Yosua 22

1Te Yosua kan'ahɛ Areubendoma la Gaddoma la Manase yizuo koyema nɛreba la na, 2yele ba yeti, Ya nan eŋɛ sɛla woo te Na'ayenɛ yameŋa Moses bo ya nɔɔrɛ te ya tom la, ge me nam mam mɛ bo ya nɔse'ere woo poan. 3Ya pin'ilom te la yuue mɛ na tara tara la zina, ya ka zagahɛ ya sɔɔnrɔ wa, ge me tom la toonse'ere te Na'ayenɛ ya Yenɛ la bo ya te ya tom la. 4Nananawa, Na'ayenɛ ya Yenɛ la nya bo ya sɔɔnrɔ wa me vo'ohogo wo n biŋe a nɔɔrɛ se'em la, ya nan ta'an lebe ya yiya, teŋse'ehe poan te Na'ayenɛ yameŋa Moses dekɛ bo ya Yordan yakenɛ dena ha la. 5Ge ya ma'ɛn ya mɛhe la ya dɔla nɔɔrɛ la pa'alegɔ la te Na'ayenɛ yameŋa Moses daa dekɛ bo ya la: Nɔŋɛ Na'ayenɛ ya Yenɛ la, dɔla a sore la zan'an, nana a nɔya, gin' en kaŋkaŋe, ge tona bɔ'ɔra en la ya suunre la ya sea zan'an. 6Te Yosua kan' somɔ bahɛ ba zuo bo ba sore te ba keŋɛ, te ba lebe kule. 7Manase yizuo koyema la, Moses n daa bo ba la sɔ'ɔlom Basan teŋa poan. Ge Yosua me bo yizuo koyema se'ere n gee la sɔ'ɔlom Yordan nɛŋa bɔba ha la ba sɔɔnrɔ. Yosua n bo ba sore te ba kule, a kan' bo ba mɛ, 8yeti, Lebe ya ya yiya poan la tarega la ya dunhe zo'e zo'e la sanlenpeelega la sanlema la nyɔgom la kuto, futo sonɔ. Tare ya lɔgɔseto te ya va ya diŋdoma zen'enhe la ta tɔnrɛ la ya sɔɔnrɔ. 9Te Areuben la Gad la Manase yizuo koyema bahɛ Israeldoma ana la Silo n boe Kanaan teŋa poan la, la ba lebe ba mɛŋa sɔ'ɔlom la Gilead poan, teŋsɛka te ba daa to'e ka doohe la Na'ayenɛ n bo Moses a nɔɔrɛ se'em la. 10Ban wa'ana paɛ Gelilot teŋa n lɛm Yordan Kanaan teŋa poan la, te Areuben la Gad la Manase yizuo koyema la mɛ' bimbine kantɛ lɛm la Yordan la. 11Israeldoma ana n ta wom te ba mɛ' la bimbine Kanaan beene zuo Gelilot teŋa n lɛm la Yordan lebehe bama bɔba na la, 12te Israeldoma ana la zan'an lagahɛ taaba Silo teŋa poan te ba keŋɛ ta tɛn' la ba. 13Te Israeldoma wa tom malemadaana Eleazar dayɔa Pinehas, te a keŋɛ Gilead teŋa poan, ta paɛ Areuben la Gad la Manase yizuo koyema la teŋhe poan. 14Ba me dekɛ la nɛrekanreba pia, yizuo woo nɛra ayena. Ba woo dɛna yizuo woo keema wo Israel yizuto la n zone se'em la pa'ahɛ enŋa zuo te ba keŋɛ. 15Ban ta paɛ Gilead teŋa, paɛ Areuben la Gad la Manase yizuo koyema buuri la zen'an la, ba yele ba yeti, 16Na'ayenɛ nɛreba la zan'an yeti, wane te yamam yehe ya sakerɛ Israel Yenɛ wa zen'an wana? Wane te ya wan ta'an ŋmɛregɛ ya mɛhe Na'ayenɛ zen'an, mɛ ya mɛhe bimbine pilom bita poore baha en nananawa? 17Peor teŋa be'em la ka seke to? Tara na paɛ zina, to nan ka duuhe be'em la to poan bahɛ la namehegɔ n pon lu Na'ayenɛ nɛreba la zuo la. 18Ya bire la ya pɔya baha Na'ayenɛ? Ya han zagahɛ Na'ayenɛ zina, beere a sunsunya wan nyie la Israel zan'an. 19Ya han boe teŋsɛka poan la han ganlom mɛ, wa'an ya Na'ayenɛ teŋa la poan na, zen'en te a Sogorɛ la bɔna la, te to lagom tɔnrɛ kaŋa bɔna. Ge da zagahɛ ya Na'ayenɛ bii tomam, la