Malema 1

1Te Na'ayenɛ yi' Moses Sogorɛ la poan na, yele en yeti, 2Yele Israeldoma wa yeti, ba se'em han tare a bo'olom na te a bo Na'ayenɛ, bo dɛna duŋa te a yehe ka a nii bii a duŋbɔɔnlɔgɔ poan. 3Bo'olom la han dɛna nyɔ'an bo'olom, a daana yehe ka a dunhe poan, te ka dɛna duŋdɔɔ te sɛsɛla ka eŋɛ ka. A tara ka wa'an Sogorɛ nɔɔrɛ na, te Na'ayenɛ to'e. 4A daana dekɛ a nu'o pagalɛ duŋa la zuo, te Na'ayenɛ to'e te la dɛna a be'em duuhego. 5A kɔrɔgɛ duŋdɔɔ la Na'ayenɛ nɛŋan bilam, te Aron dayɔɔhe la n de malemadoma la dekɛ ka ziim la ka'ahɛ yeele kaanbegɔ daka la n boe Sogorɛ nɔɔrɛn poan na la loga la zan'an mum. 6A daana siie nyɔ'an bo'olom duŋa la, yehe ka nɛndaa nɛndaa. 7Aron dayɔɔhe la n de malemadoma la toorɛ bugum daka la zuo, maalɛ dɔɔrɔ pagalɛ bo zuo, 8ge nya maalɛ nɛnɔ la zan'an, zuo la, la kaam la pagalɛ dɔɔrɔ la n toorɛ la zuo. 9A daana pee duŋa la pooren lɔgɔrɔ la, la ka na'ma la, te malemadaana la nyɔ' nɛnɔ la zan'an daka la zuo. Nyɔ'an bo'olom n bala, nyɔ' bo Na'ayenɛ, tare nyuŋo soŋɔ bo en. 10Se'em han loe duŋa a duŋbɔɔnlɔgɔ poan, pehego bii boa te ka dɛna a nyɔ'an bo'olom, ka dɛna duŋdɔɔ te sɛsɛla ka eŋɛ ka. 11A kɔrɔgɛ ka kaanbegɔ daka la zuɔ bɔba Na'ayenɛ nɛŋan. Te Aron dayɔɔhe la dekɛ ka ziim la ka'ahɛ yeele kaanbegɔ daka la loga la zan'an mum. 12A daana yehe duŋa la nɛndaa nɛndaa, te malemadaana la maalɛ nɛnɔ la zan'an, ta' la zuo la la kaam la pagalɛ dɔɔrɔ la n toorɛ daka la zuo. 13A daana pee duŋa la pooren lɔgɔrɔ la, la na'ma la, te malemadaana la nyɔ' ba zan'an daka la zuo. Nyɔ'an bo'olom n bala, nyɔ' bo Na'ayenɛ, tare nyuŋo soŋɔ bo en. 14Se'em nyɔ'an bo'olom han dɛna niihe buuri poan te a yeti a nyɔ' bo Na'ayenɛ, a daana bo dayene bii nadoma dayene. 15Malemadaana la tare dayene la paɛ kaanbegɔ daka la, ŋmɛlegɛ de zuo fike, ge nyɔ' de zuo la daka la zuo. A dekɛ ka ziim yɔɔhɛ daka la logorɛ. 16A yehe ka pooren lɔgɔrɔ la lobe bahɛ bonkanbela la n ka'ahɛ bahera daka la pooren ha la. 17A gorɛ dayenɛ kelompagehe anregɛ dɛ la nu'uhe, ge a da anregɛ dɛ yema yema. La a nyɔ' dɛ dɔɔrɔ la n toorɛ daka la zuo la. Nyɔ'an bo'olom n bala, nyɔ' bo Na'ayenɛ, tare nyuŋo soŋɔ bo en.

will be added

X\