Fabelegɔ 3

1Mam nyɛ la namehegɔ Na'ayenɛ sunsunyiim kpa'aherɛ la poan. 2A sa'ɛ mam mɛ, tare mam na kɛn'ɛhɛ lika poan, te nɛɛhom ka bɔna. 3A zabera mɛ la mam ma'an, beere n yelegere woo. 4A bahɛ te mam iŋganɛ, la de nɛnɔ berege mɛ, a kɔ' la mam konba. 5A gan' mɛ pigira mam, ta pin' mam zan'an, la too, la mɛlehegɔ. 6A bahɛ te mam zin'an la lika poan, daarɛ woo wo ke'endoma la. 7A mɛ la dangoone kae mam, te n kan ta'an zɔ yehe. A dekɛ la zɔntɔ kpɛ'ɛma ba' n nu'uhen. 8Mam yi'ire mɛ, ge kaaha ɛɛra soŋorɛ, te a gu' mam po'ohegɔ la, ka kɛleha. 9A bilom la kugu kanra le' mam sore la, ge gonlom dɛ. 10A gan' gura mam mɛ wo dea la. A pigiri mam mɛ wo gbegenɛ la. 11A ve'e mam mɛ yehe n sore poan ta aanhom mam zɔnra zɔnra. A bahɛ te mam mɛ la sunsagaŋɔ. 12A ba' la a tanhɔ, te mam dɛna a tia te a dagera. 13A foe la pɛɛma a loko poan, tɛn' mam poan ha. 14Mam nya dela nɛra woo bon la'ala, ba tara la kɛhega yooma yoona toora mam daarɛ woo. 15A perɛ mam mɛ la ɛnregɔ, bahɛ te vom dɛna too bɔ'ɔra mam. 16A bahɛ te mam nyɛna n obe kuga. Ge booɛ mam la tampegelom. 17Mam vom ka nyɛte sunma'ahom, mam tamɛ popeelom n ane se'em mɛ. 18Mam mi' te mam soŋa ba'ahɛ ya, ta ta' la mam n n tɛn'ɛhe ne te n wan nyɛ sɛla Na'ayenɛ zen'an la. 19Mam daaŋɔ wa, la n tuuŋɔ wa, ane me wo muhure la, la tɔe bo mam mɛ wo yabega la. 20Mam suunre tɛn'ɛhere n daaŋɔ wa yele la daarɛ woo, tonhegera n poan ha. 21Ge mam tɛɛn sɛla n poan ha. Bala zuo, n tare potɛn'ɛrɛ. 22Na'ayenɛ nɔŋerɛ la ka tare ba'ahegɔ. A ninbɔn'zɔre la ka tare tɛka. 23Bolika woo ba dela paalega. Ho birikinte la ka tare makerɛ. 24Mam potɛn'ɛrɛ wa, Na'ayenɛ n de mam tɔntɛ. Mam potɛn'ɛrɛ boe la enŋa poan. 25Na'ayenɛ tare la som bɔ'ɔra sɛba n ze'gura en, la potɛn'ɛrɛ se'ere woo n eere en. 26La ane la soŋa, te nɛra ma'ɛn a mea baanlam, gura Na'ayenɛ mea faanrɛ la. 27La ane soŋa, te nɛra kpeŋe a mɛŋa, a bonbilomen. 28Na'ayenɛ han le yeti ho dita ninbɔn'ɔn, la ane soŋa te ho sakɛ bala ana baanlam. 29La ane soŋa te ho nɔɔrɛ sonregɛ teŋa, ge te ho tara potɛn'ɛrɛ. 30La ane soŋa te nɛra bahɛ a sapɛnka bo te ba ŋmɛ, ge te ho dɛna bontoola. 31Daana la kɔ'ɔn kan zagaha ho bala yɛ'ɛha. 32La enŋa n pon bo ho sunsagaŋɔ la, a wan kelom zɔ ho ninbɔn'ɔn, doohe a nɔŋerɛ kantɛ la poan. 33Se'ere n sɔe la, Yenɛ ka sɛ, ge muguhera, bii, dekɛ sunsagaŋɔ kɛn'ɛhɛ nɛra. 34Ba han nɛɛra sɛba n boe paka deo poan la na'ma koora. 