ ba zuo. N wan tom dela sunsuntoolɛ. 31Mam wan bahɛ te ya teŋhe la, la ya kaanbegɔ zen'enhe la lebege dabooro ge mɛ pon ka bota ya kaanbegɔ. 32Mam wan sagom ya teŋa la, te la eŋɛ ya diŋdoma la n sooɛ teŋa la pakere. 33Mam wan bahɛ te zabere sige ya zuo te ya zɔ yeregɛ ge te ya teŋa la sagom gan'an. 34Ya wan ta bɔna ya diŋdoma la teŋa la poan ge ya teŋa gan'an vo'oha. 35Yan boe teŋa la poan la, ka daa ka nyɛte vo'ohogo ge ka nya wan nyɛ vo'ohogo. 36Ya sɛba woo n boe diŋdoma la teŋa la poan la, n wan bahɛ te dabeem kɛn' ya suunre poan te sabeeo han kae vo'ɔ te ko damɛ te ya wɔm ya wan zɔ mɛ woo ba digere ya la zabere poan la. 37Ya wan zɔ nɛ taaba wo ba digere ya la zabere poan ge ka ta'an ze'ele zabɛ la ya diŋdoma la. 38Ya diŋdoma la wan ko ya te mɛlom teŋa wa zuo. 39Yamam la ya sɔyaabdoma be'em la zuo, ya sɛba n boe diŋdoma la teŋa la poan wan ki bahɛ yoo. 40Ya han wan pore ya be'em la ya sɔyaabdoma be'em sebo te ba tom la, ba tobekperega te ba eŋɛ la. 41Mam bahɛ ya te ya bɔna diŋdoma la teŋa la poan la ya tee ya potɛn'ɛra bahɛ ya be'em la. 42Mam wan tɛnra n nɔbiŋere se'ere te n biŋe bo Yakob la Isaak la Abraham, la teŋa la. 43Ya ka dole mam malema la n nɔze'elego la zuo n sɔe te n bahɛ te ya teŋa la gan'an vo'oha. 44Mam dela Na'ayenɛ ya Yenɛ, la ya pon bɔna ya diŋdoma teŋa la poan la, Mam kan sakɛ ko ya zan'an ge te n nɔbiŋere la bahɛ yoo. 45Mam wan tɛnra n nɔbiŋere se'ere te n tare la ya sɔyaabdoma la, mam tare ba ze'ele Mizraim teŋa la poan yehe na te n dɛn ba Yenɛ mam dela Na'ayenɛ. 46Te malema la nɔze'elego la pa'alegɔ sɛka te Na'ayenɛ tɔgɛ bo Moses Sinai Zoore zuo ha, te a yele Israeldoma la n wana.

will be added

X\