Malema 13

1Te Na'ayenɛ tɔgɛ bo Moses la Aron yeti, 2Se'em iŋa han ihege kugule, bii birige, bii ka tɛ'ɛhɛ mɛ wan dɛna iŋa ban'an, a daana wa'an Aron n de malemadaana la, bii a dayɔɔhe la n de malemadoma la kayema zen'an na. 3Te malemadaana la behɛ sɛla n eŋɛ nɛra la iŋa la. Kɔnbe seto n boe pogoleŋɔ zen'an la han lebege kɔnbe peelehe, ge te pogoleŋɔ la kɛ'ɛra sigera poan, la dela iŋganɛ ban'an n bala. Malemadaana la han behɛ en ba'ahɛ, a yele nɛra la te la bahɛ en te ganlom mɛ. 4Ge nɛra la iŋa la zen'an n pɔgɔlom la han biŋe ko'om n pelege, ge ka kɛ' sige poan, te kɔnbe seto n boe pogoleŋɔ zen'an la ka lebege kɔnbe peelehe, Malemadaana la yelege nɛre'ena te a bɔna a ma'an dabeha ayopɔe. 5Dabeha ayopɔe daarɛ la, malemadaana la han behɛ a iŋa pogoleŋɔ la te la ka tee, ge me ka yalegɛ pa'ahɛ, a bahɛ en te a bɔna a ma'an dabeha ayopɔe pa'ahɛ. 6Dabeha ayopɔe daarɛ la, malemadaana la le behɛ nɛra la iŋa pogoleŋɔ la. Pogoleŋɔ la han pɛlegere mɛ ge ka yalegera, malemadaana la bahɛ en fai. La yeen dɛna la saŋkanɛ. Nɛra la yeen pee a futo, ge a ka ganlom. 7Ge malemadaana la n behɛ en ge bahɛ en fai la, a han keŋɛ te pogoleŋɔ la le ta nyaan to'e a iŋa la, a le tare a mɛŋa lebe malemadaana la zen'an na. 8Malemadaana la han behɛ a iŋa pogoleŋɔ la te la nyaan mɛ to'e a iŋa la, a yele en te a iŋa pogoleŋɔ la bahɛ te a ganlom mɛ. 9Nɛra han tara iŋganɛ ban'an, a wa'an malemadaana zen'an na. 10Malemadaana la behɛ a iŋa la, te pogoleŋɔ zen'an la kɔnberɔ lebege kɔnbe peela, te pogoleŋɔ la tanhɛ te nɔtɛ bɔna, 11la dela iŋganɛ ban'an n ka tare tebegɔ. Bala, malemadaana la yele en te a ban'an la bahɛ te a ganlom mɛ. Malemadaana la da yelege nɛre'ena bahɛ a ma'an. A daana pon deŋɛ bɔna la ganleŋɔ poan. 12Malemadaana han nyɛ te nɛra iŋa ban'an fuke a iŋa zan'an ze'ele a zuin ta paɛ a na'ma, 13a bahɛ en te enŋa daana ka tare ganleŋɔ. Se'ere n sɔe la, a ban'an la zan'an n bala fuke pelege la. 14Ge se'em iŋganɛ ban'an n tanhɛ te nɔtɛ bɔna, la ganlom enŋa daana mɛ. 15Malemadaana han behɛ se'em iŋa pogoleŋɔ, te la eŋɛ nɔtɛ, la ganlom a daana mɛ. Nɔtɛ la n de ganleŋɔ la. A daana tare la iŋganɛ ban'an. 16A iŋganɛ ban'an la han tee pɛlegera, a tare ta pa'alɛ malemadaana la. 17Malemadaana la behɛ nɛra la iŋganɛ ban'an la te ka han fukure, a yele en te a ka tare ganleŋɔ. 18Nɔten kɛ'ɛŋa han mɔrɛ nɛra ge ta bahɛ, 19ge te nɔɔrɛ la ana tope mɔ'ɛ, a daana tare a mɛŋa ta pa'alɛ malemadaana. 20Malemadaana la han behɛ en te nɔtɛ la tun' sige mɛ te kɔnbeseto n boe pogoleŋɔ la zen'an la kɔnberɔ lebege kɔnbe peela, a yele en te la ganlom en mɛ n bala. La dela iŋganɛ ban'an n bala tanhɛ bilam na la. 21Ge malemadaana han behɛ te kɔnbe seto n boe pogoleŋɔ zen'an kɔnberɔ la ka lebege kɔnbe peela, te nɔtɛ la me ka tun' sige, malemadaana la yelege en te a bɔna a ma'an dabeha ayopɔe. 