Kema 6

1Israeldoma le tom be'em Na'ayenɛ nɛŋan, te Na'ayenɛ dekɛ ba eŋɛ Midiandoma nu'uhen yuuma ayopɔe. 2Te Midiandoma la paŋa gana Israeldoma la zuo, te Israeldoma kebehe la tanhe yogoro zoore leŋe sogora ba mɛhe bini. 3Bala saŋsɛka wo te Israeldoma han ne ta bure, Midiandoma la Amalekdoma la la nɛresɛba n kɛn'ɛre dapoore bɔba teŋhe la ne keŋɛ ta zabɛ la ba mɛ. 4Ba ne maahom keŋɛ Gaza teŋa la teŋse'ehe n boe bilam la, te ba gan'an sagona Israeldoma disɛka n boe vatɔ la poan, ge ko' ba piinhe la nii la bonhen. 5Diŋdoma la kene ge tare la ba dunhe la ba sogora, ba ne bibige Israeldoma la me wo sonwa'ara la. Nɛreba la ba yogoma n ka tare kanlɛ, wa'ana te ba sagom Israeldoma la dia la bahɛ. 6Midiandoma la bahɛ te Israeldoma wa di ninbɔn'ɔn te Israeldoma la kaahɛ bo Na'ayenɛ te a soŋɛ ba. 7Israeldoma la n daa kaahɛ bo Na'ayenɛ la Midiandoma n namehe ba la zuo, 8Na'ayenɛ tom a nɔtɔgɔha Israeldoma zen'en te a yele ba yeti, Na'ayenɛ Israel Yene yele ya yeti, mam daa tare ya Mizraim da'aba teŋa la poan yehe na. 9Mam daa fan' ya la Mizraimdoma la nɛresɛba wo n muguhere ya la nu'uhen bahɛ digɛ ba ge to'e ba teŋhe bo ya. 10Mam daa yele ya yeti, mam dela Na'ayenɛ ya Yenɛ la. Da kaanbere ya Amoridoma te ya kɛn'ɛre baga la. Ge ya daa zagahɛ mam nɔɔrɛ la mɛ. 11Te Na'ayenɛ soŋora wa'ana zin'ire Abiezer boraa Yoas tikantɛ n bɔna Oprah teŋa la teŋa. En wa'ana la, Yoas dayɔa Gideon n daa sogɛ tɔɔra a ki daam ŋmɛkerɛ zen'en a le'ehɛ Midiandoma la zuo. 12Te soŋora la nɛɛ a mɛŋa pa'alɛ Gideon ge yele en yeti, Kansaŋka, Na'ayenɛ ze' hɔ poore mɛ! 13Gideon lebehe en yeti, Na'ayenɛ han ze'ene tomam poore, bene n sɔe te yele ane zan'an eta tomam? A nyalematooma la kerehetooma te tɔ sɔyaabdoma n yuun tɔgɔra pa'ala tɔ la bɛɛ? Ba ne yeti, dagɛ Na'ayenɛ n tare tɔ yehe Mizraim teŋa poan na? Ge nananawa Na'ayenɛ lobe to mam bahɛ mɛ dekɛ tɔ eŋɛ Midiandoma wa nu'uhen. 14Te Na'ayenɛ mɛŋa behɛ en ge yele en yeti, Ho tare paŋa. Keŋɛ ta fan' Israeldoma la Midiandoma la nu'uhen bahɛ! N ka tom hom wa? 15Te Gideon lebehe en yeti, N Daana, nam wan eŋɛ la wane ta'an fan' Israeldoma bahɛ? Behɛ! Manase yizuo la poan tomam yire n pɔ'ɛ bini ge mam dela bia n sɔ yire la poan. 16Na'ayenɛ yele en yeti, Mam wan ze'ele ho poore te ho ko' Midiandoma la zan'an! 17Gideon lebehe yeti, Ho han zo'ohɛ mam mɛ, pa'alɛ mam danlehom sebo te mam seren baŋɛ te hom tɔgɔre bɔ'ɔra mam. 18N beene ho mɛ zin'an kalam ge gura mam te n lɛbe tare n bo'olom na wa bo ho. Te Na'ayenɛ lebehe yeti, Mam wan gura te ho lebena. 19Te Gideon kule yire nyɔkɛ bobila ko' eŋɛ zom maalɛ boroboro n ka tare mi'ihom. Ge te a aanhom nɛnɔ la me dogɛ yahɛ eŋɛ piɔ poan ge ka'a biim la me eŋɛ dokɔ poan nya tare la zan'an wa'an tikantɛ la teŋa na bo Na'ayenɛ. 20Te Yenɛ soŋora la yele en yeti, Dekɛ nɛnɔ la boroboro n ka mi'ihom la bahɛ taŋa wa zuo ge ka'a biim la bahɛ. Te Gideon eŋɛ la bala mea. 21Te Na'ayenɛ soŋora paɛ taŋa la zen'en dekɛ a doore kalom nɛnɔ la boroboro n ka mi'ilom la, te bugum ze'ele taŋa la zuo taa nɛnɔ la boroboro n ka mi'ilom la, dita. Na'ayenɛ soŋora la bahɛ te bugum la taa la, a melom mɛ Gideon nɛŋan. 