Malema 20

1Te Na'ayenɛ yele Moses yeti, 2Yele Israeldoma wa yeti, Israel nɛra bii saana n kɛn'ɛre la ya han dekɛ a bia ta kaanbɛ bo Molek bagarɛ la, ya ko' a daana. Ya nɛreba la zan'an lagahɛ lobe n la kuga ko. 3Mam wan zabera la nɛre kana daana, ge ŋmaɛ en a nɛreba poan bahɛ. Se'ere n sɔe la, enŋa n dekɛ a bia kaanbɛ Molek bagarɛ la, a ganlom mam toolom yire la mɛ, ge dɛngɛ mam yu'urɛ la n de toolom yu'urɛ la. 4Ya han nyɛ te nɛra nyɔkɛ a bia ta kaanbɛ bo Molek bagarɛ wa, ge te sina ge ka ko en, 5mam mɛŋa wan zabɛ la nɛre'ena daana la a yire zan'an. N wan ŋmaɛ enŋa la nɛresɛba woo n boe a nɛreba la poan kaanbera Molek bagarɛ wa la woo ba nɛreba poan bahɛ. 6Mam wan zabera la nɛra se'em woo n ŋmɛregɛ dɔla behereba bii bagabibihedoma poore, yaala a mɛŋa la ba. N wan ŋmaɛ en a nɛreba poan bahɛ. 7Pee ya mɛhe dɛna toolom nɛreba. Se'ere n sɔe la, mam n de Na'ayenɛ ya Yenɛ. 8Tare ya mam malema la, la ya dɔla a. Mam n de Na'ayenɛ, se'em n eŋɛ ya te ya bɔna ya tɔka la. 9Se'em han zɛrɛgɛ a sɔ, bii a ma, ko' ya en. A zɛrɛgɛ a sɔ bii a ma, te a taala dole a mɛŋa. 10Se'em han nɛ a tadaana pɔga soŋen, ko' ya boraa la, la pɔka la zan'an. 11Boraa han nɛ ka sɔ pɔga soŋen, ko' ya boraa la, la pɔka la zan'an. Ba taala dole la ba mɛhe. 12Boraa han nɛ ka dayɔa pɔga soŋen, ko' ya boraa la, la pɔka la zan'an. La dela kumpiinɔ. Ba taala dole la ba mɛhe. 13Boraa han gan'arɛ boraa wo pɔka la, ba bayi' la tom la toonyaalega. Ba dela ba ki. Ba taala dole ba mɛhe. 14Boraa han di pɔka la ka ma, la dela toonfɛn'ɛherɛ. Nyɔ' ya boraa la pɔgɔhe la zan'an bugumen, te toonfɛn'ɛha aŋa taaba da pota ya poan. 15Boraa han zom duŋa wo pɔka la, ko' ya enŋa la duŋa zan'an. 16Pɔka han dekɛ ka mɛŋa bo duŋa, ko ya pɔka la la duŋa la. Ba dela ba ki. Ba taala dole la mɛhe. 17Boraa han di ka tanya te ka sɔ bii ka ma dɔgɛ zen'an ha, te ba lagom taaba, la dela zufagahom. Ko ya ba nɛreba ninin. Boraa la kɛn'ɛhɛ ka tanya la la vi. A ziire la yele n bala. 18Boraa han gan'arɛ pɔka n boe ka peere saŋa, ŋmaɛ bama bayi' la ba nɛreba poan bahɛ. Ba ganlom mɛ n bala. 19Da gan'arɛ la ma yebega, bii ho sɔ tanya. Bala sagone la buuri. Ya bayi' la ziire la yele n bala. 20Boraa han nɛ ka pogora soŋen, ka fakɛ la ka aanhema la. Ba bayi' la ziire la yele. Ba kan dɔgɛ. 21Boraa han di ka sɔɔn n nan vɔe pɔga, la dela ganlehe. A fakɛ la a sɔɔn la zuo. Ban kan dɔgɛ. 22Tare ya mam malema wa la n nɔze'elego wa, la ya dɔla a, te teŋsɛka poan te n tare ya yɛ'a wa da ta zagahɛ ya. 23Da tɔgɔhe teŋse'ehe poan nɛreba te n yeti n sa'ahɛ ba ya ninin wa malema se'a te ba dɔla la. Bama n tone toon ana wa la zuo te mam sea yehe ba la. 24Mam mɛŋa n yele yamam yeti, Ya wan sɔe ba teŋa la. N wan dekɛ ka bo ya te ka dɛna ya sɔ'ɔlom. Ka dela teŋa n zote la iilom la seerom wo ko'om la. Mam de Na'ayenɛ ya Yenɛ, ge mam yehe ya te ya bɔna ya tɔka teŋhe wa woo poan. 25Bala, ya mina yelegere duŋse'ehe n kihi la se'ehe n ka kihi, la niihe se'ehe n kihi la se'ehe n ka kihi yelegera. Da ganlom ya mɛhe la dunhe, bii niihe, bii bonvɔa sɛka woo n vuuri teŋparɛ wa zuo te mam yelege ba te ba kihi mɛ la. 26Ya dɛna toolom nɛreba bo mam. Se'ere n sɔe la mam Na'ayenɛ dela fa'a. Ge mam me yehe yamam teŋhe wa woo poan te ya dɛna mam mɛŋa denɛ. 27Boraa bii pɔka ya poan han dɛna behera, bii bagabibihedaana, ko' ya en. Lobe ya ba doma ko'. Ba taala dole la mɛhe.

will be added

X\