Malema 11

1Te Na'ayenɛ le tɔgɛ bo Moses la Aron yeti, 2Yele Israeldoma wa yeti, duŋa woo n boe teŋparɛ wa zuo wa, ya wan ɔbera se'ehe n wana. 3Ya ɔbera duŋse'ehe tafiina n yagom yelehe yema yema, te ka ogora yaama buguha. 4Dunhe sese'ehe boe, tana ogora yaama buguha ma'an, bii ba tafiina n yagom. Da makɛ ya obe senhe. Yogonɛ tan' ogora yaama buguha mɛ, ge a tafiina ka yagom. A dela ganleŋɔ duŋa bo ya. 5Saalɛ ogore yaama buguhera mɛ, ge a tafiina ka yagom, a dela ganleŋɔ bo ya. 6Sɔ'ɔŋa ogore yaama buguhera mɛ, ge a tafiina ka yagom, a dela ganleŋɔ bo ya. 7Dea tafiina yagom mɛ, yelehe yema yema, ge a me ka ogore yaama buguhera, a dela ganleŋɔ bo ya. 8Da makɛ ya obe ba nɛnɔ bii ya kalom ba bonkiiriŋa. Ba dela ganleŋɔ bo ya. 9Bonvɔa woo n boe ko'kantɛ poan la, bii kolaahe poan, yan wan ɔbera sɛla dela, sɛla n tare lotehe ba ge tara pɔgɔrɔ n pegere. 10Ge bonvɔa woo n boe ko'omen, bii buna la ko'om poan bonvɔɔhe, ge ka tara lotehe ba pulan, la pɔgɔrɔ n pegere, ya kiha ba. 11Yan wan kiha ba la zuo, ya da obe ba nɛŋɔ bii kalom ba bonkiiriŋa. 12Bonvɔa woo n boe ko'omen, ka tara lotehe, bii pɔgɔrɔ n pegere dela ya kiha. 13Niihe se'ehe te ya wan kiha kan ɔbera n wana. Ya da ɔbera se. Se'ere n sɔe la se dela ganleŋɔ bo ya. Ba dela tuguho bii ziio bii zisɔbelegɔ 14bii selemɔlɔga bii selesabelega 15bii goɔn bii sɛla n ane bala 16bii taataa bii viiŋɔ bii baŋkɔnrɔgɔ bii yebega 17bii viin silinsiko bii kolomanzure bii viin mɛŋko 18bii viin peelego bii pɔgɔtia poan viiŋɔ bii zimyaahega 19bii pɛteŋa bii taŋkone bii baŋkɔnrɔpeo bii zonzɔŋɔ. 20Bonɛngela woo n tare na'ma anaahe dela ganleŋɔ bonɔ bo ya. 21Ge bonɛngela basɛba boe tara na'ma anaahe te ya wan ta'an obe. Bama dela bonɛngela sɛba na'ma n de petehe te ba zɔ'ɔha la. 22Bana taaba wa poan, ya obere tenta'aba, sunbonhe, pan'ahe, la sonwa'ara. 23Ge bonɛngela sɛba woo n gee tare na'ma anaahe anaahe dela ganleŋɔ bonɔ bo ya. 24Ya han kalom ba, ya ganlom mɛ. Hom se'em woo n kalom ba, ho ganlom mɛ n bala gura zanɔɔrɛ. 25Hom se'em woo n kalom ganleŋɔ lɔkɔ tona wa bonki'iŋa, ho pee ho futo, ge ho ganlom mɛ n bala gura zanɔɔrɛ. 26Duŋsɛka woo tafiina n yagom ge ka yelehe soŋa, bii ka ka ogore yaama buguha, ka dela ganleŋɔ bo ya. Hom se'em n kalom ka bonki'iŋa ganlom mɛ. 27Dunhe woo n tare na'ma anaahe kena, duŋse'ehe n kene se na'ɛɛhe zuo dela ganleŋɔ bonɔ bo ya. Se'em woo n kalom ba bonki'iŋa ganlom mɛ gura zanɔɔrɛ. 