Kema 19

1Te saŋkaŋa la poan la, te naba ka boe Israel teŋa la poan. Te Levi nɛra wa kɛn'ɛra teŋbila n boe Epraim teŋa zoore zuo ha la di la pɔgɔbɔ'ɔreŋa n kɛn'ɛra Betlehem teŋa la n boe Yuda teŋa la poan. 2A pɔgɔbɔ'ɔreŋa gan'anrɛ la boraa ayema. Ge te a lebe ka sɔ yire la n boe Betlehem Yuda teŋa la poan. Ta n kɛn'ɛra bini ŋmarehe senaahe, 3ka sera la doohe ka wa pooren, ta tɔgɛ nɔmalehom bo a pɔga la, te ka kule na. A doohe me la a yameŋa ge tare bonhe seyi'. Te pɔka tare en kɛn' ka sɔ yire te ka sɔ la n nyɛ en la a poore pee la en wa'ana la. 4Te a dɛɛndɔɔ la gu' en, te a yee gan'anrɛ dabeha atan' te ba di' ge nyu'. 5Te dabeha anaahe daarɛ la te ba ihege bolika yu'uŋyu'uŋɔ maahom te a keŋɛ. Te a dɛɛndɔɔ yele en yeti, Ze'ele la hɔ saa nɔɔrɛ ge keŋɔ. 6Bala, te bama bayi' la naa taaba di ge nyu' ge te a dɛɛma la yele en yeti, Bahɛ te hɔ poore pee ge la hɔ kɔɔ'ɛ hɔ, potɛn'ɛrɛ, te hɔ gan'ate la kalam yu'uŋɔ wa. 7Te boraa la n ihege ta a keŋɛ, te a dɛɛma la pɛnregɛ en te a yee yu'uŋkoŋɔ le yɛ'ɛha. 8Te dabeha anuu daarɛ la te a ihege bolika yu'uŋyu'uŋɔ te a kule te a dɛɛma la yele en yeti, Ma'ɛn ho mɛŋa ge gura te zanɔɔrɛ, te bama bayi' naa taaba di. 9Te boraa la n ta ihege la a pɔgɔbɔ'ɔreŋa la a yameŋa, te a dɛɛma la yele en yeti, Nananawa yenɛ la lu' mɛ n bala, yee kalam yu'uŋɔ wa te la nyulom mɛ bala. Yee kalam yu'uŋɔ wa ge bahɛ te hɔ poore pee. Te beere bolika yu'uŋyu'uŋɔ te hɔ yɔɔ hɔ sɔrɔɔ kule. 10Ge boraa la ka sakɛ te a yee yu'uŋkoŋɔ la, ge ihege keŋɛ ta paɛ teŋa kayema n boe Yebus n de Yerusalem teŋa. A daa tare la bonhe seyi' la a pɔgɔbɔ'ɔreŋa la. 11Ba n tare tare ta pɔnra Yebus teŋa la, te la nyulom mɛ, te a yameŋa la yele en yeti, Bahɛ te to ŋmɛrege kɛn' Yebusdoma teŋa wa gan'anrɛ. 12Te a lebehe yele a yameŋa la yeti, To kan ŋmɛrege kɛn' saama teŋa wa, sɛba n dagɛ Israeldoma wa, ge to wan tole la Gibea teŋa la. 13A me yele a yameŋa la yeti, Bahɛ te ton paare teŋsɛna wa Gibea bii Aramah teŋhe wa la to gan'are. 14Te ba tolɛ keŋɛ ta pɔnra Gibea teŋsɛka te Benyamindoma sɔna la, te yenɛ lu'. 