Kema 20

1Te Israeldoma la zan'an, la n ze'ele Dan ta nyɔkɛ Beerseba teŋhe la Gilead teŋa la, lagahɛ taaba Mizpa teŋa la poan na wo nɛra yene Na'ayenɛ nɛŋan. 2Israel buuri keendoma la zan'an wa'ana lagom ze'ele la Yenɛ nɛreba la, pɛɛntɛɛnreba tuha kɔbehe senaahe (450,000) n zabɛ. 3Te Benyamindoma la n wom te Israeldoma n boe Mizpa teŋa la ha. Te Israeldoma yeti, Yele ya tɔ. La eŋɛ la wanɛ te toonfɛn'ɛha wa bɔna? 4Te Levi nɛra la, se'em pɔka te ba ko' la, lebehe yeti, Mam doohɛ me la n pɔgɔbɔ'ɔreŋa ta paɛ Gibea teŋa la n boe Benyamin teŋa la poan la, la yu'uŋɔ, nya yeti to gan'arɛ. 5Te Gibea teŋa boraahe la wa'an yu'uŋɔ la na kae yire mɔm mam zuo. Ba bote nɛ te ba ko' mam mɛ, ba nyɔkɛ n pɔgɔbɔ'ɔreŋa la mɛ ta gan'are la ka te ka ki'. 6Bala te mam tare n pɔgɔbɔ'ɔreŋa paɛ na ŋma' ka nɛnɔ tɔnre Israeldoma sɔ'ɔlom zan'an. Se'ere n sɔe la, ba tom la be'em ge diihi Israeldoma nyanɛ. 7Israeldoma wa zan'an, ya wan eŋɛ la wanɛ? Tare ya te to kelehe ya. 8Te nɛreba la zan'an ihege wo nɛra yene la yeti, Se'em ka lebere a sogorɛ poan bii a lebe kule yire. 9Nananawa te wan ŋmɛ' la gbaŋa to wan loe nɛreba te ba zabɛ la Gibeadoma wa. 10Israel buuri la n gan'anrɛ zan'an la, nɛreba kɔbega poan, to wan loe nɛreba pia. Te nɛreba tuhure poan, te wan loe nɛreba kɔbega. Te nɛreba tuha pia poan, to wan loe nɛreba tuhure. Te ba tare dia kena bɔ'ɔra pɛɛntɛɛnreba la n ye'ehe te ba zabɛ la Gibeadoma la n boe Benyamin teŋa poan la, ba vi' toonse'ere te ba tom Israeldoma wa. 11Israeldoma la zan'an la naɛ la nɔɔrɛ te ba zabɛ la Benyamindoma. 12Te Israeldoma la tom nɛreba te ba keŋɛ ta yele Benyamindoma yeti, Bene te ya bahɛ te toonfɛn'ɛha kɛn' ya poan bala? 13Bala nyɔkɛ ya nɛreba la bo ya tɔ, nɛreyaalehe la n boe Gibea teŋa poan la, te to ko' ba te toonfɛn'ɛhe ana taaba da le pɔrɛ Israel teŋa wa poan. Ge Benyamindoma la pon ka kɛleha sɛla te ba sɔɔnrɔ Israeldoma la yɛta la. 14Te Benyamindoma la lagahe yehe ba teŋhe la. Te ba keŋɛ Gibea ta zabɛ la Israeldoma. 15Bilam te Benyamin teŋhe pɛɛntɛɛnreba la kaanlɛ dela tuha pihiyi' la ayoobe n keŋɛ zaberɛ la. Ge te sɛba mɛ n kɛn' Gibea teŋa la kaanlɛ mɛ dela kɔbehe seyopɔe te ba loe. 16Nɛreba kɔbehe seyopɔe te ba loe la dela gɔbɔhe. Ba zan'an kpa'are la kalɔbega te kugure ka nyɔhegera. 17Te Israeldoma ma'an pɛɛntɛɛnreba kaanlɛ dela tuha kɔbehe senaahe (400,000) te Benyamindoma ka pa'ahɛ bini. Ba zan'an maahom mɛ te ba keŋɛ zaberɛ la. 18Te Israeldoma la keŋɛ Betel teŋa te ba sokɛ Yenɛ yeti, Ane wan deŋɛ nɛŋa keŋɛ ta zabɛ la Benyamindoma wa bo to? Te Na'ayenɛ yele ba yeti, Yuda wan deŋɛ keŋɛ. 19Te Israeldoma la ihege bolika keŋɛ ta tin' ba sogora ge maahom gura Gibea teŋa la poan. 20Israel pɛɛntɛɛnreba la yehe mɛ te ba ta zabɛ la Benyamindoma, te Israel pɛɛntɛɛnreba la po' ba mɛhe tansuga te ba zabɛ la ba Gibea teŋa la poan. 21Te Benyamindoma la yehe la Gibea la ko' Israeldoma tuha pihiyi' la ayi' dabaherɛ denɛ daarɛ la. 22Te Israeldoma la kpeŋe ba mɛhe ge po' taaba tansuga ge le maahom te ba ta ze'ele zen'en te ba ze'ele pɔhega daarɛ la, la ba zabɛ. 23Te Israeldoma wa keŋɛ ta ze'ele Na'ayenɛ nɛŋan kele bala tare tare la zanɔɔrɛ, ge sokɛ Na'ayenɛ yeti, To lebe ta zabɛ la tɔ sɔɔnrɔ Benyamindoma wa? Te Na'ayenɛ yele ba yeti, Keŋɛ ya ta zabɛ la ba. 24Yiimbeere te Israeldoma la keŋɛ ta zabɛ la Benyamindoma la. 25Te de daarɛ la Benyamindoma la yehe Gibea teŋa la na zabɛ la Israeldoma la ko' ba pɛɛntɛɛnreba tuha pia la anii. 26Te Israeldoma la zan'an keŋɛ Betel ta kele. Ba keŋɛ ta bɔna la Na'ayenɛ nɛŋan tare tare la zanɔɔrɛ ba zagahɛ ba mɛhe, te ba kaanbɛ nyɔ'an bo'olom la sunma'ahom bo'olom bo Na'ayenɛ. 