Kema 1

1Yosua n daa ki la poore, Israeldoma soke Na'ayenɛ yeti, Ane wan deŋɛ nɛŋa zom ta zabɛ la Kanaandoma wa bo to? 2Na'ayenɛ lebehe yeti, Yudadoma wan zabɛ. Mam dekɛ teŋa la eŋɛ ba nu'uhen. 3Yudadoma yele ba sɔɔnrɔ Simeondoma yeti, Wa'an ya na te to zabɛ la Kanaandoma wa te tomam to'e to sɔ'ɔlom la yia. Ge to le wan zabɛ to'e yamam mɛ sɔ'ɔlom bo ya. Te Simeondoma la doohe ba keŋɛ. 4Yudadoma seren keŋɛ te Na'ayenɛ dekɛ Kanaandoma la Perizidoma la eŋɛ ba nu'uhen, te ba zabɛ nyaŋɛ nɛreba tuhure pia Bezek pɛɛnbɔn'ɔn la poan. 5Bilam te ba nyɛ Adoni Bezek ge zabɛ la en nyaŋɛ la Kanaandoma la Perizidoma zan'an. 6Adoni Bezek zɔ te ba dige ta nyɔkɛ en, ku'uhɛ a nu'dibidɔɔrɔ la a na'dibidɔɔrɔ. 7A nya yeti, Yenɛ lebehe yɔ'ɔra mam la toonse'ere te n ton la. Mam ku'uhɛ la nadoma pihiyopɔe nu'dibidɔɔrɔ la ba na'dibidɔɔrɔ, te ba ne pin'iha disɛka te mam ne dita te la zɔngɛra la. Ba tare en keŋɛ Yerusalem teŋa poan te a ki la bilam ha. 8Yudadoma zabɛ nyaŋɛ la Yerusalemdoma kɔrom ba ge nyɔn' teŋa la. 9Depooren te Yudadoma deŋɛ ta zabɛ la Kanaandoma n kɛn'ɛre teŋse'ehe n boe zoore zuo la teŋse'ehe n boe Negev la teŋse'ehe n boe zanɔɔrɛ bɔba zɔya zuha la. 10Ba le keŋɛ ta zabɛ la Kanaandoma la n kɛn'ɛre Hebron teŋa poan la, teŋa la yu'urɛ yuun dela Kiriat Arba, ge le zabɛ ko Sesai la Ahiman la Talmai. 11Ba ze'ele bilam keŋɛ ta zabɛ la nɛresɛba n boe Debir teŋa poan la, teŋa la yu'urɛ yuun dela Kiriat Seper. 12Te Kaleb yeti, N wan dekɛ n pɔyɔa Aksa bo boraa sɛka n zabɛ nyaŋɛ to'e Kiriat Seper teŋa wa. 13Te Kaleb yebega Kenaz dayɔa Otniel n nyaŋɛ to'e teŋa la, te a dekɛ a pɔyɔa Aksa bo Otniel te a di ka. 14Te pugula la paɛ Otniel zen'en, yele en yeti, Yele n sɔ te ho bote la samanɛ. Te ka ze'ele boŋa zuo sige na, te Kaleb soke ka yeti, Ho bote la bene? 15Te ka yele en yeti, Bo' mam sɛla ane soŋa, ho pon dekɛ mam bahɛ la Negev pɔgɔtia poan, nya bo mam ko'om zen'an. Te Kaleb dekɛ zen'enhe la n boe saazuin la teŋeren bo ka. 16Moses de'ɛma n de Ken nɛra la yaahe n doohɛ Yudadoma poore ze'ele Kpa'kpa' Tiihe Teŋa la Yudadoma ta paɛ zin' la Yuda Pɔgɔtia n boe Negev pɔgɔtia lɛm Arad teŋa la. 17Yudadoma la ba sɔɔnrɔ Simeondoma keŋɛ ta zabɛ la Kanaandoma sɛba n boe Zepat teŋa poan la nyɔkɛ ba kɔrom ge nyɔ' teŋa la. Te ba nya yi'ira teŋa la yu'urɛ Horma. 