Kema 18

1Saŋkaŋa la poan la te naba ka boe Israel teŋa la poan. Saŋkaŋa la poan la, Dan yizuo la n yuun eere la teŋsɛka te ba wan to'e te ka dɛna ba denɛ. Se'ere n sɔe la, teŋse'ehe te Israeldoma la to'ohe la, ba daa ka lagom po' bo ba. 2Te Dandoma la loe pɛɛntɛɛnreba banuu, ba yizuo la poan, sɛba n yehe Zora la Estaol teŋhe la poan la, tom ba te ba ɛ kae teŋa la behɛ. Ba yele ba yeti, Keŋɛ ya ta kae teŋa la behɛ. Te ba keŋɛ teŋsɛka n boe zoore zuo bɔna Epraim teŋa la poan la, wa paɛ Mikah yire nya yee bilam gan'are. 3Ban keŋɛ ta pɔnra Mikah yire la, ba wom la Levi nɛra la yetɔgom baŋɛ, nya ŋmɛregɛ paɛ a zen'en sokɛ en yeti, Ho nya la bɛɛ ka'lam? Ho tone dela denɛ ka'lam? Ho tare la bene ka'lam? 4Te a lebehe ba yeti, Mikah n bahɛ te mam dɛna a malemadaana ge te a yɔɔra mam. 5Ba yele en yeti, Sokɛ Yenɛ te to baŋɛ to sɔrɔɔ wa te to yɛ'ɛha wa to wan nyɛ maanɛ. 6Te malemadaana la yele ba yeti, Kene ya te ya wan nɛ kanpone ya sɔrɔɔ la te ya yɛ'ɛha la. Na'ayenɛ mi de yɛla mɛ. 7Te boraahe senuu wa ze'ele bilam keŋɛ Lais teŋa la poan, ta nyɛ' te nɛreba la kɛn'ɛra ka poan la fai ge ka mi' sɛsɛla, wo Sidondoma n ane se'em la. Sɛla n sɔe la, naba ka boe teŋa la poan daana ba yelese'ere zuo, ge ba me zaaɛ Sidondoma ge ka tare sɔnhega la taaba. 8Ba lebe ba sɔɔnrɔ la zen'en Zora la Estaol teŋa la te ba sɔɔnrɔ la, sokɛ ba yeti, Bene yele te ya tare na? 9Te ba lebehe yele ba yeti, Ihege ya te to keŋɛ ta zabɛ la ba, Tomam nyɛ teŋa la, ka me dela teŋsoŋa. To wan kelom zin'an la bala yoi? Da go'om ya, bahɛ ya te to keŋɛ kɛn' teŋa la poan to'e ka. 10To han ta kɛn' ka poan, nɛreba la boe la fai ka mi' yele ge Yenɛ dekɛ teŋa la eŋɛ la to nu'uhen. Zen'en la me dela punhogɔ zen'en te sɛla wo bɔna ka zuo. 11Te Dandoma pɛɛntɛɛnreba kɔbehe seyoobe maahom ba zaberɛ lɔgɔrɔ ze'ele Zora la Estaol teŋa la yɛhe na. 12Ba keŋɛ ta kɛn' la Kiriat Yearim n boe Yuda teŋa la poan, gan'are. Bala n sɔe te ba yi'ira zen'en la yu'urɛ te Mahane Dan tare tare ta paɛ zina. La boe la Kiriat Yearim teŋa la nɛŋa bɔba. 13Ba doohɛ la teŋsɛka n boe zoore zuo bɔna Epraim teŋa la poan ta paɛ Mikah yire. 14Te boraahe senuu la pon keŋɛ ta kae Lais teŋa la behɛ la, yele ba sɔɔnrɔ la yeti, Ya mi te yire deyema n boe yiya wa poan te ba tare toolom fugiriga la yire baga la yagom bagarɛ la kurugo bagarɛ. Nananawa, to mi sɛla te to wan eŋɛ. 15Te ba ŋmɛrege paɛ Levi nɛre