27Te Israeldoma la sokɛ Na'ayenɛ, Yenɛ nɔbiŋere daka n boe la Betel la zuo, 28te Aron dayɔa Eleazar dayɔa Pinehas n ze'ele daka la nɛŋan dabaherɛ aŋa la poan. Ba sokɛ Na'ayenɛ yeti, To wan ta'an lebe ta zabɛ la tɔ sɔɔnrɔ Benyamindoma wa bii to bahɛ? Te Na'ayenɛ yele ba yeti, Ya beere keŋɛ te n wan dekɛ ba eŋɛ ya nu'uhen. 29Te Israeldoma maahom ba pɛɛntɛɛnreba te ba keŋɛ ta kae Gibea teŋa la mum. 30Dabeha atan' daarɛ la te Israeldoma keŋɛ te ba zabɛ la Benyamindoma la, ge po' ba mɛhe tansuga maahom Gibea teŋa la poan wo dabahese'a n tole la. 31Te Benyamindoma ze'ele ba teŋa la poan zɔ' yehe yeŋa na, doohe sɔrɔtɔ la n dole yɛ'ɛha Betel teŋa la Gibea teŋa la, ko' Israeldoma pihitan' wo dabahese'ere n tole la. 32Te Benyamindoma yeti, To kɔɔre ba wo pɔhega daarɛ la. Ge Israeldoma la yeti, Bahɛ ya te to zɔ' te ba doohe te poore yehe peelom poan na. 33Te Israeldoma ihege bini mɛ keŋɛ ta po' ba mɛhe tansuga maahom Baal Tamar teŋa la poan Israeldoma pɛɛntɛɛnreba la n maahom gan' gura la zɔ mɛ yehe na la sɛba n boe Maare Geba teŋai. 34Te Israel pɛɛntɛɛnreba tuha pia la te ba loe la wa'ana zabɛ la Gibea teŋa la, te zaberɛ la mɔ'ɛn. Ge Benyamindoma la na ka baŋɛ te sagaŋɔ n bala, n paare ba. 35Na'ayenɛ n ko' Benyamindoma la Israel nɛŋan. Bala te Israeldoma ko' Benyamindoma pɛɛntɛɛnreba tuha pihiyi' la anuu la kɔbega (25,100) n ki dabaherɛ denɛ daarɛ. 36Te Benyamindoma la n ta baŋɛ te Israel nyaŋɛ bala. Israeldoma n daa mina ge dekɛ ba mɛhe bo Benyamindoma la. Se'ere n sɔe la, ba pɛɛntɛɛnreba daa maahom sogɛ zen'en gura bala pɔnrɛ mɛ la Gibea teŋa la koora kena na. 37Pɛɛntɛɛnreba la n daa maahom gura la eŋɛ la kalam keŋɛ ta gu' Gibea teŋa la daa kɔ'ɔn ko' teŋa la poan zan'an. 38Israeldoma la ba pɛɛntɛɛnreba la n maahom te gan' gura la daa eŋɛ la nɔyene te ba han ta eŋɛ te zun'uhe zone saazuo teŋa la poan 39te Israeldoma la wan me tole zabɛ la poan. Benyamindoma n daa ko' Israeldoma la nɛreba pihitan', te ba daa yeti, Ton nyaŋɛ ba wo pɔhega daarɛ la. 40Te zun'uhe la n daa pɔhe ihegera teŋa la poan la te Benyamindoma n daa ŋmɛregɛ behɛ ba pooren, ba nyɛ te teŋa la zan'an taɛ mɛ la zun'uhe zɔna saazuo. 41Te Israeldoma la me daa ŋmɛregɛ, te Benyamindoma la gbe'era. Se'ere n sɔe la, ba daa baŋɛ te kum nya paare ba. 42Bala, te ba daa ŋmɛregɛ Israeldoma la zen'en, zɔta tɔɔra pɔgɔtia teŋa bɔba la. Ge zaberɛ la daa nyaŋɛ ba mɛ gaŋɛ. Se'ere n sɔe la, Israeldoma n ze'ele teŋhe la poan daa ko'ora kena na. 43Ba daa kae Benyamindoma la mum la, digɛ ba te ka tare vo'ohogo, ko' ba Gibea teŋa dapɔya bɔba. 44Benyamindoma tuha pia la anii n mi zaberɛ daa ki la. 45Te sɛba n gee la daa ŋmɛregɛ zɔ' keŋɛ pɔgɔtia teŋa la ta paɛ Arimon taŋa. Ge Israeldoma daa ko' ba nɛreba tuha anuu sɔrɔtɔ poan. Ge ba daa tare ba paɛ Gidom teŋa la pa'ahɛ tuha ayi' ko'. 46Dabaherɛ dene wa Benyamin pɛɛntɛɛnreba n ki la daa dela tuha pihiyi' la anuu. Ba zan'an n mi' zaberɛ n bala. 47Ge ba pɛɛntɛɛnreba kɔbehe seyoobe daa zɔ' keŋɛ pɔgɔtia teŋa la ta kɛn' Arimon taŋa poan ha, ba yee la bilam tara tara la ŋmarehe senaahe. 48Te Israeldoma daa ŋmɛregɛ lebe Benyamin teŋa la poan ta ko' nɛreba la n yee teŋhe la poan la ba dunhe zan'an ge nyɔ' teŋhe la zan'an.

will be added

X\