Malema 21

1Te Na'ayenɛ tɔgɛ bo Moses yeti, Yele Aron dayɔɔhe wa n de malemadoma wa yeti, malemadaana da ganlom a mɛŋa nɛra se'em kum poan, 2han dagana se'em n ba' dɛna a nɛra paɛ paɛ, wo a ma, bii a sɔ, a mɛŋa dayɔa bii pɔyɔa, bii a sɔɔn. 3Ge a tanya n ka ele, ge behera enŋa te a beha en la n nan ka ele la zuo, a ta'an ganlom a mɛŋa ena wa kum poan. 4Malemadaana da ganlom a mɛŋa la nɛresɛba n de a nɛreba doohe la deenɔ poan. A da ganlom a mɛŋa bama kum yɛla poan. 5Malemadoma da siira ba zuto, bii gɛn'ɛha ba zuto, bii tɛɛŋa, bii ba ŋmata ba iŋa. 6Ba dɛna toolom nɛreba bo ba Yenɛ la, ge da dɛngɛ ba Yenɛ wa yu'urɛ. Se'ere n sɔe la, bama n to'ore dia la nyɔ'anra bɔ'ɔra ba Yenɛ la. Bala, ba dɛna toolom nɛreba. 7Ba da di pɔgɔsɛka n tabelɛ kɛn' ganlehe tooma poan, bii tabelɛ ele ta ba lebehe ka. Se'ere n sɔe la, malemadaana dela toolom nɛra bo a Yenɛ la. 8Na'ahere ya en. Se'ere n sɔe la a boe la ba tɔka, ge me zɛ'ɛta a Yenɛ la nɛŋan bɔ'ɔra a dia la. Behere ya te ba bɔna ba tɔka. Se'ere n sɔe la, mam Na'ayenɛ dela fa'a, ge eŋɛ ya te ya dɛna toolom nɛreba. 9Ge malemadaana pɔyɔa han kɛn' ganlehe poan, ka diihe la ka sɔ la vi. Nyɔ' ya ka bugumen. 10Ge malema nɛŋadaana la, se'em n boe ba poan te soa kaam ka'ɛ yeele a zuo te a ta dɛna ba yebehe la, sɔe en te a yɛɛra malema toolom futo la, enŋa da makɛ bahɛ a zuo yirigam, bii a yɛ' sunsagaŋɔ futo. 11A da kɛn' zen'an te kum gan'an bini. A da ganlom a mɛŋa, la han pon dɛna la a sɔ, bii a mam kum poan. 12A da makɛ bahɛ Yenɛ Sogorɛ la yehe yeŋa na, bii a dɛngɛ kɔ. Se'ere n sɔe la, ba bi'ihe en mɛ, doohe la a Yenɛ soa kaam la bo a zuo la. Mam n de Na'ayenɛ. 13N wan di pɔgɔsɛka la dɛna pɔgɔsa'a kanherɛ. 14A da di pɔka n de pɔkɔɔnrɛ, bii tabelɛ ele te ba lebehe ka, bii tabelɛ kɛn' ganlehe poan. Ka dɛna pɔgɔsa'a kanherɛ. 15Bala te a kɔma kan dɛna kɔmyaalehe nɛreba la poan. Mam n de Na'ayenɛ, eŋɛ en te a dɛna toolom nɛra. 16Te Na'ayenɛ tɔgɛ bo Moses yeti, 17Yele Aron yeti, buurisaŋa se'ehe woo n kene na la, a dayɔa sɛka woo n see kan ta'an tole nɛŋa na kaanbɛ dia bo a Yenɛ. 18Nɛra se'em woo n see da lɛm na, fɔa bii kɔɔrɔŋɔ bii a nɛŋa n sagom bii wɔbega bii nɛra naanɛ n ka ane woo saala naanɛ la. 19Nɛra n tare na'yenɛ, bii nu'kiiriŋɔ bii na'kiiriŋa, 20bii bigire, bii nɛre filɛ, bii fɛnkɔ nɛra n tare nɔtɛ kɛka, bii lanɛ daaŋɔ. 21Aron buuri la poan, se'em n see, da tole nɛŋa na te a kaanbɛ bo'olom kaanbegɔ la bo Na'ayenɛ. A daana see mɛ, a da lɛm na te a kaanbɛ kaanbegɔ dia bo a Yenɛ la. 22A ta'an di kaanbegɔ disɛka n ba' dɛna toolom bonɔ la, la kaanbegɔ woo dia te ba kaanbɛ, 23ge la bala zan'an, n siin la zuo, a da paɛ tanɛ la n beŋɛ Saraa la bii a lɛm kaanbegɔ daka la, la a dɛngɛ mam bɔŋa zen'an la. Mam de Na'ayenɛ, se'em n eŋɛ ba te ba dɛna toolom nɛreba. 24Te Moses tɔgɛ yele ana woo bo Aron la a dayɔɔhe la, la Israeldoma la zan'an.

will be added

X\