Kema 10

1Abimelek n ki' la pooren, te Isakar yizuo boraa Tola se'em sɔ n de Puah se'em sɔ n de Dodo ihege fan' Israeldoma bahɛ. En kɛn'ɛre Samir teŋsɛka n bɔna Epraim zoore teŋa poan. 2A behɛ Israeldoma la yuum pihiyi' la atan' ge ki', te ba pin' en Samir teŋa la poan. 3Tola n ki' la pooren, te Gilead teŋa boraa Yair n soa behera Israeldoma yuum pihiyi' la ayi'. 4A dayɔɔhe daa dela pihitan' ban'ara ba boŋa ba boŋa, ge sɔna teŋa teŋa behera Gilead teŋa la te ba yi'ira Havot Yair la zina wa la. 5Te Yair ki' te ba pin' en Kamon teŋa la poan. 6Te Israeldoma le tom be'em Na'ayenɛ nɛŋan. Ba dɔla Baal baga la Astor baga ge kaanbera Aramdoma la Sidondoma la Moabdoma la Ammondoma la Pilistidoma baga. Ba zagahe Na'ayenɛ ge ka dole en la zuo, 7Na'ayenɛ suunre nyie la ba. Te a dekɛ ba eŋɛ Pilistidoma la Ammondoma nu'uhen te 8ba muguhe Israeldoma yuun denɛ mea poan. Yuum pia la anii, ba muguhe Israeldoma sɛba n kɛn'ɛre Yordan Kolaa dapɔya bɔba Gilead teŋa poan teŋse'ehe te Amoridoma n daa ta sɔna la. 9Ammondoma me yakɛ la Yordan Kolaa ta zabɛ la Yudadoma la Benyamindoma la Epraimdoma. Te la bahɛ te Israeldoma bɔna muguhe kantɛ poan. 10Te Israeldoma la kaahɛ bo Na'ayenɛ yeti, Tomam seren tom la be'em ho zen'en, bahɛ to Yenɛ ge kaanbera Baal baga la. 11Te Na'ayenɛ yele Israeldoma la yeti, Mam ka fan' ya la Mizraimdoma la Amoridoma la Ammondoma la Pilistidoma nu'uhen bahɛ? 12Se'em ma'an te Sidondoma la Amalekdoma la Maondoma n muguhɛ ya la te ya kaahɛ bo mam la n fan' ya ba nu'uhen? 13Ge le bala zan'an, ya zagahɛ mam ge keŋɛ ta dɔla baga poore. Bala n sɔe, te n kan le malom fan' ya bahɛ. 14Keŋɛ ya la ya ta kaahɛ bo ya bagase'a te ya kaanbera la, ge bahɛ te ba fan' ya bahɛ ya muguhego dabeha la poan. 15Te Israeldoma la lebehe Na'ayenɛ yeti, Tomam tom be'em. Tom bo to sɛla n ane soŋa bo hɔ la. Ge te belone ho mɛ zina te ho fan' to bahɛ. 16Te ba vaɛ ba baga la lobe bahɛ, ge doohɛ Na'ayenɛ te a ka le bahɛ te ba namehɛ ba. 17Te ban yi' Ammondoma la te ba wa'an Gilead teŋa poan, te Israeldoma la zan'an lagahɛ taaba Mizpa teŋa la poan. 18Te Gilead nɛŋadoma sokɛ taaba yeti, Ane wan tole nɛŋa zabɛ la Ammondoma wa? Se'em n tole nɛŋa la, wan dɛna to zuodaana Gilead teŋa wa poan.

will be added

X\