22Ge la han tɔ'ɔra a iŋa la zan'an, malemadaana la yele en yeti la ganlom en mɛ n bala. La dela iŋganɛ ban'an. 23Ge nɔtɛ la han pelege mɛ, ge gee la nɔten kɛ'ɛŋa la yihire la ma'an, a yele en te a ka tare ganleŋɔ. 24Bugum han di nɛra te a iŋa la eŋɛ mɔla mɔla, tɛ'ɛnhɛ peela peela, 25malemadaana la behɛ en, te kɔnbe seto n boe yihire la poan la han dɛna kɔnbe peela, ge te nɔtɛ la kɛ' sige poan, la dela iŋganɛ ban'an n bala tanhɛ doohe bugum la n di zen'an la poan na. Malemadaana la yele en te la ganlom en mɛ. La dela iŋganɛ ban'an n bala. 26Ge malemadaana la han behɛ te kɔnbe seto n boe yihire la poan la dagɛ peela, te yihire la me ka kɛ' sige poan, Malemadaana la yelege en te a bɔna a ma'an dabeha ayopɔe. 27Dabeha ayopɔe daarɛ la, malemadaana la behɛ nɛra la iŋa ban'an la, te ka han tɔ'ɔra la a iŋa la zan'an, malemadaana la yele en yeti la ganlom en mɛ n bala. 28Ge sɛla han ka eŋɛ, te la ka tɔ'ɔra a iŋa la ge ton pɛlegera, la dela bugum la n di en la nɔtɛ en bala. Malemadaana la wan yele en yeti a ka tare ganleŋɔ. 29Boraa bii pɔka han tara nɔtɛ a zuin, bii taŋgo'oren, 30Malemadaana la behɛ nɔtɛ la, te de han kɛ' sige mɛ, te kɔnbe mɔlehe baanlehe puhɛ bini, a yele en yeti la bahɛ te a ganlom mɛ. La dela zaŋkɔnhɔga n bala eŋɛ a zuo bii a tɛɛngo'ore la dɛngerɔdaana. 31Ge malemadaana la han behɛ nɔtɛ dena wa taaba te de ka kɛ' sige poan, te kɔnberɔ sabelehe ka puhe de poan, a yelege en te a bɔna a ma'an dabeha ayopɔe. 32Dabeha ayopɔe daarɛ la, malemadaana la behɛ zaŋkɔnhɔga la, te ka han ka, to'e a iŋa la zan'an, te kɔnbe mɔlehe ka puhe bini, te nɔtɛ la ka kɛ' sige poan, 33Zaŋkɔnhɔga daana la siie a zuo, ge gile zaŋkɔnhɔga la n boe zen'an la, te malemadaana yelege en te a bɔna a ma'an dabeha ayopɔe le yɛ'ɛha. 34Dabeha ayopɔe daarɛ la, malemadaana la han behɛ zaŋkɔnhɔga la, te ka ka to'e a iŋa la, ka kɛ' sige poan, a yele en te a ka tare ganleŋɔ. A pee a futo, ge a ka tare ganleŋɔ. 35Ge malemadaana la han bahɛ en ba'ahɛ te pooren te zaŋkɔnhɔga la le nyaɛn, 36malemadaana la han behɛ en te zaŋkɔnhɔga la to'e a iŋa la mɛ, a da le ɛɛra te a behɛ kɔnbe mɔlɔ. La pon ganlom nɛra enŋa mɛ. 37Ge n behɛ la, zaŋkɔnhɔga la han ki, te kɔnbe sabela puhe bini, la ba'ahɛ mɛ n bala. A ka tare ganleŋɔ. Malemadaana la bahɛ te a keŋɛ. 38Boraa bii pɔka iŋa han tɛn'ɛhɛ peela peela, 39malemadaana la behɛ ba iŋa la, te tɛn'ɛhegɔ la han fukura mɛ, la dagɛ daaŋɔ, la yeen dɛna la iŋzakeŋɔ n fuke. A daana ka tare ganleŋɔ. 