Kema 13

1Israeldoma le tom be'em Na'ayenɛ nɛŋan, te Na'ayenɛ dekɛ ba eŋɛ Pilistidoma nu'uhen yuun pihinaahe. 2Te Zora teŋa boraa kayema n yɛhe Dan yizuo la poan te ka yu'urɛ dɛna Manoa, te a pɔga la ziim ka tabele tɔkɛ teŋa ge a kan dɔgɛ. 3Te Na'ayenɛ soŋora nɛɛ a mɛŋa pa'ale pɔka wa, ge yele ka yeti, Behɛ ho ziim na ka tabele tɔkɛ teŋa ge ho kan dɔgɛ, ge ho wan nyɔkɛ poore dɔgɛ bodibila. 4Bala, mina te ho kan nyu' sɛla woo n de daam bii ho di disɛka n dagɛ fa'a dia. 5Se'ere n sɔe ho wan nyɔkɛ poore dɔgɛ bodibila. Bia la baraga ka kalene a zuo. Ka pon bɔna pooren la, te mam yelege ka bo Yenɛ, te enŋa wan fan' Israeldoma wa Pilistidoma nu'uhen bahɛ. 6Te pɔka la nya wa'ana yele ka sera la yeti, Yenɛ nɛra n wa'ana nɛɛ a mɛŋa, wɔna la Yenɛ soŋora te a soŋa nɛɛ. Bala, ge mam ka sokɛ en a ze'ele zen'en na bii a ka pa'alɛ mam a yu'urɛ. 7Ge a yele mam yeti, Maahom ho mɛŋa te hɔ wan nyɔkɛ poore dɔgɛ bodibila, ge ho da nyu' sɛla woo n de daam, bii ho di disɛka n dagɛ fa'a dia. Sɛla n sɔe la, bia la n nan boe pooren la te Yenɛ loe ka te ka dɛna a denɛ gura ka kum. 8Te Manoa sohɛ Na'ayenɛ yeti, Na'ayenɛ, eŋɛ sugure ge bahɛ te Yenɛ nɛra la, se'em te ho tom en to zen'en na la, lebena pa'alɛ to bia la te tomam wan eŋɛ ka se'em. 9Yenɛ wom Manoa nɔɔrɛ la, ge tom Yenɛ soŋora la te a le keŋɛ pɔka la zen'en, te ka zin' la yena ka ma'an, te ka sera ka bɔna bini. 10Bilam, te pɔka la zɔ' kalam ta yele ka sera yeti, Boraa sɛka n daa wa'an mam zen'en na la, a le wa'ana. 11Te Manoa ihege doohɛ a pɔga wa poore. En paɛ nyɛ boraa la, a sokɛ en mɛ yeti, Hom bala n daa sɔnhɛ sɔnhega bo pɔka wa? Te a mɛ yeti, Ɛɛn, mam bala. 12Manoa sokɛ en yeti, Ho yelehom la han seren tom bala, bia la ka vom poan wan ana la wane, ge bene tooma te ka wan tona? 13Te Na'ayenɛ soŋora la lebehe Manoa yeti, Bahɛ te pɔka la ma'an ka mɛŋa dɔla sɛla te n yele la. 14Ka ka dite tia wɔla la ka nyu daam bii daam kpe'eŋo, bii di sɛka n dagɛ fa'a dia. Bahɛ te ka dɔla mam nɔɔrɛ la zan'an. 15Te Manoa lebehe Na'ayenɛ soŋora la yeti, Zaanzan, gura mam, te n bɔ' bobila na eŋɛ ko'om bo ho. 16Te Na'ayenɛ soŋora la yele Manoa yeti, Ho han pon gu mam, mam kan di' dia la ge ho han tom dekɛ kaanbɛ nyɔ'an bo'olom, bo Na'ayenɛ. Sɛla n sɔe la Manoa ka mi' te a dela Na'ayenɛ soŋora. 17Manoa lebehe sokɛ Na'ayenɛ soŋora la yeti, Ho yu'urɛ? Te to han ta nyɛ ma'anɛ hom n yele to se'em la, te kan ŋme'ene nu'po'ɔ. 18Soŋora la yele en yeti, Bene eŋɛ te ho sɔkera n yu'urɛ? De kanrega gana ho mɛ. 19Te Manoa nyɔkɛ bobila la ge eŋɛ boom bo'olom pa'ahɛ bini nyɔ' taŋa zuo bo Na'ayenɛ. Te soŋora tom yelenyalema Manoa la a pɔga nini. 20Te n nyɔ' te zun'uhe la n zɔne saazuo la, te Na'ayenɛ soŋora la doohɛ bugum la n dite la zom saazuo ha. Te Manoa la a pɔga la n nyɛ wana la, ba sure ba zuto teŋa. 21Na'ayenɛ soŋora la ka le nɛɛ a mɛŋa pa'alɛ Manoa bii a pɔga la. Bala te Manoa nya baŋɛ te a dela Na'ayenɛ soŋora. 22Te Manoa yele a pɔga la yeti, To wan ki'. Se'ere n sɔe la to nyɛ Yenɛ la. 23Te a pɔga la lebehe en yeti, Na'ayenɛ han bote ne te a ko to, a kan to'e ne nyɔ'an bo'olom la buum bo'olom to zen'en. A pon kan pa'ale ne tɔ yele'ana zan'an bii to pon wom yelese'a te to wom a nananawa. 24Te pɔka la dɔgɛ bodibila sege ka yu'urɛ Samson. Te bia la zo'e kotɛ te Na'ayenɛ kan' som bahɛ a zuo. 25Te Yenɛ Sea paŋa la sige a zuo Mahane Dan teŋa n boe Zora la Estaol teŋasoka.

will be added

X\