Yosua 3

1Bolika yu'uŋyu'uŋɔ Yosua la Israel nɛreba zan'an ihege Sitim zen'an yɛ'a sigera Yordan Kolaa poan na zen'sɛka te ba tiihom gan'an maahena te ba yakɛ Yordan Kolaa la. 2Dabeha atan' n ta tole, te kpɛ'ɛndoma la nya ihege kaara ba gan'an zen'enhe la, 3ge yɛta ba yeti, Ya han ta nyɛ' Na'ayenɛ ya Yenɛ la nɔbiŋere daka la Levidoma n de malemadoma la ziire ka, ya zan'an ihege dɔla ba. 4Bala te ya wan baŋɛ sɔrɔɔ seko te ya wan doohe. Se'ere n sɔe la ya nan ka tabelɛ wa'an ka'lam bɔba na. Ge bone ya pooren santira tuha ayi' wa. Da lɛne ya nɔbiŋere daka la. 5Yosua yele nɛreba la yeti, Nɛra woo pee a mɛŋa. Se'ere n sɔe la, beere te Na'ayenɛ wan tom la nyalema toonɛ yamam ya poan. 6Yosua yele malemadoma la yeti, Yamam dekɛ nɔbiŋere daka la bɔna nɛreba wa nɛŋa. Te ba dekɛ daka tole nɛreba la nɛŋa. 7Te Na'ayenɛ yele Yosua yeti, Zina n wan pɔhɛ zɛnkɛ ho Israel zan'an ninin te ba baŋɛ te mam boe la ho mɛ wo mam pon ne daa bɔna la Moses se'em la. 8Yele malemadoma n ziire nɔbiŋere daka la te ba han ta paɛ Yordan Kolaa la nɔgbene, ba sige ta ze'ele kolaa la poan. 9Yosua yi Israeldoma la yeti, Lagahɛ ya ka'lam na wom Na'ayenɛ ya Yenɛ la n yele se'em. 10Wana n wan bahɛ te ya mina te Na'ayenɛ n vɔe seren boe la ya mɛ ge te a wan dige Kanaandoma la Hitidoma la Hivdoma la Perizidoma la Girgasdoma la Amoridoma la Yebusdoma la ya nɛŋan. 11Behere ya, Daana la n sɔe teŋparɛ wa zan'an la nɔbiŋere daka la wan deŋɛ ya nɛŋa ta sige Yordan ko'om la. 12Bala, loohe ya Israel buuri la woo poan nɛra nɛra te ba dɛna nɛre pia la bayi'. 13Ge malemadoma n ziira Na'ayenɛ teŋparɛ wa zan'an Daana daka, ba na'arɛ han ta nɛɛra Yordan Kolaa la poan, ko'om wa n urugure yɛ'a na la wan ŋmaɛ ge gan'ahɛ bo mɛŋa zɔna taaba. 14Nɛreba la n ta yeregɛ te ba yakɛ Yordan Kolaa la, malemadoma la n ziire nɔbiŋere daka la n boe nɛŋa te ba dɔla. 15Yordan Kolaa wa ne kɔ'ɔn perɛ mɛ sapɔlɔgɔ beere. Te malemadoma la n ziire daka la n daa ta paɛ Yordan Kolaa wa poan te ba na'arɛ ta kalena ko'om la nɔgbene la, 16ko'om sebo n ze'ele saazuo zɔta na la ŋmaɛ mɛ. Pɔhɛ teŋa te ba yi'ira ka Adam n boe zaan zaarɛ n lɛm la Zaretan teŋa, kɔ'ɔn gan'aha bo mɛŋa zɔna taaba la, te ko'om sebo me n zote sigera Araba Mɔgɔrɛ n de Yaarom Mɔgɔrɛ la me gu' zɛ'a. Ge te teŋasoka la dɛna kɛ'ɛŋa te nɛreba yakɛ Yeriko dapoore bɔba la. 17Te malemadoma la n ziire Na'ayenɛ nɔbiŋere daka la nɛ kɛ'ɛŋa la poan Yordan Kolaa wa teŋasoka zɛ'a ge te Israel buuri la zan'an tole ta yakɛ ba'ahɛ.

will be added

X\