Malema 23

1Te Na'ayenɛ tɔgɛ bo Moses yeti, 2Yele Israeldoma wa yeti, Mam loe de'enɔ seto n wana. De'enɔ seto te ya wan dɛ'ɛna bɔ'ɔra mam Na'ayenɛ n wana. 3Dabeha ayoobe te wan tara tona ya tooma, ge ayopɔe daarɛ dela Vo'ohogo Daarɛ bɔ'ɔra Na'ayenɛ. De dela toolom lagaŋɔ. Da ton ya toon toonɛ daanden daarɛ. Yamam n ta bɔna zen'an woo, daan denɛ dela Vo'ohogo Daarɛ bɔ'ɔra Na'ayenɛ. 4De'enɔ tona te Na'ayenɛ loohe. Toolom lagahegɔ seto te ya wan lagaha Na'ayenɛ nɛŋan n wana te ho wan yele bo nɛreba la. 5Na'ayenɛ Azootole De'eŋɔ la pɔhere la yuunɛ pɔhega ŋmarega dabeha pia la anaahe daarɛ zanɔɔrɛ, yentule en ta ana vɛɛn la. 6Ŋmarekana mea dabeha pia la anuu daarɛ, te Boroboro N Ka Tare Mi'ihom De'eŋɔ bɔ'ɔra Na'ayenɛ. Te dabeha ayopɔe ya wan obe boroboro se'ere n ka tare mi'ihom. 7Te de'eŋɔ wa pɔhega daarɛ dela toolom lagaŋɔ. Da tom ya toonɛ. 8Te dabeha ayopɔe la zan'an, ya nyɔn' nyɔ'an kaanbegɔ bo'olom bo Na'ayenɛ. Te dabeha ayopɔe daarɛ la dela toolom daarɛ. Da tom ya toonɛ. 9Te Na'ayenɛ tɔgɛ bo Moses yeti, 10Yele Israeldoma wa yeti, Ya han ta kɛn' teŋsɛka te n yeti, N dekɛ bo ya te ya kɛn'ɛra ka poan, ya han ta kɛ' ki'deena, ya tare yɛ'ɛha na bo'ora la malemadaana. 11Te Vo'ohogo Daarɛ la, yiimbeere te malemadaana la wan ze'ele Na'ayenɛ nɛŋan zɛnkɛ ki la saazuo yuulom, 12Te dan se'ere daarɛ te a yuulom ki ba'ahɛ la, ya wan nyɔkɛ pebila n de yuunɛ ma'an te sɛsɛla ka eŋɛ ka, la ya kaanbɛ nyɔ'an bo'olom bo Na'ayenɛ. 13Te ki bo'olom la dela ki somɔ zom, wolehe seyi' te ya nɔm bɔ la kaam la daam la yugela te ya kaanbɛ nyɔ'an bo'olom bo Na'ayenɛ te la dɛna nyuŋo soŋɔ. 14Ya da di ki bii ki' kiinma bii boroboro la han dagana la ya tare ki'deena mɛ wa'ana kaanbɛ bo Yenɛ. Yele dɛna wan bɔna la yamam la ya yaahe se'ehe n wan ta wa'ana la poan. 15Dabse'ere daarɛ te ya tara ki'deena zɛnkɛ bo ba'ahɛ la, ya kan'anlɛ Vo'ohogo Dabeha ayopɔe. 16Dabeha pihinuu daarɛ han paɛ, ya wan tara boom bo'olom ayema bo Na'ayenɛ. 17Ya bɔŋa zen'an woo, ya eŋɛ zom somɔ wolehe seyi' maalɛ boroboro n tare mi'ihom te la dɛna dideena te ya bun tare na bo Na'ayenɛ te la dɛna zɛnkɛ kaanbɛ bo'olom. 18Ya nyɔkɛ pebihe seyopɔe n de yuunɛ, la lɔlega, la peraahe seyi' te sɛsɛla ka tara ba, la ya pa'ahɛ ya ki bo'olom la ya daam bo'olom la poan la ya kaanbɛ nyɔ'an kaanbegɔ bo'olom Na'ayenɛ te la tare nyuŋo sonɔ. 19Ya nyɔkɛ botela te la dɛna be'em kaanbegɔ bo'olom ge nyɔkɛ pedibihe seyi' n de yuunɛ ma'an te la dɛna sunma'ahom kaanbegɔ bo'olom la ya kaanbɛ. 