Yosua 5

1Amori nadoma la zan'an n boe Yordan nɛŋa bɔba la Kanaan nadoma la zan'an n boe ko'kantɛ nɔgbɛma la n ta wom Na'ayenɛ n gu' Yordan Kolaa ko'om la se'em ge te Israeldoma la nɛ kɛ'ɛŋa yakɛ na la, dabeem kɛn' ba te ba giinla kɔ'ɔhɛ. Te ba ka le tara sunkanberɛ se'ere n wan ze'ele zabɛ la Israeldoma wa. 2Saŋkaŋa poan te Na'ayenɛ yele Yosua yeti, Maalɛ barehe le ŋma Israel boraa woo yo'ore. 3Te Yosua maalɛ barehe tare ba keŋɛ Gibeat Haaralot ta ŋma ba. 4Lan eŋɛ se'em wa'an bala na dela: Israel boraahe woo n yehe Mizraim teŋa woo dɛna pɛɛntɛɛnreba la ge ba zan'an ki la pɔgɔtia la ba'ahɛ. 5Sɛba woo n daa ze'ele Mizraim teŋa yehe na la zan'an daa ŋma ba yɔ'ɔra mɛ, ge sɛba woo te ba dɔgɛ ba pɔgɔtia ba kenɛ la poan la n ka ŋma. 6Israeldoma daa tuum pɔgɔtia la mɛ yuuma pihinaahe, te sɛba woo n de bonkoroba ze'ele Mizraim teŋa yehe na seke pɛɛntɛɛnrɛ la zan'an ta ki ba'ahɛ. Se'ere n sɔe la, ba daa ka nam Na'ayenɛ. Se'ere n aɔe Na'ayenɛ daa pɔ' bahɛ ba zuo te ba kan nyɛ teŋsɛka te a biŋe nɔɔrɛ la ba sɔdoma te wan dekɛ bo to la, teŋsɛka n zote la iilom la seerom wo ko'om la. 7Bala te a daa tee loe ba kɔma sɔe ba na'arɛ. Kɔma bana n de sɛba te Yosua ŋma ba la. Se'ere n sɔe la ba daa ka ŋma ba kenɛ la poan. 8En ta ŋma teŋa la boraahe la zan'an ba'ahɛ la, ba yee la ba tiiheŋɔ zen'an la poan tara tara te nɔtɛ la ta bɛn'ɛn. 9Na'ayenɛ nya yele Yosua yeti, Zina n le' Mizraim daaŋɔ la ya zen'an bahɛ. Bala zuo te ba yi'ira zen'kaŋa yu'urɛ te Gilgal la zina. 10Ŋmarekaŋa mea dabeha pia la anaahe daarɛ zanɔɔrɛ, te ban kelom tiihom bɔna Gilgal Yeriko bɔn'ɔrɔ la poan, Israeldoma de'em Azootole Daarɛ la. 11Daanse'ere n tagalɛ Azootole Daarɛ la, daanden daarɛ mea te ba di teŋa la poan samanɛ zuo dia la boroboro n ka tare mi'ihom de poan la, ge sɛn' teŋa mea poan ki' obe. 12Ban ta di teŋa wa samanɛ zuo boom la, yiimbeere te *manna dia la go'e ka le zɔngɛra na. *Manna dia wa ka le bɔna bɔ'ɔra Israeldoma le yɛ'ɛha ge te ba nya dite la Kanaan samanɛ zuo dia. 13Yosua n ta pɔnra Yeriko teŋa poan la, a nyɛ te boraa ze' a nɛŋan foe ka so'a zanla. Yosua keŋɛ paɛ a zen'en soke en yeti, Ho boe mɛ la tomam bii ho boe mɛ la to diŋdoma la? 14Boraa la lebehe yeti, Mam ka boe la ya se'em. Mam dela Na'ayenɛ zaba nɛŋadaana n wa'ana. Te Yosua lu aliko na'ahɛ en ge soke en yeti, N Daana, ho tare la sɔɔlen kane te ho bo ho yameŋa wa? 15Te Na'ayenɛ zaba nɛŋadaana wa lebehe en yeti, Pirihe ho tagara la. Se'ere n sɔe, zen'an te ho zɛ'a la dela toolom zen'an. Te Yosua pirihe a tagara la wo n yele en se'em la.

will be added

X\