Malema 10

1Te Aron dayɔɔhe Nadab la Abihu ta dekɛ bugum tooregɔ lɔgɔrɔ la mɔ'ɛ bugum eŋɛ ba poan, eŋɛ digilom pa'ahɛ bo poan tare bugum yoo na tona Na'ayenɛ nɛŋan, te la ka doohe Na'ayenɛ nɔɔrɛ la. 2Te bugum ze'ele Na'ayenɛ zen'an na di ba te ba ki Na'ayenɛ nɛŋan. 3Moses nya yele Aron yeti, Na'ayenɛ yetɔgom n wana, Se'em woo n lɛne mam, a daana tara mam soŋa. Nɛreba zan'an wan na'aha la mam. Te Aron yee suram. 4Te Moses yi' Aron sɔ be'a Uziel dayɔɔhe Misael la Elzapan yele ba yeti, Wa'an ya na dekɛ ya sɔɔnrɔ la toolom deo wa nɔɔrɛn wa yehe tiiheŋɔ wa kenkɛleŋa ha. 5Te ba paɛ gorɛ ba futo la n kelom yɛ ba la ɔnbɛ ba tare yehe kenkɛleŋa ha wo Moses n yele ba se'em la. 6Te Moses yele Aron la a dayɔɔhe Eleazar la Itamar yeti, Da bahɛ ya zonto yirigam, bii ya aanhom ya futo. Ya han eŋɛ bala ya wan ki'. Na'ayenɛ sunsunya wan taɛ bahɛ Israel zan'an zuo. Ge ya sɔɔnrɔ la Israeldoma zan'an ta'an kele bo sɛba te Na'ayenɛ ko' ba la bugum wa. 7Ya da makɛ yehe Sogorɛ wa yeŋa ge ya wan ki, doohe la Na'ayenɛ soa kaam la n dekɛ sɔ' ya la n boe ya. Te ba eŋɛ wo Moses n yele se'em la. 8Te Na'ayenɛ tɔgɛ bo Aron yeti, 9Hom la ho dayɔɔhe la han ne ta yeti ya kɛn' Sogorɛ la poan, da nyu' ya daam bii sɛla n kele. Ya han nyu' ya wan ki. Malema ana n boe bo ya buuri saŋa se'ehe woo n kene na la. 10Ya mina yelegera toolom la sɛla n de yoo. Sɛla n tare ganleŋɔ la sɛla n ka tare ganleŋɔ. 11Ya pa'alɛ Israeldoma la Na'ayenɛ malema la woo te a doohe Moses poan pa'alɛ a la. 12Te Moses yele Aron la a dayɔɔhe se'ehe n gee la, Eleazar la Itamar, yeti, Dekɛ ya boom bo'olom sebo te ba nyɔ' bo Na'ayenɛ ge gee la maalɛ dia te mi'ihom ka bɔna bo poan, la ya zin'ire kaanbegɔ daka la zen'an di. Ka ba' dɛna la toolom bonɔ. 13Ya zin'ire toolom zen'an di dikana wa. Ka dela yamam la ya kɔma tɔntɛ, bo'olom sebo woo n nyɔ'anre bugumen bɔ'ɔra mam Na'ayenɛ la poan wo mam n bo n nɔɔrɛ se'em la. 14Ge hom la ho dayɔɔhe la ho pɔyɔɔhe ta'an obe nyɔn'ɔn la la gbere la n ne zɛnkɛ pa'alɛ mam la, ge ya ne zin'ire zen'sɛka n de toolom zen'an la ma'an poan obe to. La dela hom la ho kɔma tɔntɛ Israeldoma sunma'ahom bo'olom woo poan. 15Gbere la n ne yehe bo la, la nyɔn'ɔn la n ne zɛnkɛ pa'alɛ la dela ya ne dekɛ pa'ahɛ kaam nɛnɔ la n wan dekɛ nyɔ' bo Na'ayenɛ la na, la ya zɛnkɛ to zan'an Na'ayenɛ nɛŋan pa'alɛ, te to dɛna malema bonɔ. Hom la ho kɔma tɔntɛ n bala saŋa woo wo Na'ayenɛ n bo a nɔɔrɛ se'em la. 16Moses n ta sokɛ be'em bo'olom boa la yele ta baŋɛ te ba nyɔ' ka zan'an mɛ la, a sunsunya nyie la Aron dayɔɔhe la Eleazar la Itamar la. Te a soke yeti, 17Wane te ya ka obe be'em bo'olom la toolom zen'an la poan? Bo dela toolom bonɔ. Ba dekɛ bo ya te ya kaanbɛ bo la nɛreba la te la dɛna ba be'em duuhego te ba ka tare ganleŋɔ Na'ayenɛ nɛŋan. 18Duŋa la ziim n ka tare kɛn' Saraa la poan ha la dene la ya zin'ire toolom zen'an la obe ka nɛnɔ la wo mam bo ya nɔɔrɛ se'em la. 19Te Aron lerege Moses yeti, Behɛ zina ba to'e nɛreba wa be'em bo'olom la ba nyɔ'an bo'olom mɛ kaanbɛ Na'ayenɛ nɛŋan ge te yele ana sina ge sige mam zuo wa. N han di ne be'em bo'olom la, Na'ayenɛ poorɛ wan pee? 20Moses n wom dena wa la, la ma'ɛn a suunre mɛ.

will be added

X\