Malema 14

1Te Na'ayenɛ tɔgɛ bo Moses yeti, 2Pa'alegɔ seko n boe bo nɛra ban'an bahega malema la, nɛra ban'an n bahɛ te a wa'an malemadaana nɛŋan na te a dekɛ a mɛŋa pa'alɛ la n wana. 3Malemadaana la ne yehe la tiiheŋɔ la kenkɛleŋa ha ta behɛ en. Nɛra la iŋganɛ ban'an la han bahɛ en, 4malemadaana bahɛ te ba tare niihe seyi' n dagɛ kihire niihe, la tia dɔɔ mɔlɔsonɔ, la min'mɔlɔga, la nyunhunyuŋa na, te la dɛna se'em ban'an n bahɛ la denɛ. 5Malemadaana la bahɛ te ba kɔrɔgɛ niihe la kayema tɔ yɔgɔrɔ dokɔ nɔɔrɛn te ba ankɛ ko'zotemɔ eŋɛ ko poan. 6Te malemadaana la dekɛ niiŋa kayema la n gee te ba ka ko la, la te dɔɔ mɔlɔsonɔ, la min'mɔlɔga la, la nyunhunyuŋa la lohɛ ko'zotemɔ la n boe dokɔ la poan te a kɔrɔgɛ niiŋa la te ka ziim la sige ko poan la, 7la a yaɛ ba miihe bahɛ se'em iŋganɛ ban'an en bahɛ la zuo sugumnɔɔren boyopɔe, te la dɛna a iŋa la duuhego n bala, ge yele en te a ka le tara dɛngerɔ. Ge te a bahɛ niiŋvɔa la te ka keŋɛ. 8Se'em te ba malom a ban'an bahega malema nya pee a futo, ge kɔɔnhɛ kɔnberɔ woo n boe a iŋan la pahɛ, ge sɔ a iŋa la, te la dɛna a dɛngerɔ malema duuhego n bala. A han ba'ahɛ bala, a nya ta'an kɛn' tiiheŋɔ la poan na, ge a gan'arɛ a yire la yeŋa dabeha ayopɔe. 9Dabeha ayopɔe daarɛ la, a kɔɔnhɛ kɔnberɔ woo a iŋa bahɛ. A siie a zuo, a tɛɛŋa, la a ninkɔnbɔrɔ. A kɔɔnhɛ a iŋa kɔnberɔ zan'an, pee a futo, sɔ a iŋa te la dɛna a dɛngerɔ duuhego malema. 10Dabeha anii daarɛ, a tare pedibihe seyi' la pesa'arɛ, te se zan'an dɛna yuunɛ, te sɛsɛla ka eŋɛ se, ge tara zom somɔ la wolehe setan', ka'ɛ kaam eŋɛ bini te la dɛna a boom bo'olom, la kaam wola. 11Malemadaana se'em n malom nɛra la ban'an bahega malema la, yele en yeti a ka le tara dɛngerɔ, la n wan tare nɛra la, la a daana bo'olom la wa'an Na'ayenɛ nɛŋan na, Sogorɛ nɔɔrɛn la na. 12Malemadaana la loe pedibiga la kayema, te kaŋa dɛna a lebehe yɔ' bo'olom la kaam wola. A zɛnkɛ ba saazuo Na'ayenɛ nɛŋan, te la dɛna pa'alegɔ bo'olom. 13A kɔrɔgɛ pedibiga la toolom zen'an la te ba kɔrɔna be'em bo'olom la nyɔ'an bo'olom. Wo be'em bo'olom la n de malemadaana la denɛ se'em la, lebehe yɔ' bo'olom me dela bala. Bo dɛna la toolom bonɔ. 14Malemadaana la eŋɛ lebehe yɔ' bo'olom duŋa la ziim tɛ'ɛn se'em n malone a ban'an bahega malema la zuɔ toberɛ, a zuɔ nu'dibidɔɔ, la a zuɔ na'dibidɔɔ. 15Malemadaana la poregɛ kaam wola bosebo eŋɛ a mɛŋa gɔbega nu'talɛ poan, 16dekɛ a zuɔ nu'dibila tom kaam la n boe a gɔbega nu'talɛ la poan la, miihe Na'ayenɛ nɛŋan sugumnɔɔren boyopɔe. 17Malemadaana la eŋɛ kaam sebo n boe a nu'talɛ poan la a lebehe yɔ ziim la bosebo tɛ'ɛn a zuɔ toberɛ, la a duuhe en, ge dekɛ tɛ'ɛn a zuɔ nu'dibidɔɔ, a zuɔ na'dibidɔɔ. 