Kema 16

1Samson keŋɛ la Gaza teŋa la poan te nyɛ' yiyɛa bini, nya keŋɛ ta kɛn' ka zen'en. 2Te la ta lu Gazadoma la tobai te Samson boe teŋa la poan la. Te ba la yerege zen'en wo la teŋa la nayaŋa ta ma'ahom yu'uŋɔ gura en. Te ba ana baanlam yu'uŋɔ zan'an ge yeti, Bahɛ ya te la nyɛɛ na te to ko' ya en. 3Ge Samson n gan'an te la ta sutɔm, te a ihege sunsunya la keŋɛ ta vɔn' teŋa la nayaŋa koleŋa la ka dɔɔseto lagom po pa'ahɛ bini la mɛ, buke to a bɔken tare to zom zose'ere Hebron teŋa dapɔya bɔba. 4Dena poore, te a nyɛ pɔka kayema n kɛn'ɛre Sorek Bɔn'ɔrɔ la poan, te ka yu'urɛ dɛna Delila. 5Te Pilistia nadoma wa'ana yele ka yeti, Pan'ahe en la ho baŋɛ a paŋa la n boe a zen'an bɔba te to ta'an lo' en ge namehe en. Ge to zan'an wan bo ho sanlenpeele kpile tuhure la kɔbega. 6Te Delila yele Samson yeti, N bene ho mɛ, pa'ale mam ho paŋa la n boe ho zen'en bɔba, la ho zen'en bɔba te ba han lo' te la daam hɔ. 7Samson lebehe ka yeti, Ba han lo mam la min'paalehe seyopɔe te se nan ka ku'ɛ, bala wan bahɛ te tɔrɔgɔ kɛn' mam te n nya ana wo nɛre ane se'em la. 8Te Pilistia nadoma la tare min'paalehe seyopɔe nan ka ku'ɛ na bo ka, te ka dekɛ se lo' en. 9Pɔka la bahɛ te boraahe kɛn' saraa la poan ha ta maahom gura. Ge a yele en yeti, Samson, Pilistidoma la n kene na la! Te a kɔ' mi'inhe la bahɛ wo tanhɔ mɛɛŋɔ te bugum vɛnkɛ te la ana se'em la. A daa nan ka nɛɛ a paŋa la n boe zen'en bɔba la pa'alɛ ka. 10Delila yele Samson yeti, Ho pan'ahe mam mɛ ge ka bote te ho tɔgɛ yelemɛŋɛrɛ bo mam. Eŋɛ sugure ge pa'alɛ ho zen'en bɔba te ba wan lo'. 11Te a lebehe ka yeti, Ba han dekɛ min'paalega te ba nan tabele dekɛ ka lo' sɛla. Ba han dekɛ kaŋa lo mam tɔrɔgɔ wan kɛn' mam te n ana wo nɛre ane se'em la. 12Te Delila dekɛ min'paalehe lo' en ge yele en yeti, Samson, Pilistidoma la n kene na la! Boraahe n pon bɔna saraa la poan ha maahom gura. Te a kɔ' mi'inhe bahɛ wo guŋo la. 13Delila yele Samson yeti, Ho kɔ'ɔn kelom pan'ahera mam la bala, ge ka bɔta te ho tɔgɛ yelemɛŋɛrɛ la bo mam, pa'alɛ ho zen'en bɔba te n wan lo' hɔ. Te a lebehe ka yeti, Ho han dekɛ fupiim la guŋo pan'am mam zonkila ayopɔe wa lagom taaba, tɔrɔgɔ wan kɛn' mam te n ana wo nɛre ane se'em la. 14En keŋɛ ta gan' ginha la, te Delila dekɛ fupiim la guŋo pan'am a zonkila ayopɔe la ba'ahɛ ge le yele en yeti, Samson, ihege ge Pilistidoma la n kene na la! Te a ihege gɔɔm la poan, darege guno la te ka dekɛ pan'am a zuo tɔnhe bahɛ. 15Te pɔka la nya yele en yeti, Ho nɔŋɛ mam la wanɛ, ge te ho suunre ka bɔna mam zen'en? Sugumnɔɔren botan' n wana te ho pan'ahe mam pa'alɛ ho paŋkantɛ la n boe ho zen'en bɔba. 16Te ka daana en daarɛ woo la yetɔgom, te a sunsunyiim