n kɛn'ɛre Mikah yire la zen'en ge po'ohe en. 16Te Dandoma la pɛɛntɛɛnreba kɔbehe seyoobe n maahom ba zaba lɔgɔrɔ la teke nayaŋa nɔɔrɛn ze' ge gura. 17Nɛreba banuu la n keŋɛ ta kae teŋa la behɛ la n kɛn' yire la poan ta vaɛ yagom bagarɛ la toolom fugiriga la yire baga la kurugo bagarɛ ge bahɛ te malemadaana la zɛ'a nayaŋa la nɔɔrɛn le pɛɛntɛɛnreba kɔbehe seyoobe la n maahom ba zaba lɔgɔrɔ la. 18Te ban kɛn' Mikah yire la ta vaara yagom bagarɛ la toolom fugiriga la yire baga la kurugo bagarɛ, te malemadaana la soke ba yeti, Bene tooma n bala, te ya toona wa? 19Te ba lebehe en yeti, Ana baanlam, te ka bote te ho yaɛ nɔɔrɛ ge la hɔ dohe tɔ la ho ta dɛna tomam sɔ la to malemadaana. La ane soŋa te ho dɛna Israel buuri wa zan'an malemadaana? 20To malemadaana la poore pee ta dekɛ toolom fugiriga la yire baga la zan'an la yagom bagarɛ doohɛ la nɛreba keŋɛ. 21Te ba ŋmɛrege kena, ge pe'e ba kɔma la ba dunhe bahɛ la ba lɔgɔrɔ zan'an te ba bɔna nɛŋa te ba dɔla. 22Te ban tare Mikah keŋɛ fiin te nɛresɛba n kɛn'ɛra pɔnra la Mikah yire la lagahɛ gilige Dandoma la. 23Te tagurega lu', te Dandoma la ŋmɛrege sokɛ Mikah yeti, Bene n bala te ya eta wa la ya lagahɛ taaba? 24Te a lebehe ba yeti, Ya vaɛ la n baga te n mɛ la n malemadaana la, tare yɛ'ɛha. N eŋɛ la wanɛ? Bene n sɔe te ya wan yele mam yeti bene te ho eta bala? 25Te Dandoma la lebehe en yeti, To ka bote te to wom ho nɔɔrɛ tɔ teŋasoka. Ho han kɔ'ɔn le lakɛ ho nɔɔrɛn, hom la hɔ yiredoma wa zan'an ki. 26Dandoma la kɔhegɛ sore yɛ'ɛha te Mikah baŋɛ te ba paŋa ganɛ en me la te a ŋmɛregɛ lebe kule. 27Te ba tare Mikah lɔgɔrɔ la zan'an la a malemadaana keŋɛ Lais teŋa la ta zabɛ teŋa la nɛreba la n boe fai ge ka mi' sɛla poan la. Ba ko' ba ge nyɔ' ba teŋa la. 28Se'em daa ka boe wan fan' ba bahɛ. Se'ere n sɔe la Sidon la zaaɛ me la ba ge te ba me ka tare nɔyene la teŋhe n lɛm ba. La boe la bɔn'ɔn la n pɔnre Bet Arehob ge ba maalom mɛ' teŋa la kɛn'ɛra ka poan. 29Te ba dekɛ ba sɔ yu'urɛ Dan sigɛ teŋa la yu'urɛ, Dan se'em te daa Israel dɔgɛ la, ge teŋa la yu'urɛ daa dela Lais. 30Bilam te Dandoma la sɛ' baga la ze'ele ge loe Moses dayɔa Gersom dayɔa Yonatan la a dayɔɔhe te ba dɛna malemadoma Dan buuri la poan, tara tara la saŋsɛka te ba pɛnrega ba tare loŋe ba teŋa la poan. 31Mikah baga la te ba tare na sɛ' saŋkaŋa la zan'an ze'ele Yenɛ yire la n boe Silo teŋa la poan.

will be added

X\