18Kaam sebo n gee a nu'talɛ la poan la, a dekɛ sɔn' se'em n malone a ban'an bahega malema la zuo, la a duuhe en, kaanbɛ be'em duuhego bo en Na'ayenɛ nɛŋan. 19Malemadaana wan kaanbɛ be'em bo'olom te la dɛna be'em duuhego bo se'emdaana n malonɛ a ban'an bahega malema la. A han ba'ahɛ bala, malemadaana la kɔrɔgɛ nyɔ'an bo'olom la, 20la a kaanbɛ ka kaanbegɔ daka la zuo, la boom bo'olom la, la a kaanbɛ be'em duuhego bo en, te a kan le tara dɛngerɔ. 21Ge a daana han dɛna naha, kan ta'an bo lɔgɔtona, a tara pedibiga kayena, te la dɛna a lebehe yɔ' bo'olom, te ba zɛnkɛ pa'alɛ ge dekɛ kaanbɛ be'em duuhego bo en. A tara kisoma zom somɔ wola me'en, eŋɛ kaam eŋɛ bini ta la dɛna a boom bo'olom la kaam wola la 22dayɛma ayi' bii nadoma dayɛma ayi', n de sɛla te a wan ba'ahom tara la, te deyema dɛna a be'em bo'olom, te deyema me dɛna a nyɔ'an bo'olom. 23Dabeha anii daarɛ, a tare lɔgɔtona wa'an malemadaana la zen'an na, Sogorɛ la nɔɔrɛn, Na'ayenɛ nɛŋan bilam te ba malom a ban'an bahega malema la. 24Malemadaana la to'e pedibiga la n de lebehe yɔ' bo'olom la kaam wola la a zɛnkɛ ba Na'ayenɛ nɛŋan, te la dɛna pa'alegɔ bo'olom. 25A kɔrɔge pedibiga la n de lebehe yɔ' bo'olom la, eŋɛ ka ziim la bosebo tɛ'ɛn se'em n malone a ban'an bahega malema la zuɔ toberɛ, la a zuɔ nu'dibidɔɔ, la a zuɔ na'dibidɔɔ. 26Malemadaana la poregɛ kaam la bosebo eŋɛ a mɛŋa gɔbega nu'talɛ poan, 27dekɛ a zuɔ nu'dibila tom kaam la n boe gɔbega nu'talɛ poan la, miihe Na'ayenɛ nɛŋan sugumnɔɔren boyopɔe. 28Kaam sebo n boe a nu'talɛ la poan la, a eŋɛ tɛ'ɛhɛ lebehe yɔ' bo'olom ziim la nɛra la zuɔ toberɛ la a zuɔ nu'dibidɔɔ la a zuɔ na'dibidɔɔ la. 29Kaam sebo n gee a nu'talɛ la poan la, a dekɛ sɔn' se'em n malone a ban'an bahega malema la zuo, la a kaanbɛ be'em duuhego bo en Na'ayenɛ nɛŋan. 30Ge te a nya kaanbɛ dayɛma la bii nadoma dayɛma la n de sɛla te nɛra la wan ba'ahom tara la, 31te deyema dɛna be'em bo'olom, te deyema dɛna nyɔ'an bo'olom, ta' la a boom bo'olom la. Malemadaana la n wan kaanbɛ be'em duuhego Na'ayenɛ nɛŋan se'em bo a daana n bala, te a da tara dɛngerɔ. 32Pa'alegɔ kona n boe bo se'em n yeti a malom a ban'an bahega malema, ge kan ta'an bo en sone a bo sɛla la. 33Te Na'ayenɛ tɔgɛ bo Moses la Aron yeti, 34Ya han ta kɛn' Kanaan teŋa la poan, teŋsɛka te n dekera bɔ'ɔra ya te ya sɔna wa la poan, te mam bahɛ te seo nyɔkɛ yire ka poan, 35yire la daana keŋɛ ta yele malemadaana la yeti, Mam nyɛ sɛla n ane wo seo n nyɔkɛ n yire la. 36Malemadaana la bahɛ te ba vaɛ lɔgɔseto woo n boe yire denɛ poan la yehe yeŋa, ge te a kɛn' behɛ dɛ. Bala te yire la ganleŋɔ kan ta' de poan lɔgɔrɔ la. Ba han va lɔgɔrɔ la de poan ba'ahɛ, malemadaana la nya kɛn' de poan behɛ dɛ. 37Malemadaana la han behɛ seo la n nyɔkɛ yire la dangɔɔma la, te dɛnlemadɛntɔ la, bii piinleŋɔ la n nyɔkɛ dangɔɔma la kɛn' dangɔɔma la poan, 38malemadaana la doohe de nayaŋa poan yehe na, ge pagɛ dɛ ze'ele dabeha ayopɔe. 