Kema 11

1Gilead boraa Yepta n yuum dɛna zabɛ zabera, se'em n de yiyɛa bia te a sɔ dɛna Gilead la. 2Te Gilead pɔga me dɔgɛ bodibinto, te ba zoe kɔɔra, sa'ɛ Yepta te a yɛhe ba sɔ yire la poan, ge yele en yeti, Hon dela yiyɛa bia la zuo, te ho ka tare tɔntɛ tomam zen'en. 3Te Yepta yɛhe a sɔɔnrɔ la zen'en ge keŋɛ ta kɛn'ɛra Tob teŋa la poan. Bilam te a dekɛ a mɛŋa ta naa la nɛreyaalehe te ba dɔla en ɛɛra. 4Te la bɔna bɔna te Ammondoma n zabɛ la Israeldoma, 5te Gilead keendoma keŋɛ Tob teŋa te ba tare Yepta wa'ana. 6Ba yele en yeti, Wa'ana wa dɛna to zuodaana te to zabɛ la Ammondoma wa. 7Yepta yele Gilead keendoma la yeti, Dagɛ yamam n dini la mam ge sa'ɛ mam n sɔ yire la poan? Bene n sɔe yan boe muguhego poan la, te ya nya wa'ana mam zen'en na? 8Te Gilead keendoma lebehe yele Yepta yeti, Bala n sɔe, te to lebe ho zen'en na te ho wa'ana soŋɛ to te to zabɛ la Ammondoma ge la ho dɛna to zuodaana Gilead sɔ'ɔlom la zan'an. 9Yepta lebehe Gilead keendoma la yeti, Ya han tare mam lebe te mam ta zabɛ la Ammondoma wa, te Na'ayenɛ han dekɛ ba eŋɛ n nu'uhen, n wan dɛna ya zuodaana? 10Te Gilead keendoma la lebehe Yepta yeti, Na'ayenɛ wa de a ze'ele anyɛdaana tomam la hom teŋasoka, to wan seren eŋɛ wo te to yele hɔ se'em la. 11Te Yepta doohɛ la Gilead keendoma la te ba keŋɛ ta bahɛ te a dɛna ba zuodaana la ba zaba nɛŋadaana behera ba. Yepta ze'ele Na'ayenɛ nɛŋan pɛnge en Mizpa teŋa la poan. 12Yepta tom te ba ta sokɛ Ammondoma naba yeti, Bene n boe mam la hom teŋasoka, te ho wa'ana zabɛ la mam teŋa wa doma? 13Te Ammondoma naba lebehe nɛresɛba te Yepta tom la yeti, Israeldoma wa n ze'ele la Mizraim teŋa poan ba daa wa'ana fan' mam teŋsena wa la kɔ'ɔn ze'ele Arnon ta paɛ Yabok la Yordan kolaahe la. Ya lebehe se bo mam te la na n yeti wa. 14Te Yepta lebehe tom nɛreba Ammondoma naba la zen'en, 15te ba yele en yeti, Yepta n yele se'em n wana. Israeldoma daa ka fan' Moabdoma bii Ammondoma teŋhe. 16Ge saŋsɛka te Israeldoma ze'ele Mizraim teŋa la poan ba daa doohɛ pɔgɔtia teŋa la poan la Mɔgɔ Mɔlega la poan tole paɛ Kades teŋa la poan. 17Te ba nya daa tom nɛreba te ba yele Edom naba yeti, te belone ya mɛ, bo ya to sore te to doohɛ ya teŋa wa poan tole. Ge Edom naba daa ka kelehe ba. Te ba daa le tom Moab naba zen'en, te enŋa mɛ pon ka kelehe ba. Bala, te Israeldoma daa yee Kades teŋa la poan. 18Ba nya daa doohɛ la pɔgɔtia teŋa la labele bala kaa Edom la Moab teŋhe la poan, wa paɛ Moab teŋa dapoore bɔba teŋa la ge tole Arnon Kolaa la. Ge ba daa ka dohɛ Moabdoma sɔ'ɔlom, Arnon Kolaa la n beŋe Moab teŋa la poan. 19Israeldoma nya daa tom nɛreba te ba yele Amoridoma naba Sihon n boe Hesbon poan la zen'en yeti, te belone ho mɛ bo to sore te to doohɛ ho teŋa wa tole. 20Sihon daa ka sakɛ sera bo Israeldoma te ba doohɛ a sɔ'ɔlom la poan tole. Sihon daa lagahɛ a nɛreba zan'an Yahaz teŋa la te ba zabɛ la Israeldoma. 