Azudi 1

1Mam Yude se'em n de Yesu Krista yameŋa ge dɛna Yames yebega la n golehɛ gɔŋɔ wa. N golehe bɔ'ɔra la sɛba te to Sɔ' Na'ayenɛ yi' ba te ba dɛna nɛreba ge nɔŋɛ ba ge te Yesu Krista gura ba la. 2Na'ayenɛ wan zɔ' ya ninbɔn'ɔn ge bo ya sunma'ahom la nɔŋerɛ. 3N zɔ'sonɔ wa, n daa kpe'eŋere n mɛŋa te n golehɛ bo ya yɛhera la faanrɛ la te Na'ayenɛ bo to la. Ge nananawa n daa le tɛn'ɛhɛ dɛ te la sona te n golehɛ bo ya te ya sɛ' ze'ele soŋa soŋa la zabɛ po'e yetɔgom la te Na'ayenɛ dekɛ zan'an zan'an bo a nɛreba la. 4Se'ere n sɔe la nɛresɛba n ka zote Na'ayenɛ le'ehɛ lagom bɔna la ya. Ba dela sɛba n dole teera yetɔgom sebo n yeti yɛhera Na'ayenɛ zo'ohogɔ la ge ton yɛta te ho ta'an tona yalomtooma. Ba zagahɛ Yesu Krista se'em n de to Daana zan'an zan'an la. 5N bote n tɛɛn ya dena wa mɛ ge la yan pon mina dɛ wa. To Daana n daa pon tare a nɛreba yehe Egipt teŋa poan la, ge a me daa sagom basɛba n daa ka sakɛ bo en la mɛ. 6Ya me mina te Na'ayenɛ soŋoreba basɛba n daa boe ge ka tara be'em ge daa nya lebege tona be'em la. Na'ayenɛ lobe ba bahɛ lika poan wo pakadeen la te ba bɔna bini daarɛ woo gura gankerɛ daarɛ. 7La dela boyena la sɛla n daa eŋɛ Sodom la Gomora la teŋse'ehe n daa lɛm bini la. Ba daa tone be'em la yalomtooma. Ban daa ete dena wa, Na'ayenɛ daa dekɛ la bugum sagom ba. Dena wa dela makerɛ bo nɛresɛba n tone be'em te Na'ayenɛ wan dekɛ ba eŋɛ bugum poan wuuha. 8Te dena mea n bala te nɛrebana wa eta wa. Ba zaanheŋɔ la bahɛ ba te ba tona be'em ba yalomtooma bɔŋa la poan. Ba zagahɛ Na'ayenɛ paŋa la ge toora sɛba n boe Na'ayenɛ Sɔ'ɔlom la poan la. 9Na'ayenɛ soŋoreba Mikael se'em de ba nɛŋadaana la n yuun daa ŋmɛ' nɔkpe'ene la sagona yɛhera la se'em n wan dekɛ Moses iŋa la, a yuun daa ka toore en la kan'be'ero. A daa yeti, Na'ayenɛ wan gankɛ hɔ. 10Ge nɛrebana wa toore la yelese'a te ba ka bɔkɛ. Yelese'a te ba bɔkɛ ane me wo dunhe n ka tare yam se'em la. Te yele ane me wa n koore ba. 11Ba wan nyɛ' namehegɔ mɛ. Ba doohe la sɔrɔɔ seko te Kain daa doohe la. Ligiri zuo te ba dekɛ ba mɛhe tona ŋmɛlematooma wo Balaam n yuun tom se'em la. Ba ŋmɛregɛ zabera la Na'ayenɛ wo Kora la, ba mɛ wan nyɛ sagaŋɔ wo enŋa la. 12Nɛrebana wa han ta lagom bɔna ya lagaŋɔ dia poan, ba dela sɛba n daane. Ba kɔ'ɔn dita mɛ ge la'ara ge bɔta ba diiha la ba mɛhe ma'an. Ba ane me wo saŋgbanɛ n ziire tɔla ge te saaka ni' la. Ba ane me wo tia n ka wone sɛla la, ge te ba vɔn' en la a nyɛga te a ki' ba'ahɛ zan'an zan'an la. 13Ba ane me wo ko'mi'inhe la. Se'ere n sɔe la, nɛreba nyɛ' te ba vi' tooma la wo ban nyɛ' te fulunfuka ko'mi'inhe poan se'em la. Ba ane me wo ŋmarebibihe n ka mi' ban ye zen'an, te Na'ayenɛ wan dekɛ zen'sɛka n de lika te ba bɔna bini wuuha la. 14Enok se'em n yuun de Adam yaaŋa boyopɔe daa pon soolom dena wa mɛ yɛhera ba yele. A daa soolom yeti, Behɛ ya, To Daana Na'ayenɛ wa'ana la a soŋoreba tuha kekeko! 15A han wa'ana, a wan gankɛ la ba woo ge sagom sɛbadoma woo n tone yalomtooma la sɛla woo te ba tona la, la tɔgɔyooro la woo te sɛba n ka zote Na'ayenɛ la tɔgɔra bɔ'ɔra Na'ayenɛ. 16Nɛrebana wa daarɛ woo gan'angere mɛ ge nyɔna taaba. Ba dole la ba mɛhe potɛn'ɛra n bote se'em la. Ba ŋmɛ'ɛre la ba nyɔn'ɔnrɔ pa'ala ba an se'em ge bɛlegera nɛreba te ba ta'an to'e sɛla. 17Ge n zɔdoma wa, tɛnra ya to Daana Yesu Krista tontoneba la n daa yele ya se'em wonse'eren ha la. 18Ba daa yele ya yeti, Dabeha la han ta pɔnra, nɛreba wan wa'ana kɛɛta ge dɛna nɛresɛba n dole ba mɛhe suunre n bote se'em. 19Nɛrebana wa n tare yelehego kena na. Ba kɔ'ɔn tona la ba mɛhe potɛn'ɛra n bote se'em la ge me ka tara Sea la. 20Ge han dɛna yamam, n zɔ'sonɔ wa, kpeŋere ya ya mɛhe la ya kɔ'ɔn zɔ'ɔra la ya nam se'em la poan ge soha Yenɛ Sea la paŋa poan, 21ge bone ya la Na'ayenɛ nɔŋerɛ la ge gure to Daana Yesu Krista te ninbɔn'ɔn la zuo a wan bo to vom sebo n ka tare ba'ahegɔ. 22Tare ya ninbɔn'ɔn bɔ'ɔra sɛbadoma n tɛn'ɛhere boyi' boyi' la, 23la zɛ' ya sɛba yehe bugum la poan la tare ya ninbɔn'ɔn bo sɛba me n tone toonbe'ero. Ge tare ya dabeem yehera ba etegɔ. Da dekɛ ya mɛhe lɛm sɛba n tone be'emtooma la. 24Nananawa, pɛnka bo se'emdaana n gu' ya te ya kan lu' ge wan tare ya paɛ a nɛŋan na soŋa soŋa la popeelom ge te tuure ka bɔna ya poan. 25Ge to Sɔ' Na'ayenɛ deyena ma'an, se'em n de to faanra la to Daana Yesu Krista zuo la, tare pɛnka la na'ahegɔ, la paŋa la kpe'eŋo wo n daa pon tara pin'ileŋɔ poan ha la nananawa la daarɛ woo. Taarɛ.

will be added

X\