Yosua 8

1Te Na'ayenɛ yele Yosua yeti, Da zɔta dabeem bii ho giinla kɔ'ɔhɛ. Vaɛ pɛɛntɛɛnreba la zan'an zom ta zabɛ la Ai teŋa wa. Mam dekɛ Ai teŋa wa eŋɛ la ya nu'uhen: ka naba la ka nɛreba la ka teŋkantɛ la ka teŋa la zan'an. 2Eŋɛ ya Ai teŋa wa la ka nɛreba la wo yamam eŋɛ Yeriko teŋa la ka naba la se'em la. Ge ya ton vaɛ ba lɔgɔseto woo te ya fan' la la ba dunhe la sɔna. Bahɛ te nɛreba la sogɛ gan'an kae teŋa la mum. 3Te Yosua ihege la pɛɛntɛɛnreba la zan'an keŋɛ te a ta zabɛ la Ai teŋa wa. A loe borase'ehe pɛɛma n ka lute teŋa la tuha pihitan' tom ba yu'uŋɔ, 4bo ba nɔɔrɛ yeti, Kelehe ya soŋa soŋa. Ya ye' te ya ta sogɛ mɛ gan'an kae teŋa la pigiri ka. Da sogɛ ya zaan la ka. Nɛra woo kɔ'ɔn ta maahom a mɛŋa soŋa. 5Mam la sɛba woo n gee la wan deŋɛ nɛŋa teŋa la poan, te nɛreba la han yehe na zabera la tomam wo ban daa pon eŋɛ se'em la, to wan ŋmɛregɛ zɔta. 6Ba wan dige to te to dekɛ ba zɔ zaan la ba teŋa la. Se'ere n sɔe la ba wan yele ba mɛhe yeti, ba zote mɛ wo ban daa pon zɔ se'em la. Ba han ta dige tomam na tole, 7yamam me ihege ya soka zen'enhe la poan damɛ teŋa la. Na'ayenɛ ya Yenɛ la wan dekɛ teŋa la bo ya. 8Ya han ta nyaŋɛ ka, ya laŋɛ ka la bugum bahɛ. Tom ya sɛla ta Na'ayenɛ bo ya nɔɔrɛ te ya tom wa. Behɛ ya soŋa doohe mam bo ya nɔɔrɛ se'em wa. 9Te Yosua bahɛ ba te ba keŋɛ ba soka zen'an la ta gan'an Betel la Ai teŋasoka, Ai teŋa zanɔya bɔba, ge gura. Te Yosua yee la nɛreba la gan'anrɛ te beere yelegɛ. 10Yiimbeere bolika yu'uŋyu'uŋɔ te Yosua gan'ahɛ a pɛɛntɛɛnreba. Enŋa la Israel nɛŋadoma la nya bɔna nɛŋa te ba yɛ'a Ai teŋa poan. 11Pɛɛntɛɛnreba sɛba woo n boe la Yosua la keŋɛ la Ai teŋa nɛŋa. Ba nya tiihom bɔna Ai teŋa zuɔ nu'o bɔba te paberɛ gan'an bama la Ai teŋa la teŋasoka. 12Yosua pon deŋɛ bahɛ te pɛɛntɛɛnreba wo tuha anuu n deŋɛ ta sogɛ Betel la Ai teŋa teŋasoka, nɛŋa tontɔɔ bɔba, ge gura. 13Te ba bahɛ te pɛɛntɛɛnra woo ze'ele a ze'elego zen'an, sɛba woo n tiihom bɔna Ai teŋa zuɔ nu'o bɔba la sɛba n sogɛ Ai teŋa zanɔya bɔba la. Yu'uŋɔ koŋɔ te Yosua yakɛ paberɛ la poan. 14Ai naba n ta nyɛ bala la, enŋa la a nɛreba ihege bolika kanbela te ba to'ohɛ Israeldoma wa te ba zabɛ, zen'an n lɛm la la Arabah la poan. Ge naba wa ka mi' te nɛreba pon sogɛ gan'an ba teŋa la nɛŋan gura ba. 15Yosua la Israel nɛreba la zan'an mina ge bahɛ te ba digera ba te ba zɔta tɔɔra Arabah ha. 16Te ba yi Ai teŋa boraahe la zan'an te ba dige ba, te ba kɔ'ɔn digera Yosua la a nɛreba ta yehe ba teŋa la poan kenkɛleŋa ha. 17Nɛnɛra ka le gee Betel bii Ai teŋa poan, ka yehe Israeldoma wa digera. Ba bahɛ te ba teŋa nayaŋa yu'ɛ ge digera Israeldoma wa. 18Na'ayenɛ yele Yosua yeti, Zɛnkɛ kanɛ la te ho zanla la tɔgelɛ Ai teŋa wa. Se'ere n sɔe mam wan dekɛ teŋa la eŋɛ la ho nu'uhen. Te Yosua zɛnkɛ a kanɛ la tɔ Ai teŋa wa. 19En zɛnkɛ kanɛ la tɔgelɛ Ai teŋa, borase'ehe woo n sogɛ la ihege ba soka zen'enhe la poan, zɔ keŋɛ nɛŋa, paɛ teŋa la poan kalam. Ba kɛn' ka teŋa poan nyaŋɛ ka kalam ge mɔ'ɛ bugum laŋɛ ka bahɛ. 20Ai teŋa boraahe la ta behɛ pooren na, te zun'uhe gulugere ba teŋa la poan zɔna saazuo ha. Ge bala ma'an la, fole ka boe te ba wan ta'an zɔ peɛn. Se'ere n sɔe la Israel nɛreba la n zote ne kɛn'ɛra pɔgɔtia ha la nya ŋmɛregɛ mɛ zabera la ba. 21Yosua la Israel nɛreba la zan'an n ta baŋɛ te sɛba n daa sogɛ la to'e teŋa la mɛ n sɔe te ka zun'uhe zɔna saazuo la, te bama me sɛ ze'ele zabera la Ai teŋa boraahe la. 22Te borase'ehe me soge la me ze'ele Ai teŋa la poan le yehe to'ohɛ Ai teŋa boraahe la na, te ba nya bɔna Israeldoma la teŋasoka. Te Israel nya bɔna ba nɛŋa la ba pooren zabera la ba nya ko ba zan'an te nɛre beeliho ka gee. 23Ge ba nyɔkɛ Ai naba voto tare wa'an Yosua nɛŋan na. 24Israeldoma n ta ko' Ai boraahe la samana zuto la pɔgɔtia poan la zen'sɛka woo poan te ba dige ba paɛ la ba'ahɛ la, ba nya tuluge lebe Ai teŋa la poan na, kɔrom nɛresɛba woo n yee ka poan la. 25Nɛre tuha pia la ayi' n ki de daarɛ dɛna boraahe la pɔgɔhe. Ai teŋa nɛreba zan'an ki mɛ. 26Yosua nu'o la n zɛnkɛ kanɛ tɔ Ai teŋa la ka malom sige teŋa, tara tara te ba ta sagom Ai nɛreba la zan'an. 27Te Israel pe'e teŋa la poan dunhe, vaɛ ka lɔgɔrɔ tara wo Na'ayenɛ n pa'alɛ Yosua se'em la. 28Yosua n nyɔ' Ai teŋa se'em n bala te ka lebege tampogerɛ, dɛna daboo la zina. 29A lo' Ai naba la yule tia zuo, tara tara la zanɔɔrɛ. Wontɛɛŋa n ta luta la, te Yosua nya yele te yulige en tia la zuo tare en ta lobe bahɛ teŋa la nayaŋa nɔɔrɛn. Ge ba ɔnbɛ kugukanra di kum la, te kuga la kelom gan'an bini la zina. 30Te Yosua mɛ' kaanbegɔ bimbine Ebal Zoore la zuo bo Na'ayenɛ Israel Yenɛ la 31wo Na'ayenɛ yameŋa Moses n bo Israeldoma a nɔɔrɛ se'em la. A mɛ' bimbine la mɛ wo lan golehɛ pa'alɛ se'em Moses Pa'alegɔ Gɔŋɔ la poan: bimbine te de kuga ka ŋma bii kurugo lɔkɔ ka makɛ ŋmaɛ de kugure la. Bimbine denɛ zuo te ba daa kaanbera nyɔ'an bo'olom la sunma'ahom bo'olom bɔ'ɔra Na'ayenɛ. 32Te Yosua golehɛ Moses pa'alegɔ la te a yuum behɛ golehɛ la lamenɛ kuga poan Israeldoma la ninin bilam. 33Israeldoma woo, saama la teŋanbiihe, la ba keendoma la kpɛ'ɛndoma la yelegankereba la ze' mɛ kae Na'ayenɛ nɔbiŋere daka la, te ba nɛnhe tɔ Levidoma n de malemadoma n ziira ka la. Te nɛreba la zenzemɔ aan ta zɛ'a Gerizim Zoore la nɛŋan, te zenzemɔ me zɛ'a Ebal zoore la me nɛŋan, wo Na'ayenɛ yameŋa Moses n pon bo ba a nɔɔrɛ la se'em, n yuun pa'alɛ ban wan kan'ara se'em bahera Israel nɛreba zuo la. 34Pooren te Yosua kaanlɛ pa'alegɔ la yɛla la kan'an la woŋerɛ yɛla la woo n golehɛ se'em bɔna Pa'alegɔ Gɔŋɔ la poan la. 35Yele deyena me ka boe te Moses golehɛ eŋɛ gɔŋɔ la poan te Yosua ka kaanlɛ bo Israel nɛreba la zan'an la ba pɔgɔba la ba kɔma la saama woo n lagom bɔna la ba.

will be added

X\