Fabelegɔ 1

1Teŋsɛka n ne perɛ la nɛreba la, n bala gan'an voore wa! Kaŋa n bala nya ana wo pɔkɔɔnrɛ wa, hom se'em n daa kpe'em teŋhe woo poan la! Hom se'em n de nabia teŋhe woo poan la, n bala lebege da'aberɛ wa! 2A ne kele mɛ yu'uŋɔ, te nintam boe a nɛŋa zan'an. A zabadoma la zan'an, se'em ka boe wan pan'ahe en. A zɔdoma la zan'an pan'ahɛ en bahɛ la yoo, ba lebege la a diŋdoma. 3Ba pɛnregɛ Yuda loŋe la teŋa kayema poan, te a ta bɔna namehegɔ, la toonkanra poan. Yuda teŋa nɛreba yeregɛ mɛ bɔna teŋhe woo poan, ka tara vo'ohogo zen'an, muguhego la n paɛ en se'em ma'an la, n de a diŋdoma la woo me dige na nyɔkɛ en. 4Sɔrɔɔ seto n dole yɛ'a Zion teŋa wa poan na la, gan' la suram. Nɛra ka le dɔla to zuo kena de'eŋɔ na, ka nayahe la zan'an gan' la yɛɛ, te ka malemadoma la kɛla, te ka pugunto sunya sagom. Ɛnregɔ ma'an n de ka lɔkɔ! 5Ka diŋdoma n nya de ka kpɛ'ɛndoma, panrɛ. Na'ayenɛ n dɔnlegere ka toberɛ, kan ganlom la zuo, te ka diŋdoma nyɔkɛ ka kɔma zan'an keŋɛ, te ba dɛna ba yamehe. 6Na'am yehe Zion teŋa wa poan mɛ, ka nabiihe la ane wo koonrɔ n ka nyɛte yaama ɔbera, ge ana se'em la, zɔ ba dima la nɛŋan. Se'ere n sɔe la, paŋa ka boe te ba wan ta'an ze'ele zabɛ. 7Yerusalem tɛŋa wa n boe muguhego, la tuuŋo poan wa, ne tɛɛn la ka soŋa dabeha la te lɔgɔsonɔ seto daa ne bɔna ka nu'uhen dɛna ka denɛ la. Ka nɛreba la n lu dima la nu'uhen, te se'em ka bɔna wan soŋɛ ka la, dima la kɛhere ka mɛ. 8Yerusalem be'em la ba' nyie la suunre, bala n bahɛ te ka nya lebege bonkɛhela, sɛba woo, n daa na'ahere ka la, zagahɛ ka mɛ, ba nyɛ la ka yanɛ. Yerusalem teŋa wa pin' la ka nɛŋa la valom, wo nɛra la, kɛla. 9Ka toonfɛn'ɛha la taɛ la ka futo. Teŋa wa daa ka tɛn'ɛhɛ ka beere yele. Ka lua la dela pakerɛ, te se'em ka bɔna wan pan'ahɛ ka. Na'ayenɛ, behɛ n daaŋɔ wa, dima la nyaŋɛ mam mɛ! 10Diŋdoma nu'uhe, n page ka lɔgɔsonɔ la woo zuo, ka ninin. Te teŋyooro nɛreba kɛn' Yenɛ yire la na, fan'. Nɛresɛba n ka sone ba lagom pa'ahɛ Na'ayenɛ nɛreba la poan na la, n bala kɛn' de poan na wa. 11Ka nɛreba la zan'an kele mɛ, ɛɛra dia, tara ba lɔgɔrɔ kɔɔha tɔ'ɔha dia, te ba da vibe. Na'ayenɛ, behɛ, behɛ lan ane mam se'em, n ka le tara vɔnrɛ! 12Yamam sɛba n dole tɔla wa, la ka daane ya? Behɛ ya, namehegɔ han tabelɛ ana wo mam namehegɔ wa. Na'ayenɛ mɛŋa n dekɛ namehe kona wa nameha mam a sunsunyiim daarɛ wa. 13A ze'ele la saazuo ha, tom bugum bahɛ na, te bo wa'ana kɛn' mam konba poan ha. A dekɛ la yoka gɛnrɛ mam na'ma, zan'ɛn ma lebe pooren. A bahɛ mam la woŋerɛ poan, te mam zɛ'a ligira. 14Mam ganleŋɔ la lo' tabelɛ la yɔgɔhɔga. A mɛŋa nu'o n kan'ahɛ mam ganleŋɔ la lagom taaba lo' yule mam nyugela, te bo velegera mam sigera teŋa. Daana la n kɔ'ɔhɛ mam giinla, ge dekɛ mam eŋɛ diŋdoma sɛba n gane mam nu'uhen. 15Daana la ka boe mam Pɛɛntɛɛnreba wa poore. A loe la saŋa kayema bahɛ mam zuo, te saŋkaŋa poan, ba wan ko mam pɛɛntɛɛnreba la. Daana la nɛ Yuda teŋa wa mɛrehɛ mɛ, wo tiihe dia te ba ne mɛrɛ se'em ŋmɛkera daam la. 16Yele ana wa zuo te mam kɛla nintam. Se'em n wan bogelɛ mam suunre, ge kpemehe mam la, zaan mɛ la mam. Dima la nyaŋɛ mam mɛ, te mam kɔma zɔ yeregɛ. 17Zion teŋa wa kokɛ la ka zuo kaaha, ge se'em ka boe wan pan'ahɛ ka. Na'ayenɛ mɛŋa n bo sore, te Yakob sɔɔnrɔ, dɛna a diŋdoma. Yerusalem teŋa lebege la zen'fɛn'ɛhegɔ bɔna ba poan. 18Na'ayenɛ tare boorɔ, mam bire la poore bahɛ a yelehom la! Nɛreba wa, kelehe ya, ge behɛ n namehegɔ wa. Ba pɛnregɛ mam pugunto, la bodibinpaalehe loŋe la teŋa. 19Te mam yi sɛba n nɔŋɛ mam la, te ba pan'ahɛ mam bahɛ yoo. Mam malemadoma, la keendoma la ɛ la dia te ba di da vibe ma'an, ɛ ta ki. 20Na'ayenɛ, behɛ n suunre wa n sagom, te n puurɛ ma'ɛn se'em. Mam suunre sagom mɛ la n mɛŋa, n pobirega wa zuo. So'a n boe mam sɔya zuto, ŋmata, te nɔyalegerɛ bɔna yiya poan, wo nɛra ki la. 21Nɛreba wom mam kaahere se'em, ge te nɛra ka bɔna wan bogelɛ n suunre. Mam diŋdoma wom mam daaŋɔ wa mɛ, te ba poorɛ pee, la hom Na'ayenɛ n eŋɛ mam bala la. Tare dabahese'ere te ho maahom gura ba la, wa'an ba zuo na, te ba me ana wo mam n ane se'em wa. 22Beha nyɛta ba be'em la zan'an, la ho donlegɛ ba toberɛ, wo hom eŋɛ mam se'em n be'em wa zuo wa. Mam kaahega la ba' gaŋɛ mɛ, te mam suunre tonhegera.

will be added

X\