Malema 16

1Te Na'ayenɛ tɔgɛ bo Moses, Aron dayɔɔhe seyi' la n ki Na'ayenɛ nɛŋan ba'ahɛ la. 2Na'ayenɛ yele Moses yeti, Yele ho sɔɔn Aron yeti a da kɛn'ɛra Saraa la poan na, toolom tanɛ la n beŋe be'em duuhego la liŋa la n vuge nɔbiŋere daka la n ze' zen'an la yoo yoo, ge a wan ki. Se'ere n sɔe la, mam ne nɛɛ n mɛŋa mɛ saŋgbanɛ poan yula be'em duuhego liŋa la zuo. 3Aron n ne wan eŋɛ se'em ge kɛn' toolom yire la poan dela, a tara lɔle, te kaŋa dɛna be'em bo'olom, ge tara peraa te kaŋa dɛna nyɔ'an bo'olom, 4te a yɛ toolom fuo n de tampeelega, sɛngelɛ kuregerega n de tampeelega poan, dekɛ tampeelega lo' a sea, dekɛ tampeelega vuge a zuo. Bana dela toolom futo, nara a sɔ ge nya yɛ futo la. 5A ne bahɛ te Israel buuri lagahɛ botelehe seyi' bo en te se dɛna be'em bo'olom, ge bo peraa te kaŋa dɛna nyɔ'an bo'olom. 6Aron ne kaanbɛ lɔle la bo a mɛŋa be'em bo'olom la a duuhe a mɛŋa be'em la a yire zan'an be'em. 7Ge te a to'e botelehe seyi' la wa'an Na'ayenɛ nɛŋan, Sogorɛ nɔɔrɛn la na. 8A ŋmɛ' gbaŋa botelehe seyi' la zuo, te kayema dɛna Na'ayenɛ denɛ, te kayema dɛna sɛka n wan zi be'em la keŋɛ. 9Aron tare bosɛka te gbaŋa la nyɔkɛ te ka dɛna Na'ayenɛ denɛ la na kaanbɛ be'em bo'olom, 10ge botela sɛka te gbaŋa la nyɔkɛ te ka dɛna be'em zia boa la, a dekɛ ka ze'ele Na'ayenɛ nɛŋan te ka dɛna be'em duuhego bo'olom. Bala te a wan bahɛ ka te ka keŋɛ kɛn' mɔen ha. 11Aron tare lɔle la na te kaŋa dɛna a mɛŋa be'em bo'olom, te a duuhe a mɛŋa be'em, la a yire zan'an be'em. A kɔrɔgɛ lɔle la n de a mɛŋa be'em bo'olom la. 12A dekɛ bugum nyɔ'anrega, la a mɔ'ɛ bugumsaana n dite ko'ɛnka daka la zuo Na'ayenɛ nɛŋan eŋɛ bini, ge tɔnbegɛ ko'ɛnka n tare nyuŋo soŋɔ, nɛɛm bi'e, la nu'o me'en boyi' tare kɛn' tanɛ la n beŋe la pooren la ha. 13A ta dekɛ wɔla la n tare nyuŋo soŋɔ la eŋɛ bugum la poan Na'ayenɛ nɛŋan bilam, te zun'uhe la guluge pin' be'em duuhego liŋa la n vuge nɔbiŋere daka la, te a da ki. 14A eŋɛ lɔle la ziim la bosebo, dekɛ a nu'dibila tom bo poan miihe be'em duuhego liŋa la zuo, ge eŋɛ bo miihe liŋa la nɛŋan na sugumnɔɔren boyopɔe. 15Ge te a nya kɔrɔgɛ nɛreba la zan'an be'em bo'olom boa la, tare ka ziim la kae tanɛ la n beŋe la pooren ha, ta eŋɛ wo n eŋɛ lɔle ziim la se'em la. A eŋɛ bo miihe be'em duuhego liŋa la zuo, ge miihe ka nɛŋan na. 16Aron n wan kaanbera be'em duuhego duuha Saraa, Israeldoma la nyɔhegerɛ la ba tobekperega la zuo la sɔrɔɔ seko woo poan te ba tue. A kaanbera bala mea duuha Sogorɛ la n boe ba dɛngerɔ teŋasoka