te a pon ka baŋɛ n wan eŋɛ a mɛŋa se'em. 17Te a ŋmibe koŋe, ge yele ka yeti, Ba nan ka tabelɛ pom mam zuo. Se'ere n sɔe la, Yenɛ n loe mam, mam na pon bɔna n ma pooren la. Mam han siie zuo, n ganlom me n bala, te tɔrɔgɔ wan kɛn' ma, te nya ana wo nɛreba n ane se'em la. 18Delila n wom a suunre yɛla la ba'ahɛ la, ka tom te ba yi' Pilistia nadoma yeti, Wa'ana. A tɔgɛ a suunre yɛla zan'an bo mam. Te Pilistia nadoma la keŋɛ ka zen'en, ge tara ba ligiri. 19Pɔka la bahɛ te a gan'are mɛ, ge dekɛ a zuo kogolɛ ka na'ma zuo, nya gin'iha te ka yi' boraa kayema te a kɛ' a zomkpila ayopɔe la bahɛ. Te a paŋa la bɔrekɛ te ka lo' en la mi'inhe. 20Ka yi' en mɛ yeti, Samson, Pilistidoma la n kenɛ na te ba nyɔke ho la! Te a ihege a gɔɔm la poan la ge yeti, N wan zɔ' yehe ta nɛ'ɛm wo mam ne pon eŋɛ se'em la. Ge a ka baŋɛ te Na'ayenɛ paŋa la yehe a poan. 21Te Pilistidoma la nyɔkɛ en kpegɛ a nini, ge tara en keŋɛ Gaza teŋa la poan, ta kɛn'ɛhe en paka deo poan, ge ba' en la nyɔgom zɔntɔ te a bɔna bilam nɛɛna zom. 22Te a zuo zonto la le pɔhɛ zoora. 23Pilistia nadoma la lagahɛ taaba kaanbɛ kaanbegɔ n gaŋɛ ka tana eta bo ba bagarɛ se'ere n de Dagon la, te ba poorɛ pee, te ba yɛta te, Tomam bagarɛ wa n dekɛ to diŋdaana Samson la eŋɛ to nu'uhen. 24Nɛreba la n wa'ana nyɛ' en la ba wa'are mɛ pɛngera ba bagarɛ la ge yɛta te, Tomam bagarɛ wa n dekɛ to diŋdaana la eŋɛ to nu'uhen, se'em n sagom tɔ teŋa wa, ge ko' to nɛreba n ka tare kaanlɛ. 25Daarɛ de se'ere te ba poorɛ pee te ba yeti, To wan yi' Samson te a wa'ana eŋɛ nayerom tooma. Bala, te ba tare Samson paka deo la poan yɛhe na, bahɛ te a ze'ele bɔ'ɔ la zɛnya la teŋasoka, ge la a eŋɛ nayerom te ba la'. 26Te Samson yele bisɛka n darege en yɛhe na la yeti, Tare mam paɛ te n ze'ele delom zɛnya n tare yire wa la. 27Pilistia boraahe la pɔgɔhe la ba nadoma la zan'an n lagahɛ yire la poan mea. Nɛreba tuha atan' n lagahɛ yire la zuo beha Samson nayerom tooma la. 28Te Samson kaahɛ yi' Na'ayenɛ ge yeti, N Daana Na'ayenɛ wa, n bene ho mɛ, te ho sɔŋɛ mam la bo mam paŋa saŋkana wa. N Yenɛ wa, bahɛ te n lebehe yɔ' Pilistidoma wa, bama n kpege n nini wa la sanɛ. 29Te Samson nya gure teŋasoka zɛn' ayi' la n zanlɛ yire la ze'a la, gin' zɛn' ayi' la zuɔ la gɔbega. 30A yeti, Mam wan lagom ki' la Pilistidoma wa. Ge a nya zaan'en zɛn'se'a n zanlɛ yire la, la a paŋa zan'an, te yire lu' nadoma la, la nɛreba la zan'an zuo. Nɛresɛba te a ko' ge ki' la ganɛ n daa na vɔe ge ko' nɛresɛba la. 31Te a sɔɔnrɔ la a sɔyiredoma lagahɛ keŋɛ ta dekɛ en na wa pin' a sɔ Manoa yɔɔ n boe Zora la Estaol teŋhe la teŋasoka. Bala ma'an, te a pon behɛ Israeldoma la yuum pihiyi'.

will be added

X\