Fabelegɔ 4

1Sanlema n lebege sɔbelegɔ, sanlema la soŋa la eŋɛ la wane tee? Toolom kuga la n bala yeregɛ gan'an sore woo zuo la. 2Teŋkpe'eŋɔ wa kɔmsoma la, n som, ge tebegɛ wo sanlema la, n nya bala te ba tara ba zɛleha wo yɔgɔrɔ dokɔ te yagombaha yagom la. 3Sanhe bo'ore ba kɔma bin'ihom mɛ, ge behera ba, ge mam nɛreba wa puurɛ tɔ mɛ, te ba yalegɛ wo mɔen taataa la. 4Ba bahɛ te ba kɔmbilɛɛhe zɛlehe n tabɛ ba nɔya poan ha ko'nyuuro zuo. Kɔma n eere sohora dia, te se'em me kan bo ba sɛla. 5Sɛba n daa dite nyɛlom la, n bala vibera sɔya zuto la. Sɛba n ihege na yɛɛra lɔgɔkanra la, n bala dɔla tampuga zuto pin'iha lɔgɔrɔ wa. 6Mam nɛreba wa tobedɔnlegerɛ la, tulugɛ gana namehe seko n daa sige Sodom teŋa zuo sagom sɛla woo boyena ge te ba ka wom nɛra damenɛ bini la. 7Ba nabiihe daa pelege mɛ wo saakuga la, pelege wo iilom la, te ba iŋhe mɔ'ɛ wo kuga mɔlebagenɛ, te ba ana wo kuga poonhogɔ. 8Nananawa, ba nya sobe mɛ wo dogu vuunlom la. Ba han bɔna sore zuo kena, ho kan baŋɛ ba. Ba iŋa la booe mɛ, tabɛ la ba koba, te ba ku'e wo dɔkɛ'ɛŋa la. 9Sɛba te so'a kɔrom ba la, tare popeelom, nyana sɛba n vibere la, ba nyane sɛba te teŋa la mɔŋɛ ba boom te ba waŋera daarɛ woo yɛ'a kum la. 10Mam nɛreba wa sagaŋɔ dabeha la poan, pɔgɔse'ehe n de ninbɔn'zɔteba, nyɔkɛ la se mɛhe kɔma dogɛ, te ba dɛna ba dia. 11Na'ayenɛ kɔ'ɔn bo a sunsunyiim la la sore. A ka'ɛ la a sunsunyiim tuluga la bahɛ na, te bo di teŋkpe'eŋɔ wa, ta ta' la ka ɛnberɛ zan'an. 12Te teŋa wa zuo nadoma ka sakɛ, te nɛreba n boe teŋa wa zuo me ka sakɛ te dima wan nyaŋɛ doohe Yerusalem teŋa nayahe la poan kɛn'. 13Nɔtɔgɔheba la yelebe'ero la, la teŋa la malemadoma la n ka'ahere nɛre tontɔɔdoma la ziim teŋa la poan la n sɔe yele ana wa. 14Ba nya dela fɔɔhe ɛɛra sore zuo, lerom ba mɛhe la ziim, te nɛra ka bɔna wan bɔta te a pon kalom ba futo. 15Nɛreba tanhere ba mɛ te, Dɛngerɔdoma wa, fɔnregɛ ya ha, fɔnregɛ, fɔnregɛ ya. Da kalom ya sɛla. Te ba yare lebege nɛreyooro, ɛɛra tuuna. La pon gan'an mɛ na, te ya pon kan le kɛn'ɛra teŋkana wa poan. 16Na'ayenɛ mɛŋa n yeregɛ ba bahɛ. A ka le beha ba. Na'ahegɔ ka le bɔna bɔ'ɔra malemadoma la. Bii a behɛ nyɛ kema la. 17To nini limihe sore zuo mɛ, te to wan nyɛ soŋorɛ, ta koŋe. To ɛ la ninmɔ'ɔrɛ, te to wan nyɛ teŋsɛka doma n wan fan' tɔ, ɛ ta koŋɛ. 18Nɛreba n dole to na'ma, te dabeem tara tɔ, te to ka tana ɛɛra to mɛŋa teŋa wa poan. Tomam ba'ahegɔ pɔnre, to dabeha ka gee zo'e. To ba'ahegɔ dabaherɛ la paɛ na. 19Sɛba n digere to la korehe mɛ. Ba gane selega n ze'ele saazuo ha suŋera na. Ba dige to mɛ zom zɔya zuto. Ba sogɛ la mɔɔ poan gan'an ge gura to. 20Tomam vom boe la naba te Na'ayenɛ sɔ' en la kaam, se'em te tomam daa behera te a wan beha tɔ te to bɔna teŋhe poan fai la, ba bɛnrɛ nyɔkɛ en mɛ tare keŋɛ. 21Edom teŋa nɛreba wa nyeena mɛ, ge kerena. Hom se'em n kɛn'ɛre Uz teŋa poan wa, kerena. Ge wanɛ la wan kae paɛ ho na. Ho wan nyu' buge sengehɛ bahɛ. 22Zion teŋa wa, ho be'em tobedɔnlegerɛ la ba'ahɛ ya. A kan bahɛ te ho le bɔna yeŋa. Ge hom Edom teŋa wa, ho wan nyɛ namehegɔ, ho be'em la zuo.

will be added

X\