Yosua 24

1Te Yosua lagahɛ Israel buuri la zan'an Sekem teŋa poan: keendoma la nɛŋadoma la yelegankereba la kpɛ'ɛndoma la zan'an n boe Israel poan la. Te ba zan'an wa'an Na'ayenɛ nɛŋan na. 2Yosua yele nɛreba la zan'an yeti, Na'ayenɛ Israel Yenɛ la yeti, deemen deemen ha la ya sɔyaabdoma ta ta' ya sɔyaaba Tera n de Abraham la Nahor sɔ la yuun kɛn'ɛre la Euprates Kolaa wa yakenɛ ha kaanbera baga. 3Ge mam yuun dekɛ ya sɔ Abraham, Kolaa la yakenɛ la ha, tare en doohe Kanaan teŋa wa poan zan'an, ge bo en yaahe zo'e zo'e. Mam yuun bo en Isaak, 4ge bo Isaak Yakob la Esau. Mam yuun dekɛ Seir n de zoore la bo Esau ge Yakob la a dayɔɔhe sige la Mizraim teŋa. 5Te mam yuun tom Moses la Aron, ge damɛ Mizraimdoma la yelese'a te n eŋɛ ba teŋa la poan la, ge tare ya yehe na. 6Mam yuun tare ya sɔdoma Mizraim teŋa poan yehe na la, ya wa'ana paɛ la ko'kantɛ wa, te Mizraimdoma la digera ba la yiri toroto la yiri ban'areba wa'ana paɛ Mɔgɔ Mɔlega la. 7Ge ba kaahɛ bo Na'ayenɛ ɛɛra soŋorɛ, te a dekɛ lika beŋɛ yamam la Mizraimdoma la teŋasoka, ge bahɛ te ko'om la di ba keŋɛ. Ya mɛhe nini nyɛ mam eŋɛ Mizraimdoma wa se'em. Te ya kɛn' pɔgɔtia teŋa la poan yuue. 8Te n tare ya wa'an Amoridoma la n kɛn'ɛre Yordan dapɔya ha la teŋa la poan na. Te ba zabɛ la ya te mam dekɛ ba eŋɛ ya nu'uhen. Mam sagom ba mɛ ya nɛŋan te ya fan' ba teŋhe la sɔna. 9Zipor dayɔa Balak n de Moab naba la n daa ta maahom te ba zabɛ la Israel la, a tom la Balaam n de Beor dayɔa la zen'an, te a wa'ana pɔ' bahɛ ya zuo. 10Ge mam ka kelehe Balaam, te a yare malom kan' som bo ya, te mam fan' ya a nu'uhen bahɛ. 11Te ya yakɛ Yordan Kolaa wa'ana paɛ Yeriko teŋa. Te Yeriko teŋa nɛreba zabɛ la ya wo Amori la Perizi la Kanaan la Hiti la Girgas la Hivi la Yebus doma la woo n zabɛ la ya se'em la ge te mam dekɛ ba eŋɛ ya nu'uhen. 12Ya han ne ta pɔnra ba, n ne bahɛ te namehegɔ sige ba zuo te n dige ba ya nɛŋan wo mam eŋɛ Amori nadoma bayi' la se'em la. Dagɛ ya so'ahe, la ya pɛɛma te ya dekɛ dige ba. 13N bo ya la teŋsɛka te ya ka namehɛ se zuo, teŋse'ehe en mɛ kɛn'ɛhe kɛn'ɛhe te ya mɛhe ka mɛ, te ya bɔna se poan ge dita se tiihe wɔla la se kaam se'a te ya ka borɛ. 14Nananawa zote ya Na'ayenɛ ge tona bɔ'ɔra en la ya sakerɛ zan'an. Lobe ya baga se'a woo te ya sɔyaabdoma yuun kaanbera Kolaa wa yakenɛ ha la Mizraim teŋa ha la bahɛ, ge tona bɔ'ɔra Na'ayenɛ ma'an. 15Ge ya tona bɔ'ɔra Na'ayenɛ ma'an la han ka ana soŋa bɔ'ɔra ya, ya loe yan wan tona bɔ'ɔra se'em bo ya mɛhe zina. Ya han wan tona bɔ'ɔra la bagase'a te ya sɔyaabdoma yuun bɔna Kolaa wa yakenɛ ha tona bɔ'ɔra la bii Amori sɛba teŋa te