18Yudadoma n to'e Gaza teŋa la ka sɔ'ɔlom la Askelon teŋa la ka sɔ'ɔlom la Ekron teŋa la ka sɔ'ɔlom. 19Na'ayenɛ soŋɛ Yudadoma te ba zabɛ to'e teŋse'ehe n boe zoore la zuo ha la. Ge ba ka nyaŋɛ teŋsɛka n boe bɔn'ɔn poan la, bama n tare la kuto yiire toroto la zuo. 20Kaleb dige Anak dayɔɔhe setan' ge to'e Hebron teŋa la wo Moses n yele en se'em la. 21Benyamindoma la ka nyaŋɛ dige Yebusdoma la n kɛn'ɛre Yerusalem teŋa la ge naa la ba bɔna Yerusalem teŋa la tara tara la zina. 22Na'ayenɛ nu'o daa page Yosef yire la zuo te ba keŋɛ ta zabɛ la Betel teŋa. 23Ban la tom la nɛreba te ba keŋɛ ta behɛ Betel teŋa n yuun dela Luz 24nɛreba nyɛ la boraa kayema te a ze'ele teŋa la poan ye'ehera na, te ba yele en yeti, Pa'ale tɔ sore te to kɛn' teŋa la poan ge te wan eŋɛ ho som. 25Te boraa la pa'ale ba sɔrɔɔ la te ba kɛn' teŋa la poan, te ba kɔrom teŋa la nɛreba ge bahɛ boraa la la ka yiredoma te ba keŋɛ 26Boraa la keŋɛ ta mɛ' ka yire Hitidoma teŋa la poan ge nya segɛ teŋa la yu'urɛ te Luz, yu'urɛ dene te ba yi'ira tara tara la zina. 27Manasedoma la daa ka nyaŋɛ dige nɛresɛba n boe Bet San teŋa la ka teŋbibihe bii Taanak teŋa la ka teŋbibihe bii nɛresɛba n boe Dor teŋa la ka teŋbibihe bii nɛresɛba n boe Ibleam teŋa la ka teŋbibihe bii nɛresɛba n boe Megido teŋa la ka teŋbibihe. Kanaandoma daa kelom kɛn'ɛra teŋa la poan mɛ. 28Te Israeldoma n ta sɔe la, ba daa pɛnrege Kanaandoma la mɛ la paŋa te ba tona bɔ'ɔra ba ge ba ka dige ba. 29Epraimdoma la ka dige Kanaandoma n boe Gezer teŋa poan la, ge Kanaandoma la naa la ba mɛ bɔna teŋa la poan. 30Zebulundoma la ka dige nɛresɛba n boe Kitron teŋai la nɛresɛba n boe Nahalol teŋai. Ba naa la ba mɛ ge ba pɛnregɛ ba te ba tona bɔ'ɔra ba. 31Aserdoma la ka dige nɛresɛba n boe Ako teŋa la bii nɛresɛba n boe Sidon teŋa la bii Alab teŋa la bii Akzib teŋa la bii Helba teŋa la bii Apek teŋa la bii Arehob teŋa la. 32Se'ere zuo la Aserdoma la naa mɛ la Kanaandoma la bɔna la. 33Naptalidoma ka dige nɛresɛba n boe Bet Semes teŋa la bii nɛresɛba n boe Bet Anat teŋa la. Ge Naptalidoma me lagom bɔna Kanaandoma la teŋa la poan, ge nɛresɛba n boe Bet Semes teŋa la nɛresɛba n boe Bet Anat n boe la Naptalidoma nu'uhen te ba pɛngera ba te ba tona bɔ'ɔra ba. 34Amoridoma la beŋe Dandoma bahɛ teŋsɛka n boe zoore zuo la ge ka bɔ'ɔra ba fole te ba sigera bɔn'ɔn la na. 35Te Amoridoma n kelom kɛn'ɛra Heres Zoore la Aiyalon la Saalbim teŋhe. Ge Yosef yire la ka bɔ'ɔra ba fole ge pɛnregera ba te ba tona bɔ'ɔra ba. 36Amoridoma la beene ze'ete la zen'an te ba yi'ira Naŋa Tɔlega la Sela teŋa saazuo kɔkɛ lebehe na.

will be added

X\