Malema 19

1Te Na'ayenɛ tɔgɛ bo Moses yeti, 2Yele Israeldoma wa zan'an yeti, dene ya toolomdoma. Se'ere n sɔe la, mam Na'ayenɛ ya Yenɛ la dela fa'a. 3Nɛra woo ya poan na'aha a ma la a sɔ, ge dɔla mam Vo'ohogo Dabeha la. Mam de Na'ayenɛ ya Yenɛ. 4Da ŋmɛregɛ ya dɔle baga, bii dekɛ kuto kure baga bo ya mɛhe. Mam n de Na'ayenɛ, ya Yenɛ. 5Ya han ne bɔ'ɔra sunma'ahom bo'olom la Na'ayenɛ nɛŋan, ne bo bo sɔrɔɔ seko te Yenɛ wan to'e. 6Ya dite dikaŋa la kaanbegɔ daarɛ mea la poan, la yiimbeere. Ge sɛla han kelom gee le yelegɛ beere, nyɔ' ya dikaŋa. 7Di kaŋa la sɛla han gee dabeha atan' daarɛ te ya di ka, ka tare la dɛngerɔ. N kan to'e kaanbegɔ la. 8Se'em woo n di ka la, a tara a yɛla. Se'ere n sɔe la, sagom la sɛla n dekɛ bo Na'ayenɛ. Ŋmaɛ ya a daana ya nɛreba poan bahɛ. 9Ya han ne buna dia ya samana la zuto, da ne bum ya ta paɛ samanɛ kenkɛlehe la zan'an, bii ya doohe tagehɛ. 10Da ne lebe ya ta tagehɛ ya ya vatɔ la, bii ya dɔla pin'iha ya tiihe wɔla se'a n yee zogora na la. Ne bahɛ ya ba bo nahadoma la saama. Mam n de Na'ayenɛ ya Yenɛ. 11Da zun', da parom, bii pan'ahɛ ayema. 12Da tara mam yu'urɛ pɔta ponpɔrɔŋɔ pɔtɛ, dɛngera ya Yenɛ la yu'urɛ. Mam n de Na'ayenɛ. 13Da pim ho tadaana, bii ba fan' en. Da ŋmɛkɛ ho tontona yɔɔre ho zen'en yiligɛ beere. 14Da pɔ' bo gɔɔŋɔ, bii dekɛ sɛla biŋe fɔa. Ge zote ya ya Yenɛ la. Mam n de Na'ayenɛ. 15Da lila boorɔ bii koora dole bɔ'ɔra nahadoma bii zɔta dakanpa. Gankere ya ya tadaana la n nare se'em. 16Da dole ya ɛɛra ŋma'ara taaba bɔ'ɔra taaba. Da ete ya sɛla n de ya tadaana nyɔnpɔnhega. Mam n de Na'ayenɛ. 17Da yaɛ ho sɔɔn ho suunren ha. Tanhɛ ho tadaana soŋa a tuure poan, te ho nu'o da bɔna a ganleŋɔ la poan. 18Da ɛɛra ho lerege, bii ho tara diŋɔ ho suunre poan la ho tadaana, ge ton nɔŋɛ ho tadaana wo hom n nɔŋɛ ho mɛŋa se'em la. Mam n de Na'ayenɛ. 19Dole ya mam malema la. Da tare ya dunhe yema yema te ba zɔna taaba. Da bote ya bonbuuli yema yema samanɛ deyena zuo. Da yɛɛre ya fuseko te ba dekɛ guno la kɔnberɔ wɔgɛ kɔ. 20Boraa han gan'arɛ pɔka n de da'aberɛ te ba maahena te ba dekɛ bo boraa kayema, ge nan ka yɔ to'e ka, bii ka nan ka boe fai, ya namehegɔ ba, ge da ko ba. Se'ere n sɔe la, ka ka boe fai. 21Ge boraa la tare peraa wa'an Sogorɛ nɔɔrɛn na, te ka dɛna a lebehe yɔ' bo'olom, te a bo Na'ayenɛ. 22Te malemadaana tare lebehe yɔ' bo'olom peraa la kaanbɛ be'em duuhego bo en Na'ayenɛ nɛŋan, te Yenɛ bahɛ a be'em la bo en. 23Ya han ta kɛn' teŋa la poan burɛ tiihe te, te se'ehe wɔla n dite yema yema, te se wom, ya kiha se wɔla la yuuma atan'. Ya da di se wɔla. 24Yuuma anaahe poan, wɔla la ka dɛngɛ. Wɔla la nya dela pɛnka bo'olom bo Na'ayenɛ. 25Yuuma anuu poan, ya nya dita se wɔla la. Wana te ba wan wɔna zɔ'ɔra. Mam n de Na'ayenɛ ya Yenɛ. 26Da obere ya sɛla te ziim bɔna bini. Da zamehe ya behega bii bakolo boka. 27Da gɛn'ɛhe ya ya zuto bii ya tɛɛhe. 28Da siiere ya ya iŋa zen'sɛka malona kɔɔre malema bii ya kehera ya iŋa. Mam n de Na'ayenɛ. 29Da pɔ'ɛ ya pɔyɔa la ya bahɛ te dɛna yiyɛa, ge teŋa la zan'an wan to'e la yaalegɔ la toonfɛn'ɛha. 30Tare ya mam Vo'ohogo Dabeha la, ge na'aha mam toolom yire la. Mam n de Na'ayenɛ. 31Da ŋmɛregɛ ya dɔla bagabibihe bii behereba poore. Ya wan ganlom ya mɛhe la ba. Mam n de Na'ayenɛ. 32Suute ya bonkɛka, na'aha bonkotɛ, ge zɔta ya Yenɛ la. Mam n de Na'ayenɛ. 33Saana han kɛn'ɛra la ya ya teŋa la poan, da ete ya vɛngela vɛngela. 34Saana han kɛn'ɛra la ya, ete ya en wo a dela ya buuri la. Nɔŋɛ ya en wo yan nɔŋɛ ya mɛhe se'em la. Yamam me yuun dela saama Mizraim teŋa poan. Mam n de Na'ayenɛ ya Yenɛ. 35Da tare ya piŋa lɔkɔ magara sɛla tebehom bii woko bii zo'ore. 36Tare ya lɔgɔseko n tare magaha tebehom la, la wanɛ se'ere n tare magaha la, la dugula sɛka n tare magara la magara sɛla woo. Mam n de Na'ayenɛ ya Yenɛ n tare ya ze'ele Mizraim teŋa yehe na la. 37Tare ya mam malema la zan'an la n nɔze'elego la zan'an, ge tona a. Mam n de Na'ayenɛ.

will be added

X\