Yosua 20

1Te Na'ayenɛ yele Yosua yeti, 2Yele Israeldoma wa te ba loe gankerɛ teŋhe la wo mam daa bo Moses n nɔɔrɛ se'em la, 3te se'em n ka baŋɛ ge ko nɛra, wan zɔ keŋɛ gankerɛ teŋhe la poan ta kɛn'era te lɛta la da paɛ en. 4Se'em han zɔ keŋɛ teŋhe sena wa kayema poan ta paɛ, a ze'ele teŋa la nayaŋa nɔɔrɛn la a pa'alɛ lan eŋɛ se'em bo teŋa la keendoma la. Bama me to'e en ba teŋa la poan ge bo en zen'en te a bɔna la ba. 5Lɛta me han dige en na paɛ na, ba da dekɛ nɛre sɛka n ka baŋɛ ge ko nɛra la bo en. 6A bɔna teŋa la poan gura te ba ta lagahɛ tɔgɛ a yele la. Ge a wan kelom bɔna bilam gura se'em ma'an te a teŋa malema nɛŋadaana se'em tona Sogorɛ la poan a yele saŋa la han ta ki te a nya lebe a mɛŋa yire la te a zɔ ka poan yehe na la. 7Bala te ba yehe Kedes n boe Galilee teŋa n boe Naptali zɔya teŋhe la Sekem n boe Epraim zɔya teŋhe la Kiriat Arba n de Hebron, n boe Yuda zɔya teŋhe. 8Yordan Kolaa n boe Yeriko dapɔya bɔba ha la, ba yehe la Bezer n boe Areuben yizuo la sɔ'ɔlom poan dɛna teŋpɔgɔtia la Aramot teŋa n boe Gilead teŋa n boe Gad yizuo sɔ'ɔlom la Golan teŋa n boe Basan teŋa la n boe Manase yizuo sɔ'ɔlom poan la. 9Israel nɛra se'em woo bii saana se'em woo n lagom kɛn'ɛra la Israel wa han ka baŋɛ ge ko nɛra, a ta'an zɔ ta kɛn'era gankerɛ teŋhe sena wa poan ta bɔna, te lɛta kan nyaŋɛ ko' en. A me wan ze'ele keendoma la nɛŋan te ba tɔgɛ a yele la behɛ nya a tare boorɔ bii a ka tare.

will be added

X\