28Se'em woo n kalom ba bonki'iŋa pee a futo, ge ho ganlom mɛ n bala gura zanɔɔrɛ. 29Dunhe woo n boe teŋparɛ wa zuo, se'ehe te ya wan kiha dela: dayuo la sagerega la iiokantɛ la 30kasuluga la wɔa la baŋa la kusolopuo la gumatia. 31Sɛla woo n zote teŋa, bana ba poan dela ganleŋɔ bonɔ bo ya. Hom se'em n kalom ba bonki'iŋa, ganlom mɛ gura zanɔɔrɛ. 32Bana wa poan ayema han ki lu lɔkɔ zuo, lɔkɔ koŋɔ ganlom mɛ n bala ge da tare ko tona sɛla tooma. Ban daa dekɛ la dɔɔ maalɛ kɔ bii tanɛ n dekɛ pɛ' kɔ bii ganɛ n dekɛ gobe ko bii boa kɔnberɔ n dekɛ wogɛ kɔ, ya dekɛ ko buhe ko'omen gura zanɔɔrɛ te ko nya daa ka dɛngerɔ. 33Ba han lu la yɔgɔrɔ dokɔ poan, sɛla woo n boe ko poan la dela ganleŋɔ bonɔ, ge te ya wɔnregɛ dokɔ koŋɔ bahɛ. 34Disɛka woo te ya yeti ya di ge te dɔgɔ kona wa poan ko'om kalom ka, ka dela ganleŋɔ dia. Bii sɛla n wan nyu' han bɔna dokɔ kona poan, bo dela ganleŋɔ bonɔ. 35Sɛla woo te bana wa ki lu ba poan dela ganleŋɔ lɔkɔ. Ba han lu dia sen'an uka poan, bii dokɔ poan, wɔnregɛ ya kɔ bahɛ. Lɔgɔ tonɔ dela ganleŋɔ bonɔ, bala lɔkere ya tɔ. 36Ba han lu la bulehe bii loa te ya angera ko'om ka poan, ko'om la dagɛ ganleŋɔ bonɔ, ge hom se'em n kalom bonki'iŋa la n ganlom. 37Bonki'iŋa han lu bonbora te ya yeti ya dekɛ borɛ zuo, bonbora la dagɛ ganleŋɔ bonɔ. 38Ge ko'om han bɔna bonbore la poan te bonki'iŋa lu ba poan, ba dela ganleŋɔ bonɔ bo ya. 39Duŋsɛka te ya ka kihira han ki te se'em kalom ka, a daana ganlom mɛ gura zanɔɔrɛ. 40Se'em n obe duŋki'iŋa la nɛnɔ, a pee a futo, ge a ganlom mɛ n bala gura zanɔɔrɛ. Se'em n kalom bonki'iŋa, a pee a futo, ge a ganlom mɛ n bala gura zanɔɔrɛ. 41Bonvɔa woo n vuure teŋa dela ganleŋɔ bonɔ da obere ya ba. 42Da obere ya bonvɔa woo n vuuri a poorɛ zuo, bii a vuuri la na'ma anaahe bii na'ma kekeko zuo. Ba dela ganleŋɔ bonɔ. 43Da ganlom ya ya mɛhe la lɔgɔtona wa. Da doohe ya ba poan ganlom, bii bama ganlom yamam. 44Mam de Na'ayenɛ ya Yenɛ la, yelege ya ya mɛhe la ya dɛna toolom nɛreba. Se'ere n sɔe la, mam dela fa'a. Da ganlom ya mɛhe la bonvɔɔhe se'ehe n vuuri teŋa wa. 45Mam n de Na'ayenɛ, tare ya ze'ele Mizraim teŋa yehe na, te n dɛna ya Yenɛ. Bala zuo, dene ya nɛresoma n boe ya tɔka. Se'ere n sɔe la, mam dela fa'a. 46Pa'alegɔ kona n boe bo dunhe, niihe, ko'om poan bonvɔɔhe, la bonvuula, woo n boe teŋparɛ wa zuo wa. 47Ya mina yelegera bonsola, la sɛla n de ganleŋɔ bonɔ. Sɛla n dite, la sɛla n ka dite.

will be added

X\