Kema 7

1Te Yerub Baal se'em n de Gideon la a nɛreba zan'an ihege bolika yu'uŋyu'uŋɔ keŋɛ ta tin' ba sogora pɔnra la Harod bulega. Ge Midiandoma la me pon tin' ba sogora la Moreh zoore, zuɔ nu'o bɔba bɔn'ɔren la. 2Te Na'ayenɛ yele Gideon yeti, Ho pɛɛntɛɛnreba wa zo'e me gaŋɛ te n dekɛ Midiandoma wa eŋɛ ya nu'uhen. Se'ere n sɔe la, Israeldoma wa wan ta ŋmɛ'ɛra ba nyɔn'ɔnrɔ te ba mɛhe paŋa te ba dekɛ zabɛ fan' ba mɛhe bahɛ. 3Bala, wa'ana bahɛ te la lu' ba tobai yele ba yeti, se'em n tare dabeem bii a paleŋa n ŋmɛ'ɛre bahɛ te nɛre bama la lebe. Te nɛreba tuha pihiyi' la bayi' ze'ele Gilead Zooren lebe ge te ba gee nɛreba tuha pia. 4Ge Na'ayenɛ yele Gideon yeti, Nɛreba la kelom zo'e me. Tare ba sige kolaa poan te n makɛ ba bilam. Mam wan eŋɛ se'em n wana: se'em wo te mam loe te a keŋɛ, a wan doohɛ hɔ keŋɛ ge se'em wo te mam ka loe te a doohɛ keŋɛ, a kan doohɛ keŋɛ. 5Te Gideon tare nɛreba la sige kolaa la poan. Te Na'ayenɛ yele en yeti, Yelege nɛresɛba n nyuure ko'om la wo baa n legere ko'om se'em la, ba tɔka la nɛresɛba n nyigele nyuura ko'om la. 6Nɛreba kɔbehe setan' n tare ba nu'uhen kan'abeha ko'om la nyuura ge te nɛresɛba n gee la nyiga nyuura ko'om la. 7Te Na'ayenɛ yele Gideon yeti, N wan dekɛ nɛreba kɔbehe setan' wa n kan'abehe ko'om la ba nu'uhen nyu la, fan' ya bahɛ ge dekɛ Midiandoma wa eŋɛ ya nu'uhen. Bahɛ te nɛresɛba wo n gee la ba zan'an kule. 8Nɛreba kɔbehe setan' la to'ohe nɛresɛba n lebe kule la disɛka te ba tare la ba tentana. Gideon yele Israeldoma la te ba kule ge gu' nɛreba kɔbehe setan' la te ba yee. Midiandoma la n daa boe teŋa nɔɔrɛ bɔn'ɔn la poan ge te Israeldoma la me bɔna saazuo ha. 9Daanden daarɛ yu'uŋɔ te Na'ayenɛ yele Gideon yeti, Ihege la ho keŋɛ sige teŋa nɔɔrɛ bɔba la te n dekɛ ba eŋɛ ya nu'uhen. 10Dabeem han tare ho, doohɛ la ho yameŋa Pura, te ya keŋɛ sige Midiandoma la n boe zen'en, 11te ya wan wom ba wan tɔgɛ se'em. Ya han wom ba'ahɛ, ya wan nyɛ' paŋa ta'an sige ta zabɛ la Midiandoma la. Te Gideon la a yameŋa Pura n doohɛ taaba sige Midian pɛɛntɛɛnreba la n boe zen'en la. 12Midiandoma la Amalekdoma la nɛresɛba n kɛn'ɛre dapoore bɔba la, lagom taaba zo'e wo sonwa'ara la. Ba nya gan'an bɔn'ɔn la poan la ba yogoma n ka tare kanlɛ ana wo kolega tentɔnɔ la. 13Gideon n paɛ Midian pɛɛntɛɛnreba la n gan' zen'en la, ta wom te boraa kayema n yɛta a tadaana enŋa zaanhom la zaanheŋɔ. A yeti, Mui boroboro n biline kɛn'ɛra sogora wa poan na kɔ'ɔn zan'ara lɔbera te sogora la lu' saahom saahom. 14Te a tadaana la lebehe en yeti, Yele dɛna wa dela Israel boraa Yoas dayɔa Gideon so'a n bala. Yenɛ dekɛ Midiandoma wa la sɛla wo n boe kala eŋɛ la a nu'uhen. 15Gideon n wom zaanheŋɔ la vɔnrɛ la ba'ahɛ la, a po'ohɛ Na'ayenɛ. Ge te a lebe Israeldoma la n boe zan'an la ta yele ba yeti, Ihege ya! Na'ayenɛ dekɛ Midiandoma la eŋɛ to nu'uhen. 16A yelege nɛreba kɔbehe setan' la la sugumnɔɔren botan' ge dekɛ tentana la leŋehe te bugum bɔna bini bo ba. 17A yele ba yeti, Behɛ ya mam ete se'em la ya eŋɛ bala mea. N han ta paɛ ze'ele, ya eta wo mam ete se'em la. 18Ya han ta wom te mam la nɛresɛba n tole nɛŋa la han ta peebe to tentana la, yamam sɛba n gilige ba kae mum la, ya me kɔkɛ peebe ya tentana la ge voole te la dela Na'ayenɛ dɛne la Gideon dɛne. 19Gideon la nɛreba kɔbega n ihege yuun sunsuwa keŋɛ ta pɔnra ba diŋdoma la n gan' zen'en la, peebe ba tentana la ge wɔnregɛ ba leŋehe se'ehe te ba zanla la. 20Te nɛreba tansuga atan' la n me peebe ba tentana ge wɔnregɛ ba leŋehe la. Ba zanlɛ la bugum la ba gɔbega nu'o ge zanlɛ ba tentana la zuɔ nu'o, me peebe ge voole yeti, Na'ayenɛ so'a la Gideon so'a! 21Te Gideon la a nɛreba la n ze'ele kae ba diŋdoma la mum, Midiandoma la zɔ yehe na te tagurega luta. 22Nɛreba kɔbehe setan' la n peebe ba tentana la, Na'ayenɛ bahɛ te ba diŋdoma la tuluge koora taaba la ba so'ahe. Te ba zɔ' ta paɛ Bet Sita n boe Zerera teŋa tontɔɔ tole Abel Mehola teŋa n lɛm Tabat teŋa la. 23Israeldoma la basɛba n naa la Naptalidoma la Aserdoma la Manasedoma dige Midiandoma la. 24Gideon tom tontoneba Epraim teŋse'ehe wo n boe zoore zuo la te ba sige na zabɛ la Midiandoma ge gu' Yordan Kolaa n boe Bet Bara teŋai. Te Epraimdoma la zan'an sige gu' Yordan Kolaa paɛ Bet Bara teŋa la. 25Ba me nyɔkɛ Midian nɛŋadoma bayi' Oreb la Zeeb. Ba ko' Oreb la la Oreb Taŋa ge ko' Zeeb me Zeeb daam ŋmɛkerɛ. Ba digɛ Midiandoma ta fige Oreb la Zeeb zuto, tare bo Gideon n boe Yordan Kolaa la zen'an.

will be added

X\