Kema 2

1Te Na'ayenɛ soŋora ze'ele Gilgal teŋa la keŋɛ Bokim teŋai, ta yeti, Mam tare ya ye'ehe Mizraim teŋa la poan wa paɛ teŋsɛka te n daa yeti n dekɛ bo ya sɔyaabdoma la. Mam kan sagom n nɔbiŋere se'ere te n daa bo ya la. 2Ya yelege ya mɛhe teŋa la nɛreba la poan ge gbirige bimbinse'a te ba kaanbera la bahɛ. Behe ya, ya eŋɛ se'em. Ya zagahɛ mam nɔɔrɛ te n bo ya la. 3Bala n yeti ya mɛ, mam kan sa'ɛ ba teŋa la poan. Ba yeti ba dɛna la ya diŋdoma te ba baga la me dɛna bɛnregɔ bo ya. 4Te Na'ayenɛ soŋora la n tɔgɛ yele ana wa bo Israeldoma ta ba'ahɛ la, te ba woo taa kaahega. 5Ba segɛ zen'en la yu'urɛ te Bokim. Bilam te ba kaanbɛ kaanbegɔ bo Na'ayenɛ. 6Te Yosua n bo nɛreba la sore la, nɛra woo keŋɛ mɛ ta sɔe teŋsɛka te a zabɛ to'e la behera. 7Dabahese'a te Yosua la keendoma basɛba n doohe Yosua nyɛ' ton kanra se'a te Na'ayenɛ tom bo Israeldoma la bɔna la, nɛreba la daa na'ahere Na'ayenɛ mɛ. 8Nun dayɔa Yosua n de Na'ayenɛ yameŋa la ta paɛ yuum kɔbega la yuum pia, ge nya ki. 9Te ba pin' en la Timnat Heres teŋa la n boe Epraim zɔya teŋa n boe Gaas Zoore zuɔ nu'o bɔba la. 10Tuunhom bomɔ woo daa ki mɛ ge tuunhom sebo woo n sɔe poore la ka nyɛ' Na'ayenɛ n an se'em bii toonse'a te a tom bo Israeldoma la. 11Israeldoma la nya tom be'em Na'ayenɛ nɛŋan ta kaanbera Baal baga. 12Ba zagahɛ Na'ayenɛ ba sɔyaabdoma Yenɛ se'ere n tare ba ye'ehe Mizraim teŋa poan la. Ba dole la baga poore, nɛresɛba n lagom bɔna la ba baga te ba na'ahere. Ba bahɛ te sunsunyiim kɛn'ɛhera Na'ayenɛ 13ba zagahɛ Na'ayenɛ ge kaanbera Baal la Astoret baga la zuo. 14Te Na'ayenɛ sunsunya nyie la Israeldoma la, te a dekɛ ba eŋɛ ba diŋdoma la nu'uhen te ba faanra ba. A koohe ba bo ba diŋdoma ge te ba kan ta'an zabɛ la ba. 15Israeldoma la han ye'ehe zaberɛ, Na'ayenɛ ne bahɛ te be'em sige ba zuo wo Na'ayenɛ pɛ bahɛ ba zuo la. Ba bo la mu'ugɔkantɛ poan. 16Te Na'ayenɛ loe kema bo ba, te ba to'e ba faanre ba la nu'uhen. 17Ba pon ka kɛleha kema la, ge ba nɔŋɛ baga la kaanbegɔ la zuo. Ba sɔyaabdoma yuun nane Na'ayenɛ nɔɔrɛ, ge bama zagahɛ ka dɔla ba na'ma ge tɛɛ la ba sɔrɔɔ dɔla. 18Saŋsɛka woo te Na'ayenɛ han ne loe kema bo Israeldoma, Na'ayenɛ ne doohe kema wa poan fan' ba, ba diŋdoma la nu'uhen dabahese'a woo te kema bɔna. Se'ere n sɔe Na'ayenɛ ne zɔ' ba nin bɔn'ɔn, ba diŋdoma n muguhere ba ge pɛnregere ba te ba ne fabele ba zuo. 19Te kema la han ta ki', ba ne kɔ'ɔn kɛn' la toonfɛn'ɛha gana ba sɔdoma. Ba dole la baga poore. Ba ka bote ba bahɛ ba tobekperega la be'em sɔrɔtɔ la. 20Te Na'ayenɛ sunsunya nyie la Israeldoma ge yele ba yeti, Nɛrebana wa tue mam nɔbiŋere se'ere te n bo ba sɔyaabdoma la ge ka nana mam nɔɔrɛ 21mam kan le sa'ɛ nɛresɛba n boe ka poan, teŋse'ehe te Yosua ka nyaŋɛ to'e la ge ki' la. 22N wan dekɛ ba te n makɛ Israel behɛ nyɛ ba wan tee doohe Na'ayenɛ sɔrɔɔ la woo ba yaabdoma la. 23Na'ayenɛ daa bahe te teŋse'ehe n gee la. A ka sa'ɛ nɛresɛba n boe ka poan bii bo ba la Yosua nu'uhen.

will be added

X\