15Ba ŋmɛrege bilam kɛn' Gibea teŋa la poan, te ba gan'anrɛ. Ba kɛn' teŋa la poan ta zin'an la yeŋa, te nɛra me pon ka tare ba kule a yire te ba ta gan'anrɛ. 16Te zanɔɔrɛ la, boraa yan'aŋa kayema ze'ele a va'ame yɛ'ɛha kula. Boraa mea daa kɛn'ɛra Epraim zoore zuo teŋa, ge me kɛn'ɛra Gibea teŋsɛka te Benyamindoma sɔna la. 17Te a gorege zuo nyɛ te saana zin' yeŋa, te boraa yan'aŋa wa sokɛ en yeti, Hom ze'ele la bɛha na? Bɛha te ho yɛ'ɛha? 18Te a lebehe boraa yan'aŋa wa yeti, Tomam ze'ele la Betlehem n boe Yuda teŋa poan la ge yɛ'ɛha kula teŋbila n boe Epraim teŋa zoore zuo teŋsɛka te n kɛn'ɛra. N daa keŋɛ la Betlehem n boe Yuda ge nananawa n keŋɛ Na'ayenɛ yire. Ge n ka nyɛ' se'em wan doohe la mam te tɔ kule a yire. 19N tare n bonhe wa yaama boroboro la yaama kɛ'ɛhe le to mɛhe dia la daam. Mam la ho yampɔka wa la bodibila wa n dole mam, sɛla ka koŋe to. 20Te boraa yan'aŋa la lebehe yele en yeti, La ane soŋa. Bahɛ te n tare ho kule ge ho kan' gan'are yeŋa wa. 21Bala, te a tare en kule a yire ta eŋɛ yaama kɛ'ɛhe bo bonhe la ge yuuɛ ko'om te ba wobehe ba na'ma ge di ge nyu'. 22Te ba n boe bini sɔnha la, te teŋa la poan nɛreyaalehe sese'ehe n wana, wa ŋmɛra a nayaŋa, ge yele yiredaana yeti, Tare boraa sɛka n wa'ana kɛn' ho yire wa poan la, te to gan'anrɛ la en. 23Te yiredaana la yehe paɛ ba, yele ba yeti, Aai, n taaba, n bene ya mɛ, te ya da tom ya ba toonfɛn'ɛha kalam. Boraa wa n kɛn' mam yire wa, da tom ya ka ton se'ere n ka ane soŋa. 24Mam pɔyɔa nan ka mi boraa ge a pɔgɔbɔ'ɔreŋa n wana. Bahɛ ya te n tare ya ba wa'ana bo ya te eŋɛ ba ya n bote se'em. Ge da tom ya boraa wa yalomtooma. 25Te nɛreba pon ka kɛleha en. Ge Levi nɛra fan' a pɔgɔbɔ'ɔreŋa dekɛ en bo boraahe te ba pɛnregɛ ka gan'anrɛ la ka, te beere ta pɔnra yelegere te ba bahɛ ka te ka keŋɛ. 26Wo beere la n ta pɔnra yelegere la te pɔka la wa'ana wa lu' gan'an yi se'ere te a sera la gan'anrɛ la nayaŋa nɔɔrɛn, ka gan' la bala te sɔɔnrom ta zom. 27Te ka sera la ihege bolika yo'ɛ nayaŋa la yehe na te a keŋɛ, a nyɛ te a pɔgɔbɔ'ɔreŋa wa gan' ge tɛɛn ka nu'uhen tɔ nayaŋa la tontɔɔ. 28A yele ka yeti, Ihege te tɔ keŋɛ. Ge a ka wom se'ere te a nyɔkɛ ka yagele boŋa la zuo kule. 29N ta paɛ kɛn' a yire la poan la, a dekɛ la so'a ŋma' a pɔgɔbɔ'ɔreŋa la iŋa, ku'uhɛ nɛnɔ la sugumnɔɔren pia la boyi' tɔnre Israeldoma yizuto pia la toyi' la zan'an. 30Se'em wo n nyɛ dɛ ne yeti, Sɛla n ka tabelɛ eŋɛ n bala, bii to pon ka tabelɛ nyɛ dɛ taaba Israel buuri wa n poan wo ban pon ze'ele Mizraim teŋa la poan yɛhe na wa paɛ zina wa. To behɛ ya dɛ soŋa. Te wan eŋɛ la wanɛ? Te wan zin'an mɛ yoi?

will be added

X\