22Gideon nya baŋɛ te a dela Na'ayenɛ soŋora la, a yeti, N Daana Na'ayenɛ, mam ki ya! Se'ere n sɔe la mam nyɛ la Na'ayenɛ soŋora la n nini. 23Ge Na'ayenɛ yele en yeti, Sunma'ahom bɔna la hɔ! Da zɔ' dabeem, te ho kan ki. 24Te Gideon mɛ' bimbine bilam bo Na'ayenɛ, ge segɛ de yu'urɛ te Sunma'ahom Na'ayenɛ. De la boe la bala Oprah n boe Abiezerdoma teŋa la ta paɛ zina wa. 25Daanden daarɛ yu'uŋɔ te Na'ayenɛ yele en yeti, Nyɔkɛ ho sɔ lɔlesɛka n tagalɛ la dɛna yuuma ayopɔe la. Gbirege ho sɔ Baal bagarɛ bimbine la Asera bagarɛ n de dɔɔ la wɔnregɛ ba ba'ahɛ. 26Ge la ho mɛ' bimbine bo Na'ayenɛ ho Yenɛ la, mɛ' dɛ soŋa yagelɛ zoore wa zuo. Nyɔkɛ lɔlega la kaanbɛ ge dekɛ Asera bagarɛ la dɔɔ la te ho wɔnrege ba'ahɛ la, nyɔ' te la dɛna nyɔ'an bo'olom bo mam. 27Te Gideon loe la a yamehe pia te ba keŋɛ yu'uŋɔ ta tom Na'ayenɛ n yele en se'em la. Se'ere n sɔe la dabeem tare en la a sɔ yiredoma la a teŋa nɛreba, te a ka ta'an keŋɛ wontɛɛŋa ta tom dɛ. 28Teŋa la nɛreba n ihege bolika ba nyɛ te Baal bagarɛ bimbine la Asera dɔɔ bagarɛ la wɔnrege mɛ gan'an, ge nyɛ' bimbine paalɛ te lɔlega kaanbe de zuo. 29Ba soke taaba yeti, Ane n tom toon dɛna wa? Te ba ɛɛra ge sɔkera te ba wom te Yoas dayɔa Gideon n tom tone la bala. 30Teŋa la boraahe keŋɛ ta yele Yoas yeti, Ho dayɔa la wɔnrege la Baal bagarɛ bimbine la bahɛ, le yɛha a kɔ' Asera dɔɔ bagarɛ la lagom po pa'ahɛ bini la. Ho tare en yɛhena te to ko' en. 31Ge Yoas yele nɛresɛba wo n sɛ' ze' kaŋkaŋɛ te ba nini mo'ɛ la a dayɔa la yeti, Ya wan ta'an zabɛ bo Baal me yo bii ya wan ta'an fan' dɛ bahɛ me yo? Ho se'em n tare popeelom la dɛ, a kiiri la bolikain. Baal han seren dɛna la bagarɛ bimbine n ba kpe'em, bahɛ te a mɛŋa zabɛ la se'em n wɔnrege en bahɛ la. 32Te daanden daarɛ la te ba segɛ Gideon la yu'urɛ te Yerub Baal. Se'ere n sɔe a yeti, Bahɛ ya te Baal zabɛ la se'em n gbirige a bimbine la bahɛ. 33Te Midiandoma la Amalekdoma la zan'an la nɛresɛba n kɛn'ɛre dapoore bɔba ha la lagom taaba yakɛ Yordan Kolaa keŋɛ ta tin' ba sogora Yezreel Bɔn'en. 34Yenɛ Sea sige Gideon zuo te a nyɛ paŋa peebɛ tentanɛ yi' Abiezerdoma te ba lagahɛ taaba doohɛ a poore. 35A tom te ba yi' Manasedoma la Aserdoma la Zebulundoma la Naptalidoma la, te ba zan'an lagahɛ taaba doohɛ a poore. 36Te Gideon yele Yenɛ yeti, Ho han seren doohɛ mam te n fan' Israeldoma wa, wo hom pon yele mam se'em la, 37behɛ, n wan dekɛ pehego ganɛ biŋe dia tu'a zen'en la. Te mɛgelom han ta lu ganɛ la zuo ma'an ge te de gan'an zen'an la dɛna kɛ'ɛŋa, te mam wan baŋɛ te la dela hom seren doohɛ mam te n fan' Israeldoma wa, wo hom pon yele mam se'em la. 38La eŋɛ la bala mea. Gideon ihege bolika yu'uŋyu'uŋɔ dekɛ gɔŋɔ la ŋmekɛ ko'om la laa mea. 39Te Gideon yele Yenɛ yeti, Da bahɛ te ho sunsunyiim la mam ge te n le tɔgɛ ne pa'ahɛ. Bahɛ te n le makɛ behɛ. Nananawa bahɛ te mɛgelom la han lu ge bahɛ te pehego ganɛ la zuo dɛna kɛ'ɛŋa ge te ko'om gan'an zen'en la ma'alɛ. 40Yu'uŋkoŋɔ mea te Yenɛ eŋɛ bala. Te a bahɛ te gɔŋɔ la ma'an zuo dɛna kɛ'ɛŋa ge te ko'om gan'an zen'en te gɔŋɔ la gan'an la.

will be added

X\