35Lila nɛreba boorɔ, Gaŋe Zan'an Yenɛ wa nɛŋan, 36te boorɔ doma mɛ, Daana wa ka nyɛte? 37Ane n wan ta'an bo nɔɔrɛ te la tom, han dagana Daana la pon maahom dɛ bala? 38Dagɛ Gaŋɛ Zan'an Yenɛ la nɔɔrɛn te som, la be'em wan ta'an ze'ele yehe na tom? 39Bene n sɔe te hom nɛresaala han nyɛta tobedɔnlegerɛ ho be'em zuo, ho gɔngelena? 40Bahɛ ya te to malom behɛ ya to etegɔ soŋa, la to ŋmɛregɛ lebe Na'ayenɛ zen'an na. 41Bahɛ ya te to dekɛ to sunya, ge zɛnkɛ to nu'uhe, bo Yenɛ wa n sɔe zan'an wa. 42Tomam ganlom ho mɛ, bire to pɔya bahɛ hɔ, te ho me donlegɛ to toberɛ. 43Ho dekɛ la sunsunyiim pin' ho mea, dige tomam, kɔrom tɔ te ninbɔn'ɔn ka tara hɔ. 44Ho dekɛ la saŋgbanɛ pin' ho mea, te to po'ohe seko kan ta'an paɛ ho na. 45Ho bahɛ te to lebege la dɛngerɔ, dɛna sɔgɔrɔ nɛreba wo teŋasoka teŋa wa zuo. 46Tomam diŋdoma la woo ya' la ba nɔya yaala tɔ. 47Paleŋ'ɛnka, la bogoro poan lua, n lu tomam zuo, te sunsagaŋɔ, la sagaŋɔ ma'an nyɔkɛ tomam. 48Mam nini zote mɛ la nintam wo kolaa ko'om la, n nɛreba wa sagaŋɔ wa zuo. 49Mam nini wa nintam wan yɔɔra la bala kan go'e, bii yelegɛ, 50gura te Na'ayenɛ wa n boe zuin ha wa, ta sure behɛ mam na. 51Mam nini wa n nyɛte sɛla n ete pɔgɔhe wa n boe n teŋa wa poan la, bo'ore mam la sunsagaŋɔ. 52Sɛba n yeen dina la mam yoo la, digere mam mɛ wo kɔn'ɔŋɔ la 53Ba zan'ɛn mam la voto bahɛ boko poan ha. Bilom kuga di' mam boko la poan na. 54Ko'om n libera mam zuo, te mam yele n mea yeti, Mam ba'ahɛ mɛ n bala. 55Mam boe la boko la poan ha, ge yi hom Na'ayenɛ yu'urɛ. 56Ho wom mam fabelegɔ la, da le' ho toba bahɛ mam n kaahe bɔ'ɔra ho na te ho fan' mam bahɛ wa. 57Mam n yi ho la, ho vuruge lɛm mam mɛ na, yele mam yeti, da bahɛ te dabeem tara hɔ. 58Hom Daana wa n to'e mam daaŋɔ la, hom n yɔ to'e mam vom. 59Hom Na'ayenɛ nyɛ tuure se'ere woo n eŋɛ mam. Gankɛ n yele wa bo mam. 60Ho nyɛ ba potɛn'be'ero seto te ba tara. Ge nyɛ ban tare yeletooro seto dɔla n poore. 61Na'ayenɛ, ho wom ban toore mam se'em. Ge nyɛ ban tare yeletooro seto dɔla n poore. 62Beere n yelegere woo, mam diŋdoma la waahene mɛ, ge parona baha n zuo. 63Beha, ba han zin'an, bii ba ze' mɛ, mam te ba tɔgɔra. Ba tara la kɛhega yooma yoona toora mam. 64Na'ayenɛ, lebehe yɔ ba tooma la, yɔ ba ba tooma la yɔɔrɛ n nare se'em. 65Bo' ba sunsagaŋɔ, pɔ' nɔɔrɛ bahɛ ba zuo. 66Dige ba la sunsunyiim, sagom ba, saalom ba yu'ura ho teŋa wa zuo bahɛ!

will be added

X\