Malema 24

1Te Na'ayenɛ tɔgɛ bo Moses yeti, 2Bo Israeldoma wa nɔɔrɛ yeti, ba tare kaam somɔ na te ba tara bomɔ lameha butoleladoma la n ze' Sogorɛ la poan la daarɛ woo. 3Aron wan ne laŋɛ butoleladoma la ze'ele Sogorɛ la poan toolom tanɛ la nɛŋan na, te bugum la dita bolika la zanɔɔrɛ woo Na'ayenɛ nɛŋan. 4A bahɛ te butoleladoma la n suge sanlema bugum zɛ'ɛlega la zuo dita saŋa woo Na'ayenɛ nɛŋan. 5Ho eŋɛ zom somɔ maalɛ boroboro pia la ayi' te boroboro woo dɛna zom wolehe seyi'. 6Te ho dekɛ boroboro wa biŋe gɛɛrehe seyi', gɛɛreŋa woo boroboro ayoobe. 7Ge dekɛ digilom pagalɛ gɛɛreŋa woo zuo, te boroboro la dɛna dia tɛnrega bo'olom, dɛna bo'olom n nyɔ' bo Na'ayenɛ. 8Vo'ohogo Daarɛ woo a ne maahom lɔgɔtona biŋe Na'ayenɛ nɛŋan saŋa woo. Ete kona wa dela mam nɔbiŋere bɔna la Israel buuri saŋa woo. 9Dikana wa dela Aron la a dayɔɔhe ma'an denɛ, te ba wan zin'ita toolom zen'an la poan ma'an dita ka. Dikana wa dela toolom dia n nyɔ' bo Na'ayenɛ. Aron tɔntɛ n bala saŋa woo. 10Israel buuri pɔka kayema bia sɔ n de Mizraim teŋa nɛra. Te bia wa yehe daarɛ deyema ta bɔna la Israel nɛreba. Te Israel pɔka wa bia wa kɔ' zaberɛ la Israel nɛra ba tiiheŋɔ zen'an la poan. 11Te Israel pɔka la dayɔa wa porɛ Na'ayenɛ yu'urɛ la yoo, kɛhɛ yu'urɛ la. Te ba tare en wa'an Moses zen'an na. Boraa wa ma la yu'urɛ dela Selomit, dɛna Dan yizuo boraa Dibri pɔyɔa. 12Te ba pagɛ boraa wa ge yeti ba behɛ Na'ayenɛ n bo ba nɔse'ere. 13Te Na'ayenɛ tɔgɛ bo Moses yeti, 14Tare ya boraa wa n kɛhɛ mam wa yehe tiiheŋɔ la kenkɛleŋa ha la ya bahɛ te sɛba n wom en kɛhɛ mam yu'urɛ la dekɛ ba nu'uhen pagalɛ a zuo ge yele en eŋɛ se'em la ge te nɛreba lobe en ko. 15Yele Israeldoma wa yeti, Se'em han kɛhɛ a Yenɛ wa yu'urɛ a daana wan zi a be'em la namehegɔ. 16Saana bii teŋan bia han kɛhɛ Na'ayenɛ yu'urɛ wa, ba ko en. Nɛreba la zan'an lagahɛ na lobe en ko. 17Nɛra han ko nɛra, ba eŋɛ me. 18Se'em han ko a tadaana duŋa, a tee duŋa bo a tadaana la. Vom n teere vom. 19Nɛra han pɔgɔlom a tadaana, ba pɔgɔlom en wo en pɔgɔlom a tadaana la se'em la. 20Kɔ'a yɔɔre la kɔ'a, te niho yɔɔra niho, te nyɛnɛ yɔɔra yɛnɔ. Nɛra n pɔgɔlom a tadaana se'em la, ba pɔgɔlom enŋa me bala mea. 21Se'em n ko' a tadaana duŋa, a lebehe bo duŋa, ge se'em n ko' a tadaana ba lebehe ko en. 22Nɔze'elego koyena wa n boe bo ya zan'an. Koŋɔ n boe bo saana ge bo teŋan bia. Se'ere n sɔe la, mam de Na'ayenɛ ya Yenɛ. 23Te Moses yele Israeldoma la, te ba tara se'em n kɛhɛ Yenɛ yu'urɛ la yehe ba tiiheŋɔ la kenkɛleŋa ha ta lobe en ko wo Na'ayenɛ n bo Moses a nɔɔrɛ se'em la.

will be added

X\