Kema 4

1Ehud n daa ki' la pooren, te Israeldoma la le tom be'em Na'ayenɛ nɛŋan. 2Te Na'ayenɛ dekɛ ba eŋɛ Kanaan teŋa naba Yabin se'em n sɔe Hazor teŋa behera la. A zaba nɛŋadaana n de Sisera se'em n kɛn'ɛre Haroset Hagoyim teŋa la poan la. 3Israeldoma la kaahɛ bo Na'ayenɛ. Se'ere n sɔe la Sisera la tare la kuto zaba toroto kɔbehe sewae' ge me le muguhera Israeldoma la bala ta paɛ yuum pihiyi'. 4Saŋkaŋa ma'an Na'ayenɛ nɔtɔgɔba Deborah se'em n de Lapidot pɔga behera Israel teŋa la. 5Ka ne zin'ita la kpa'kpa' tia teŋa n bɔna Deborah teŋa n boe Aramah la Betel teŋhe teŋasoka la bɔna teŋsɛka n boe Epraim zoore zuo la. Te Israeldoma la zom ka zen'en te ka wan gankera ba yele bo ba. 6Te ka tom te ba yi' Abinoam dayɔa Barak n kɛn'ɛre Kedes teŋa n boe Naptali teŋa poan la, nya yele en yeti, Na'ayenɛ Israel Yenɛ bo ho a nɔɔrɛ to ho keŋɛ ta loe Naptali la Zebulun boraahe tuha pia tare ba keŋɛ Tabor Zoore zuo ha. 7Mam wan tara Sisera yɛhe na bo ya se'em n de Yabin zaba nɛŋadaana la a zaba yiri toroto sige Kison Kolaa na. Bilam te n wan dekɛ en eŋɛ ya nu'uhen. 8Barak yele Deborah yeti, Ho han wan dohɛ mam te to keŋɛ, mam wan keŋɛ. Ge ho han kan dohɛ mam te to keŋɛ, mam kan keŋɛ. 9Deborah yele en yeti, Tɔ. Mam wan seren dohɛ la ho te to keŋɛ. Te sɔrɔɔ wa te ho maahom te to keŋɛ wa ge Na'ayenɛ wan dekɛ Sisera eŋɛ la pɔka nu'uhen, te dagɛ hom n wan ŋmɛ'ɛra ho nyɔn'ɔn. Te Deborah ihege dohɛ la Barak te ba keŋɛ Kedes teŋa poan. 10Bilam te Barak yi' Zebulun la Naptali. Boraahe tuha pia lagahɛ doohe en la Deborah me doohe ba zan'an. 11Heber n de Ken nɛra n daa yelege a mɛŋa Kendoma n de Moses dɛɛma Hobab yaahe la zen'en, tin' a sogorɛ kɛn'ɛra Zananim la n pɔnre la Kedes teŋa poan. 12Te Sisera n wom te Abinoam dayɔa Barak zom Tabor Zoore zuo ha, 13a yi' la a pɛɛntɛɛnreba la zan'an la kuto yiire toroto kɔbehe sewae' toŋɛ taaba ze'ele Haroset Hagoyim teŋa ta paɛ Kison kolega. 14Debora yele Barak yeti, Saazuin! Zina daarɛ wa Na'ayenɛ dekɛ Sisera eŋɛ ho nu'uhen. Na'ayenɛ seren boe ho nɛŋan. Te Barak ze'ele Tabor Zoore zuo sige la a pɛɛntɛɛnreba ba nɛreba tuha pia. 15Te Na'ayenɛ dekɛ Sisera la a zaba toroto la zan'an la a pɛɛntɛɛnreba la zan'an eŋɛ Barak nu'uhen te a kɔrom ba, te Sisera ze'ele toroko zuo sige zɔ' la na'beela. 16Barak dige pɛɛntɛɛnreba la ba toroto ta paɛ Haroset Hagoyim teŋai. Ba kɔrom Sisera pɛɛntɛɛnreba la zan'an. 17Sisera zɔ me la na'beela ta kɛn' Ken boraa Heber pɔga Yael sogorɛ poan. Hazor teŋa naba Yabin la Heber se'em n de Ken nɛra la yuun tare la nɔnyɛlego la taaba. 18Yael ye'ehe na toohɛ Sisera, yele en yeti, Ŋmɛrege kalam n daana, ŋmɛrege mam zen'an wa. Da zɔ' dabeem. Te Sisera ŋmɛrege kɛn' pɔka la sogorɛ la poan te ka dekɛ fuo pile en. 19Te a yele pɔka la yeti, N bene hɔ mɛ. Eŋɛ ko'om fiin bo mam te n nyu', te ko'nyuuro n tare mam. Te pɔka la dekɛ iilom la kunpio bo en te a nyu', ge te ka lebehe pile en la fuo. 20A yele pɔka yeti, Ze' sogorɛ la nɔɔrɛ. Se'em han soke te se'em ka wa'an ka la na, hɔ yeti, Aai. 21En gan'are la a gin'ihe la gɔkante, a tarege me la zuo, te Heber pɔga Yael dekɛ kpa'a keŋɛ baanlam ta kpa' en te a ki'. 22Te Barak n doohɛ Sisera poore la, te Yael yehe to'ohɛ Barak yele en yeti, Wa'ana te n pa'alɛ ho boraa la te ho ɛɛra la. Te a keŋɛ kɛn' pɔka la sogorɛ la poan, te ba pon kpa' Sisera me te a ki' gan'. 23Dabaherɛ denɛ daarɛ la, Yenɛ dekɛ Kanaan teŋa naba Yabin eŋɛ Israeldoma nu'uhen. 24Te Israeldoma wa namehe Kanaan teŋa naba Yabin wa la bala, te a ta ki'.

will be added

X\