Fabelegɔ 5

1Na'ayenɛ, tɛnra yelese'a woo n eŋɛ to wa. Behɛ nyanɛ se'ere n di to wa. 2Saama, n fan' to sɔ'ɔlom sɔna. Ge fan' to yiya sɔna. 3Tomam lebege la keebehe, ka tara sɔ. To madoma ana mɛ wo pɔkɔnpa la. 4Ko'om sebo te tomam wan nyu' to ne yɔ mɛ. To han bɔta bontoola, to ne yɔ mɛ. 5Yɔgɔhɔga te ba dekɛ yɔgɛ to yugulehe, vɛ'ɛra. To taregɛ mɛ, ge me kan nyɛ vo'ohogo. 6To dekɛ to mɛŋa bo la Mizraim, la Asiria teŋa, te to nyɛta dia dita. 7Tomam yaabdoma n tom be'em ge ki, te tomam nya sɔe ziira ba zeero la. 8Da'aba n sɔe tomam behera. Te nɛra ka bɔna wan fan' to ba nu'uhen bahɛ. 9Te ne ponhɛ la te nyonrɛ, ge nyɛ dia di. Se'ere n sɔe la, so'a n sogɛ mɔen gura tɔ. 10Kom la, la wontɛɛŋa la bahɛ te la wona to mɛ wo doka zen'an la. 11Ba zɛɛre pɔgɔhe mɛ ho teŋkpe'eŋɔ wa poan, ge zɛɛra pɔgɔsa'ara Yuda teŋhe poan. 12Nyɔgɛ nabiihe lo ba nu'uhe yule, na'ahegɔ ka boe bɔ'ɔra bonkɛgehe. 13Boraahe yare kɛn' la nɛɛŋɔ, te bonbilipaalehe kɛn' dɔɔrɔ zia, ba di zuo. 14Bonkɛgehe la, ka le zin'an teŋa la nayaŋa nɔɔrɛn. Te bonbilipaalehe bahɛ ba yooma yooŋɔ. 15To nyeema la yehe to sunya poan mɛ, te to wa'ahe la nya lebege koonɔ. 16Na'am muŋa la vuke to zuin mɛ lu teŋa. Yele boe to zuo, la tomam n tom be'em la! 17Wana zuo te to sunya fɔlɔgera wa. Yele ana wa zuo te tomam nini nyalegera wa. 18Zion teŋa la n nya bala lebege daboo gan'an, te sanhe to'e de zuo wɔɔla, te to kɛla wa. 19Ge hom Na'ayenɛ bɔna wuuha. Ho na'am la boe la bala bɔ'ɔra buuri saŋa woo poan. 20Bene zuo te ho tamɛ tomam yele zan'an zan'an bala? Bene zuo te ho zagahɛ tomam yuue bala? 21Na'ayenɛ, sɛ tɔ ze'ele ho mɛŋa, te to zɛ'a kaŋkaŋe. Tee to dabeha la, te a ana wo deemen deemen ha la. 22Ho sunsunyiim la kan bahɛ te ho zagahɛ tɔ.

will be added

X\