40Boraa zonto han veɛn, te ka dɛna zubeele, la dagɛ ban'an. 41Boraa gbe'ere bɔba na han pee te ka dɛna zupia, la dagɛ ban'an. 42Ge sɛla han mɔrɛ a zuo la, bii zen'an n mɔrɛ la poan, la dela ban'an n bala tanhɛ a zuo la, bii zen'an n pee la poan yɛhera na. 43Malemadaana behɛ en, te sɛla n mɔrɛ la han biŋe ko'om te bo mɔ'ɛ, ana wo iŋganɛ ban'an, 44la dela ban'an n bala. Boraa la tare la ganleŋɔ. Malemadaana la yele en yeti a tare la ban'an, a tare la ganleŋɔ, doohe la nɔtɛ la n boe a zuin la. 45Se'em woo n tare ban'an kana wa taaba yɛɛra tanzana, da saanha a zuo, ge pin' a nyɔya beene lɛbera na, ge tanhera yeti, Dɛngerɔdaana, dɛngerɔdaana. 46Nɔtɛ la n boe nɛra se'em zuin sasɛka woo la, a daana tare la ganleŋɔ. A bɔna a ma'an. A bɔna tiiheŋɔ la kenkɛleŋa ha. 47Fuo seko woo n piinlom, kɔnberɔ fuo, bii tanɛ sonɛ peelega fuo, 48bii ba wogɛ ko mɛ, bii tanɛ sonɛ te ba pan'am fuo, bii ganɛ fuo, 49fuo bii ganɛ, bii tanɛ bii lɔgɔseko han piinlom dɛnlemadɛntɔ, bii mɔ'ɛ, la dela pika n bala kɛn' kɔ. Tare ya ta pa'ala la malemadaana. 50Malemadaana la wan behɛ lɔgɔ la n kɛn' pika la, ge yelege ko ma'an ze'ele dabeha ayopɔe. 51Dabeha ayopɔe daarɛ la, a han behɛ te pika piinlom fuo la, bii tanɛ la, bii ganɛ lɔkɔ la, la ko toonɛ n pon dɛna se'ere la, ko tare la pika ganleŋɔ. Lɔkɔ koŋɔ dela ganleŋɔ lɔkɔ. 52Malemadaana la nyɔ' fuo la, bii fuseko te ba wogɛ la, tanɛ se'ere te ba pan'am, bii tanɛ sonɛ, bii ganɛ fuo, bii lɔgɔseko woo n piinlom la bahɛ. Ko kɛn' la pika sɛka n tare ganleŋɔ. Lɔgɔkoŋɔ taaba tare la ganleŋɔ. 53Ge malemadaana la han behɛ te pika la ka to'e fuo la, bii fuseko en wogɛ la, bii tanɛ se'ere n pan'am la, bii gana lɔkɔ la, 54a yele te ba pee lɔgɔseko en piinlom la. Te a yelege ko ze'ele ko ma'an dabeha ayopɔe. 55Malemadaana la han behɛ lɔgɔseko n piinlom te ba pee la, te pika la ka tee, ge me ka to'e lɔkɔ la zan'an, ko kelom dɛna la ganleŋɔ lɔkɔ. Nyɔ' ya kɔ la bugum. 56Ge ban pee lɔkɔ la ba'ahɛ la, malemadaana la han behɛ te pika la pelege ya, aanhegɛ tana la, bii fuo la te ba wogɛ la, bii ganɛ fuo la zen'sɛka n piinlom la bahɛ. 57Ge pika la han le nɛɛ fuo la, bii fuseko n wogɛ la, bii tanɛ se'ere n pan'am la, bii ganɛ lɔkɔ la poan, piinleŋɔ la boe bini mɛ n bala, te sɛla woo n kɛn' pika me dela ya nyɔ' la bugum. 58Fuo la, bii fuseko n wogɛ la, bii fuseko te ba pan'am la, bii gana lɔkɔ seko woo te ya pee te piinleŋɔ la dekɛ, ya le pee ko pa'ahɛ. Bala te ko ka tara ganleŋɔ. 59Pa'alegɔ seko n boe bo kɔnberɔ, bii tanɛ sone, bii fuo te ba pan'am, bii ganɛ lɔgɔseko n kɛn' pika te ya wan eŋɛ se'em yehe ganleŋɔ ko poan, bii pa'alɛ te ko dela ganleŋɔ lɔkɔ n bala.

will be added

X\