20Te malemadaana wan to'e boroboro la pedibihe seyi' zɛnkɛ saazuo Na'ayenɛ nɛŋan te la dela toolom bonɔ bo Na'ayenɛ ge dɛna malemadaana la denɛ. 21Daanden daarɛ dela toolom lagaŋɔ. Da tom ya toonɛ. Te yele dɛna wa bɔna la bala yamam la ya tuunhom zen'en woo te ya bɔna. 22Ya han ne bum dia ya samana la poan, ne gee ya bahɛ, da lebe ya bini ta yi'ihɛ, bahɛ ya ka bo nahadoma la saana. Te mam dela Na'ayenɛ ya Yenɛ la. 23Te Na'ayenɛ tɔgɛ bo Moses yeti, 24Yele Israeldoma la yeti, Ŋmarehe seyopɔe pɔhega daarɛ dela Vo'ohogo Daarɛ. La dela toolom lagaŋɔ te ya han ta wom tentana peebere la. 25Da tom ya toonɛ, ge ya tara kaanbɛ bo'olom na nyɔ' bo Na'ayenɛ. 26Te Na'ayenɛ tɔgɛ bo Moses yeti, 27Te ŋmarehe seyopɔe poan ka dabeha pia daarɛ la, dela Be'em Duuhego Daarɛ. La dela toolom daarɛ te ya wan tara ya kaanbegɔ bo'olom na nyɔ' bo Na'ayenɛ. 28Se'em da tom toonɛ Be'em Duuhego Daarɛ la poan, te la dela dabaherɛ se'ere te ya yeti ya suhɛ Na'ayenɛ ya Yenɛ la te a duuhe ya be'em bo ya. 29Se'em n ka zagahɛ a mɛŋa de daarɛ dela ba ŋmaɛ a daana n nɛreba poan bahɛ. 30Se'em han zagahɛ ge tom tooma de daarɛ mam wan ko' en. 31Ya da pon makɛ tom toonɛ. Malema ana n wan bɔna yamam la ya tuunhom zan'an, ya n zen'sɛka woo. 32Ya mina te ŋmarega la ka dabeha awae' daarɛ zanɔɔrɛ te yenɛ ana vɛɛn ta paɛ yiimbeere zanɔɔrɛ te yenɛ ana vɛɛn dela Vo'ohogo Daarɛ bo ya ge te ya mɛ da di dia. 33Te Na'ayenɛ tɔgɛ bo Moses yeti, 34Yele Israeldoma la yeti, Ŋmarehe seyopɔe la poan ka dabeha pia la anuu daarɛ la n de Na'ayenɛ de'em seko n de Pagahe Tin'a De'eŋɔ la pɔhega daarɛ n bala, ya de'ene ko la dabeha ayopɔe. 35Pɔhega daarɛ la dela toolom daarɛ. Da tom ya toonɛ. 36Dabeha ayopɔe la zan'an la ya wan tara ya bo'olom na nyɔ'anra bɔ'ɔra Na'ayenɛ. Dabeha anii daarɛ dela toolom lagaŋɔ. Ya wan le tara nyɔ'an bo'olom na bo Na'ayenɛ. La dela ba'ahegɔ lagaŋɔ la. Da tom ya toonɛ. 37Na'ayenɛ toolom lagaŋdoma la wana ta a loe, te daarɛ woo ya tara nyɔ'an bo'olom la boom bo'olom la dunhe kaanbegɔ la daam bo'olom na bɔ'ɔra Na'ayenɛ 38la ya bo'olom woo la ya nɔpo'ologɔ bo'olom la ya popeelom bo'olom la, lagom pa'ahɛ Vo'ohogo Dabeha la poan mɛ te ya bɔ'ɔra Na'ayenɛ. 39Ya han ta bum ya samana la ba'ahɛ, ŋmarehe seyopɔe poan ka dabeha pia la anuu daarɛ la te ya wan de'em Na'ayenɛ de'eŋɔ la dabeha ayopɔe. Te pɔhega daarɛ la, la dabeha anii daarɛ la dela Vo'ohogo Dabeha. 40Te de'eŋɔ la pɔhega daarɛ la ya go'ohɛ tiihe sonɛ yila, ge kɛ' kpa'kpa' vɔntɔ, la vɔn man'aha, la ya tare yoona ge wa'ara Na'ayenɛ ya Yenɛ nɛŋan dabeha ayopɔe la zan'an. 41Yuunɛ woo ŋmarehe seyopɔe poan la, ya de'em Na'ayenɛ de'eŋɔ wa dabeha ayopɔe te la bɔna yamam la ya tuunhom poan. 42Se'em woo n de Israel nɛra wa boe la paka poan dabeha ayopɔe. 43Te ya tuunhom wa baŋɛ te mam yuun tare Israeldoma ye'ehe Mizraim teŋa la poan na la, ba yuun gan' la pusugurɔ poan. 44Te Moses yele Israeldoma la Na'ayenɛ de'eŋɔ dabeha la te a loe la.

will be added

X\