ya kɛn'ɛra wa baga la ya loe. Ge han dɛna mam la n yiredoma, tomam wan tona bɔ'ɔra la Na'ayenɛ la. 16Te nɛreba la lebehe yeti, La pon kan malom eŋɛ te tomam zagahɛ Na'ayenɛ ge tona bɔ'ɔra baga. 17La dela Na'ayenɛ to Yenɛ la n tare tomam la to sɔyaabdoma ze'ele Mizraim teŋa yehe na, teŋsɛka te to yuun dɛna yamehe ka poan la, ge tom yelekanra to ninin. Enŋa n gu'ure te to sore kenɛ la teŋse'ehe woo poan te to doohe tole la. 18Na'ayenɛ n dige nɛreba ba teŋhe poan bahɛ bo to dige Amoridoma sɛba n yuun boe teŋkana wa poan la zan'an. Tomam me wan tona bɔ'ɔra la Na'ayenɛ mea, enŋa n de to Yenɛ la zuo. 19Te Yosua yele ba yeti, Ya kan ta'an tona bɔ'ɔra Na'ayenɛ. Enŋa n de fa'a Yene. A dela nyuunre Yenɛ. A kan bahɛ ya pobirega la ya be'em bo ya. 20Ya han zagahɛ Na'ayenɛ ge tona bɔ'ɔra baga, a wan ŋmɛregɛ bahɛ ya te nɔyalegerɛ sige ya zuo na ba'ahɛ ya, la enŋa n pon eŋɛ ya som la. 21Ge nɛreba la yele Yosua yeti, Ɛɛn! Tomam wan tona bɔ'ɔra la Na'ayenɛ. 22Te Yosua nya yele ba yeti, Ya mɛhe n de seradaana bo ya mɛhe te ya loe la ya tona bɔ'ɔra Na'ayenɛ. Te ba lebehe yeti, Ɛɛn, to mɛhe n de seradaana bo to mɛhe. 23Te Yosua yele ba yeti, Han dɛna bala, lobe ya baga la bahɛ ge dekɛ ya sunya bo Na'ayenɛ Israel Yenɛ la. 24Te ba lebehe Yosua yeti, Tomam wan tona bɔ'ɔra la Na'ayenɛ to Yenɛ la ma'an ge nana en. 25De daarɛ te Yosua biŋe nɔɔrɛ la nɛreba la ge bo ba malema la nɔze'elego Sekem teŋa poan. 26Te Yosua golehɛ yele ana wa eŋɛ Yenɛ Pa'alegɔ Gɔŋɔ la poan ge dekɛ kugukantɛ sɛ' tikantɛ teŋa lɛm la Na'ayenɛ toolom zen'an la. 27Ge a yele nɛreba la zan'an yeti, Behɛ ya! Kugure dena wa n de aseradaana bo to. De wom yelese'a zan'an te Na'ayenɛ yele to wa mɛ. Ya han ka dɔla Yenɛ la yelemɛŋɛrɛ, kugure wa wan dɛna aseradaana. 28Te Yosua nya bahɛ te nɛra woo kule ba yiya ba sɔ'ɔlom ba sɔ'ɔlom poan. 29Yele ana wa woo ta tole mɛ Nun dayɔa Yosua n de Na'ayenɛ yameŋa la ta paɛ yuum kɔbega la yuum pia, ge nya ki. 30Te ba pin' en a sɔ'ɔlom teŋa Timnat Sera teŋa n boe Epraim zoore zuo teŋa la n boe Gaas Zoore la nɛŋa na la. 31Israel buuri wa wa tone bɔ'ɔra la Na'ayenɛ saŋsɛka te Yosua la keendoma sɛba n daa boe la en la sɛba n nyɛ sɛla woo te Na'ayenɛ tom bo Israel la. 32Te ba dekɛ Yosef konba la te Israeldoma zi ze'ele Mizraim teŋan na la pin' a Sekem teŋa sɔlega sɛka poan te Yakob da' la sanlenpeelega kpila kɔbega Sekem sɔ Hamor dayɔɔhe zen'en la. Sɔle kana wa nya dele Yosef yaahe sɔ'ɔlom. 33Te Aron dayɔa Eleazar me ta ki, te ba pin' en Gibea teŋa, teŋsɛka en dekɛ bo a dayɔa Pinehas, te ka bɔna Epraim zoore zuo teŋa la poan la.

will be added

X\