Kema 12

1Epraimdoma yi' taaba maahom yakɛ Zapon teŋa la ta sokɛ Yepta yeti, Bene n sɔe te ho yakɛ na zabɛ la Ammondoma wa ge ka yi' tomam te to doohɛ ho? Tomam wan nyɔ' ho yire la te dɛ vibege ho zuo. 2Yepta lebehe ba yeti, Ammondoma wa n tare tomam muguha muguhe seko n ka tare makere, te mam n yi ya la, ya zagahɛ mɛ ka wa'ana fan' to ba'ahɛ. 3Yamam zagahɛ te ya kan fan' to ba'ahɛ la, te mam me ponhɛ n nyonrɛ yakɛ ta zabɛ la Ammondoma la, te Na'ayenɛ dekɛ ba eŋɛ n nu'uhen. Bene n sɔe te ya wa'an zina na te ya zabɛ la mam? 4Te Yepta lagahe Gileaddoma zan'an te ba zabɛ la Epraimdoma nyaŋɛ ba. Se'ere n sɔe Epraimdoma daa yele ba yeti, yamam Gileaddoma zagahɛ tomam Epraimdoma la Manasedoma. 5Te Gileaddoma la beŋe Yordan Kolaa, Epraimdoma n doohe zen'en yakere la. Te Epraimdoma se'em n peɛn zɔ ta yakɛ, Gileaddoma la ne nyɔkɛ en sokɛ yeti, Ho dela Epraim nɛra? A han yeti, Aai, 6ba ne yele en yeti a yeti Sibolet. Te a han yeti Hibolet, en ka ta'an yi soŋa la, sɛba n beŋa Yordan Kolaa la yakere zen'en la nɛ kɔ mɛ. Bala, te ba eŋɛ ko Epraimdoma tuha pihinaahe la ayi'. 7Yepta behɛ Israel la yuuma ayoobe. Te Gilead boraa Yepta ki' te ba pin' en Gilead teŋhe la kayema poan. 8Depooren te Betlehem teŋa boraa Ibzan sɔe behɛ Israel. 9A daa dɔgɛ la bodibinto pihitan' la pugunto pihitan'. A dekɛ pugunto la elehe ge di pɔgɔba bo bodibinto la me. A behɛ Israeldoma la yuuma ayopɔe. 10Te Ibzan ki' te ba pin' en Betlehem teŋa poan. 11Enŋa pooren te Zebulun boraa Elon sɔe behɛ Israel. A behɛ Israel la yuum pia. 12Te Zebulun boraa Elon wa ki' te ba pin' en Aiyalon teŋa n boe Zebulun teŋa poan. 13Te Piraton boraa Hilel dayɔa Abdon so'e behɛ Israel. 14A dɔgɛ la boraa pihinaahe, ge tara yaahe pihitan' te ba dɛna boraahe sɛba n ban'are bonhe pihiyopɔe la. A behɛ Israel la yuuma anii. 15Te Hilel dayɔa Abdon ki' te ba pin' en Piraton teŋa la n boe Epraim teŋai n bɔna Amalekdoma zoore zuo teŋa ha la.

will be added

X\