21Te Na'ayenɛ Israel Yenɛ la daa dekɛ Sihon la a nɛreba zan'an eŋɛ Israeldoma nu'uhen te ba zabɛ nyaŋɛ ba. Bala, te Israeldoma to'e Amori teŋa la nɛresɛba n boe ka poan la. 22Amori teŋa la zan'an, la ze'ele Arnon kolaa la ta paɛ Yabok kolaa, la pɔgɔtia teŋa la gan'are ta nyɔkɛ Yordan Kolaa la poan, teŋsena wa te ba to'e tara. 23Na'ayenɛ Israel Yenɛ la n sa'ɛ Amoridoma wa, ho tare sɔrɔɔ te ho sɔna teŋa tare me yoi? 24Ho nini ka tegɛ sɛla te ho bagarɛ Kemos la dekɛ bo ho la? Sɛla wo te Na'ayenɛ tomam Yenɛ sa'ɛ ya tomam nɛŋan la, te tomam wan to'e ka tara. 25Ho ganɛ Zipor dayɔa Balak se'em n de Moab naba la me yoi? A ka tabele ŋmɛ' nɔkpe'ene la Israeldoma bii a ihege dabahese'ere zabɛ la ba. 26Yuum kɔbehe setan' Israel kɛn'ɛra Hesbon teŋa la Aroer teŋa la ka teŋbibihe la teŋse'e ne zan'an n boe Arnon Kolaa nɔɔrɛn. Bene n sɔe, te bala ma'an, te ya ta'an eŋɛ sɛla? 27Mam ka tue ya. Ge ho ka eŋɛ soŋa la ya zaberɛ la mam wa. Na'ayenɛ n de yelemɛŋɛrɛdaana la wan gankɛ Israeldoma wa la Ammondoma wa teŋasoka zina wa. 28Ge Ammondoma naba la ka nam Yepta nɔɔrɛ la te a tom a zen'en la. 29Te Yenɛ Sea la sige Yepta zuo te a nyɛ paŋa, te a doohe Gilead la Manase teŋhe la poan tole Mizpa teŋa la n boe Gilead teŋa poan la ze'ele bilam keŋɛ Ammondoma zen'en. 30Yepta po'olɛ nɔɔrɛ Na'ayenɛ zen'en yeti, Ho han seren wan dekɛ Ammondoma wa eŋɛ mam nu'uhen, 31ge ho han bahɛ te mam nyaŋe Ammondoma ge lɛbera kula la popeelom, te sɛla woo n ze'ele n nayaŋa nɔɔrɛ yeheŋa na to'ohɛ mam wan dɛna Na'ayenɛ denɛ ge n wan dekɛ kaanbɛ nyɔ'an bo'olom bo ho. 32Yepta yakɛ ta zabɛ la Ammondoma te Na'ayenɛ dekɛ ba eŋɛ a nu'uhen. 33A ko' ba ta gaŋɛ, kɔ'ɔn ko' teŋhe pihiyi' zan'an pɔhɛ Aroer teŋa poan ta paɛ Minit teŋa tole ta paɛ Abel Keramim teŋan. Te Ammondoma la bɔna Israeldoma nu'uhen. 34Te Yepta n lebe kula a yire la n boe Mizpa teŋa poan la, a nyɛ' te a pɔyɔa, ka zuo la ka dɔɔ ze'ele de'en ŋmɛ'ɛra senyagahe, ge wa'ara to'oha en nayaŋa nɔɔrɛ. 35Te n nyɛ' a pɔyɔa la, bala, a aanhom la futo bahɛ ge yele ka yeti, N pɔyɔa! Ho bahɛ te mam suunre sagom. Ho lagom po pa'ahɛ sɛba n daane mam suunre wa la poan mɛ. Se'ere n sɔe la, mam po'olɛ nɔɔrɛ la Na'ayenɛ, n me kan ta'an luke dɛ. 36Te ka lebehe yele en yeti, N sɔ, ho biŋe la nɔɔrɛ la Na'ayenɛ, yi dekɛ mam tom hom biŋe ho nɔɔrɛ la se'em la. Na'ayenɛ pon bahɛ te ho nyaŋe hɔ diŋdoma, Ammondoma wa. 37Pugula la yele ka sɔ la yeti, Bahɛ te yele dena sige mam zuo, ge na bo mam sore ŋmarehe seyi' te n zom zoore wa zuo ha ta kele n pɔgɔsa'arɛ la n tadaandoma wa zuo. 38A yele ka yeti, Kena. Ge a bahɛ ka te ka keŋɛ zom zoore la zuo ta kele ka tadaandoma la, la pɔgɔsa'arɛ la zuo. 39Te ŋmarehe seyi' n ta ba'ahɛ la, te ka lebe ka sɔ la zen'en na, te a tare ka ta lebehe a nɔɔrɛ la te a po'olɛ la, ka daa ka mi' boraahe. Te yele dena wa lebege malema Israel teŋa la poan. 40Israeldoma pugunto ne keŋɛ ta kele malema koonɔ yuunɛ wo poan dabeha anaahe Gilead boraa Yepta pɔyɔa la zuo.

will be added

X\