yamam n mɛte ya mɛhe kaanbegɔ zen'an ge bahɛ Na'ayenɛ to Yenɛ la mɛŋa kaanbegɔ daka la. 20Zera dayɔa Akan n yuun tom ŋmɛlema tooma doohe lɔgɔseto n ka sone to kalom la, Na'ayenɛ sunsunyiim yuun ka sige la Israel zan'an zuo na? Dagɛ enŋa ma'an n yuun ki a be'em la poan. 21Te Areuben la Gad la Manase yizuo koyema la nya yele Israeldoma ana la yizuto keendoma la yeti, 22To Daana Na'ayenɛ n de Yenɛ! To Daana Na'ayenɛ n de Yenɛ! A mi'! Bahɛ ya te Israel zan'an baŋɛ! Tomam n eŋɛ sɛla wa han dɛna la pobirega bii to ka nam mɛ, ba da bahɛ to zina dabaherɛ wa. 23Tomam han mɛ la to mɛŋa bimbine te to bire to mɛhe bahɛ Na'ayenɛ, ge kaanbera nyɔ'an bo'olom bii ki bo'olom bii to kaanbera lagaŋɔ bo'olom de zuo, Na'ayenɛ mɛŋa yi' to te to pa'alɛ de vɔnrɛ. 24Aai! Tomam eŋɛ wana wa la beere zuo te ya yaahe da ta ta'an yele tomam yaahe yeti, yamam me tare la dena la Israel Na'ayenɛ wa? 25Ba ta'an yeti, Na'ayenɛ n dekɛ la Yordan Kolaa wa beŋe tomam la yamam teŋasoka, yamam Areuben la Gad doma wa, ge ya ka tare tɔntɛ Na'ayenɛ zen'an. Bala te, ya yaahe la ta'an eŋɛ bala bahɛ te tomam yaahe la ka ta zɔta Na'ayenɛ. 26Bala n sɔe te tomam tɛn'ɛhɛ yeti to mɛ' bimbine wa, ge dagɛ bilam te to wan nyɔ'anra to bo'olom bii kaanbegɔ bo'olom. 27Sɛla n le pa'ahɛ dela, de wan dɛna seradaana bo yamam la tomam la buuri saŋsɛka woo n boe pooren la te to wan na'aha Na'ayenɛ la a Sogorɛ la poan la to nyɔ'an bo'olom la to kaanbegɔ bo'olom la to sunma'ahom bo'olom. Bala te pooren ya yaahe kan ta nyaŋɛ yele tomam yaahe yeti to ka tare tɔntɛ Na'ayenɛ zen'an. 28Tomam yeti, ba han ta yele tomam mɛhe bii to yaahe bala, to wan pa'alɛ ba yeti, behe ya, Na'ayenɛ bimbine la taaba n wana te to sɔdoma mɛ. Dagɛ te ba kaanbera nyɔ'an bo'olom bii kaanbegɔ de zuo, ge la dɛna aseradaana bo tomam la yamam. 29La zaan la tomam, te tomam wan sakɛ zagahɛ Na'ayenɛ zina, bire poore bahɛ en ge mɛta bimbine te to kaanbera nyɔ'an bo'olom la ki bo'olom la kaanbegɔ bo'olom bilam ge bahɛ Na'ayenɛ to Yenɛ la kaanbegɔ daka la n ze' a Sogorɛ la nɔɔrɛn la. 30Malemadaana Pinehas la Israel yizuo keendoma n wom Areuben la Gad la Manase n yele se'em la, ba poorɛ pee mɛ. 31Te malemadaana Eleazar dayɔa Pinehas yele Areuben la Gad la Manase wa yeti, Zina wa to mi' te Na'ayenɛ boe la to la yamam n ka tue Na'ayenɛ yele dena wa poan wa. Ya fan' Israel buuri la woo mɛ Na'ayenɛ sunsunyiim poan bahɛ. 32Malemadaana Eleazar dayɔa Pinehas la Israel yizuto keendoma la n baŋɛ Areuben la Gad la Manase potɛn'ɛrɛ n de se'em la, ba nya lebe kule ba teŋa Kanaan ta yele Israeldoma bama n wom sɛla woo la. 33Bama me n wom bala la, ba poorɛ pee mɛ, te ba pɛngɛ Yenɛ de zuo, ge ka le tɛn'ɛha te ba keŋɛ ta zabɛ sagom teŋsɛka te Areuben la Gad la Manase doma bɔna ka poan la. 34Te Areuben la Gad doma wa segɛ bimbine Aseradaana Tomam Teŋasoka te Na'ayenɛ n de Yenɛ.

will be added

X\