39Dabeha ayopɔe daarɛ la, malemadaana la lebe na behɛ. Seo la han to'e la yire la dangɔɔma la, 40a bo sore te ba luguhe kugu se'a n dekɛ mɛ yire la, te seo la nyɔkɛ a la, fɔ a tare keŋɛ ya sɔgɔrɔ ka'ahegɔ zen'an, ya teŋa la kenkɛleŋa ha ta ka'ɛ bahɛ zen'an yoo. 41A bahɛ te ba kɔnrehɛ bole se'ere n dekɛ takɛ de poan la zan'an, vaɛ bole la te ba kɔnrehɛ la tare keŋɛ ya sɔgɔrɔ ka'ahegɔ zen'an, ya teŋa la kenkɛleŋa ha ta ka'aɛ bahɛ zen'an yoo. 42Ge la ya tee kugupaala kɛn'ɛhe dangɔɔma la mɛ, malom takɛ dɛ la bolɛ paalɛ. 43Ge ban fɔ kuga la ge tee kuga, kɔnrehɛ bole la me bahɛ ge tee bole takɛ ba'ahɛ la, seo la han le nyɔkɛ yire la, 44malemadaana la keŋɛ ta behɛ dɛ. Seo la han nyɔkɛ yire la mɛ le yɛ'ɛha, ko dela seo be'o n bala nyɔkɛ yire la. Yire denɛ boe la ganleŋɔ poan. 45Yire denɛ dela ya gbi' dɛ bahɛ. De kuga, de dɔɔrɔ, la de bole la zan'an, la ya vaɛ ba keŋɛ ya sɔgɔrɔ ka'ahegɔ zen'an, ya teŋa la kenkɛleŋa ha ta ka'ahɛ zen'an yoo. 46Se'em woo n kɛn' yire la poan se'em ma'an te malemadaana la yu' dɛ bahɛ la, a daana ganlom mɛ gura zanɔɔrɛ. 47Ya se'em woo n gan'arɛ de poan, bii zin'ire de poan di, a daana pee a futo. 48Ge ban malom maalɛ dɛ ba'ahɛ la, malemadaana la han lebe na behɛ te seo la ka le nyɔkɛ de dangɔɔma la, a yeti, ganleŋɔ ka le bɔna de poan. Se'ere n sɔe la, seo la pelege ya. 49A han yeti a pee yire la, a to'e niihe seyi' la tia dɔɔ mɔlɔsonɔ la min'mɔlɔga la nyunhunyuŋa. 50A kɔrɔgɛ niiŋa la kayema tɔ yɔgɔrɔ dokɔ te ba ankɛ ko'zotemɔ eŋɛ ko poan nɔɔrɛn, 51ge nya dekɛ dɔɔ mɔlɔsonɔ la nyunhunyuŋa la min'mɔlɔga la ta' la niŋvɔa la, lohɛ ko'zotemɔ la n boe dokɔ poan te a kɔrɔgɛ yia niiŋa la ziim eŋɛ ko poan la, la a yaɛ ba miihe yire la sugumnɔɔren boyopɔe. 52A wan dekɛ la niiŋa ziim la ko'zotemɔ la niŋvɔa la dɔɔ mɔlɔsonɔ la nyunhunyuŋa la min'mɔlɔga la miihe pee yire la. 53A han ba'ahɛ, a bahɛ niŋvɔa la te ka keŋɛ. N wan malom yire duuhego malema la se'em n bala, te ganleŋɔ ka bɔna yire la poan. 54Pa'alegɔ kona n boe bo iŋganɛ ban'an bii iŋzakeŋɔ bahega malema bii 55pika n peelom fuo bii seo n nyɔkɛ yire bii 56iŋa zen'an n mɔrɛ bii zen'an n birige pogolom. 57Ya han ne ta baŋɛ te la tare la ka tare ganleŋɔ bii la tare ganleŋɔ, ya eŋɛ bala. Pa'alegɔ kona n boe bo iŋganɛ ban'an, la pika bii seo n nyɔkɛ sɛla.

will be added

X\