Malema 17

1Te Na'ayenɛ tɔgɛ bo Moses yeti, 2Yele Aron la a dayɔɔhe la, la Israeldoma wa zan'an yeti, Na'ayenɛ n bo'ore ya nɔse'ere n wana. 3Israel nɛra se'em n kɔrɔgɛ lɔlega bii pehego bii boa ya tiiheŋɔ la poan bii kenkɛleŋa, 4ge ka tare ka wa'an la Sogorɛ la nɔɔrɛn la na dekɛ ka bo Na'ayenɛ, a toolom yire nɛŋan. A daana ka'ɛ la ziim n bala. Ŋmaɛ ya a daana a nɛreba poan bahɛ. 5Wana n wan bahɛ te Israeldoma wan tara ba kaanbegɔ woo kena Na'ayenɛ nɛŋan na wo yamam ete se'em samana zuto nananawa. Ba ne tare wa'an Sogorɛ la nɔɔrɛn na bo malemadaana la, dɛna Na'ayenɛ n bala, te malemadaana la to'e ba kaanbɛ te la dɛna sunma'ahom bo'olom. 6Malemadaana la ka'ahɛ duŋa la ziim la yeele Na'ayenɛ kaanbegɔ daka la n boe Sogorɛ nɔɔrɛn na la loga, ge nyɔ' ka kaam la zan'an, te la dɛna sɛla n dekɛ nyɔ' bo Na'ayenɛ. 7Ba da makɛ kɔrɔgɛ ba sɛla bo kiŋkiri boa bagarɛ la n bahɛ te ba pon bɔna yaalegɔ poan la. Malema ana wa boe la bala bɔ'ɔra yamam la ya buuri saŋa woo n wan wa'ana. 8Yele ba yeti, Israel nɛra bii saana n zin' la ya han tare a nyɔ'an bo'olom bii kaanbegɔ, 9ge ka tare wa'an Sogorɛ nɔɔrɛn la na bo Na'ayenɛ, ya ŋmaɛ nɛre enŋa ya nɛreba poan bahɛ. 10Israel nɛra se'em, bii saana n zin' la ya, han di ziim mam wan zabera la en, ge ŋmaɛ en a nɛreba poan bahɛ. 11Se'ere n sɔe la, bonvɔa vom boe la ziim poan, te mam bo ya tara ziim duuhe ya be'em kaanbegɔ daka la zuo. Ziim la dekere vom duuhera be'em. 12Bala zuo, mam Na'ayenɛ yeti ya te yamam da di ziim, bii saana n zin' la ya di ziim. 13Israel nɛra, bii saana n zin' la ya, han tɛn' la duŋa bii niiŋa te ya ka kiha, a ka'ɛ ka ziim la zan'an bahɛ teŋa pin'. 14Se'ere n sɔe la, bonvɔa woo vom boe la a ziim poan. Wana zuo te mam Na'ayenɛ yele Israeldoma wa yeti, Ya da di bonvɔa sɛka ziim la. Se'em woo n di ziim, ba ŋmaɛ en bahɛ. 15Se'em n obe duŋkiiriŋa, bii sɛla n nyɔkɛ ka aanhom gee te se'em obe, a daana pee a futo, sɔ iŋa. A ganlom mɛ n bala gura zanɔɔrɛ. 16Ge a han ka pee a futo, ka sɔ iŋa, a tare la dɛngerɔ n bala.

will be added

X\