la. 17Saŋsɛka te Aron ne wan kɛn' Saraa la poan ha te a kaanbɛ be'em duuhego la, nɛra da ne bɔna Sogorɛ la poan, gura te a ta kaanbɛ a mɛŋa be'em duuhego la a yiredoma be'em duuhego la Israel buuri la zan'an be'em duuhego la ba'ahɛ ge yehe na. 18A nya wan yehe na paɛ ko'ɛnka daka la Na'ayenɛ nɛŋan duuhe ka. A wan eŋɛ lɔle la, la boa la ziim yeele daka la iila la, 19ge dekɛ a nu'dibila tom ziim la poan miihe daka la sugumnɔɔren boyopɔe Israel nɛreba be'em la zuo. 20Aron han miihe duuhe Saraa la Sogorɛ la zan'an la daka la ba'ahɛ, a nya tare la bovɔa la na. 21Aron dekɛ a nu'uhe seyi' pagalɛ boa la zuo, ge pure Israeldoma toonfɛn'ɛha la, ba tobekperega, la ba be'em zan'an te ba tom la bahɛ boa la zuo, ge bahɛ te nɛra se'em toonɛ n de a tare boa la ta bahɛ mɔen la n wan tare ka keŋɛ. 22Boa la wan zi Israeldoma be'em namehegɔ la kɛn' mɔen ha foɔ, te nɛra la bahɛ ka pɔgɔtia la poan bilam ha. 23Aron lebe kɛn' Sogorɛ la poan ta yɛɛhɛ toolom futo la te a yɛ ne kɛn' Saraa la poan la biŋe, 24ge sɔ a iŋa toolom zen'an, tee n ne pon yɛɛra futo seto la yɛ, nya yehe na kaanbɛ a mɛŋa nyɔ'an bo'olom la nɛreba la nyɔ'an bo'olom la a duuhe a mɛŋa be'em la nɛreba be'em la. 25A nyɔ' be'em bo'olom duŋa la kaam la kaanbegɔ daka la zuo. 26Se'em n tare boa la n zi nɛreba la be'em la ta bahɛ mɔen ha la, a pee futo, sɔ iŋa, ge nya ta'an kɛn' Israel tiiheŋɔ la poan na. 27Lola la boa la n de be'em bo'olom, te ba ziim tare kɛn' Saraa la poan ta kaanbɛ be'em duuhego la. Se gana la se nɛnɔ la se potɔ ba tare yɛhera la tiiheŋɔ la kenkɛleŋa ha ta nyɔ'anra. 28Se'em n nyɔ' la wan pee a futo ge sɔ iŋa, a han ba'ahɛ te wa'an ba kɛn'a zen'en la na. 29Malema ana wa boe la bala bɔ'ɔra ya. Ŋmarehe seyopɔe dabeha pia daarɛ, ya zagahɛ ya mɛhe la ya da tom toon toonɛ, hon dɛna Israel buuri bii saana n kɛn'ɛre la ya. 30Se'ere n sɔe la, daanden daarɛ te ba wan kaanbɛ be'em duuhego ya zuo, te la duuhe ya, te ya ka tara dɛngerɔ Na'ayenɛ nɛŋan. 31De dela Vo'ohogo Daarɛ bo ya. Zagahɛ ya ya mɛhe. Malema ana wa boe la bala bɔ'ɔra ya. 32Malemadaana se'em te ba sɔ' en la kaam te a ta soe a sɔ na'arɛ dɛna malemadaana la n wan kaanbɛ be'em duuhego la. A dekɛ toolom futo la yɛ, 33la a kaanbɛ be'em duuhego duuhe Saraa la Sogorɛ la kaanbegɔ daka la malemadoma la nɛreba la zan'an. 34Malema ana wa boe la bala bɔ'ɔra ya. Kaanbɛ be'em duuhego la boyena yuunɛ woo poan bɔ'ɔra Israeldoma be'em la zan'an. Te ba eŋɛ Na'ayenɛ n yele Moses se'em la.

will be added

X\